بۇگىندە اتالعان تاسجولدىڭ بويىنداعى قۇرىلىس 4 ۋچاسكەگە ءبولىنىپ, جۇمىس اتقارىلۋدا. ونىڭ ىشىندە مەركى اۋدانىنان شۋ قالاسىنا دەيىنگى جول قۇرىلىسى 86 شاقىرىمدى قۇرايدى. ال اسفالت جابىندى ءتورت جولاقتى قوزعالىسقا ارنالىپ ءتوسەلەدى. سونىمەن قاتار شۋ قالاسىنان بۋرىلبايتالعا دەيىنگى جول 176 شاقىرىمدى قامتيتىن بولادى. مۇندا ەكى جولاقتى ءىى تەحنيكالىق ساناتتاعى جول سالىنادى. تولىعىمەن جاڭارتىلعان اۆتوموبيل جولى ءتاتتى, شۋ, ءبىرلىك ەلدى مەكەندەرى ارقىلى وتەدى دەپ كۇتىلۋدە. ال قايتا قۇرۋ جوباسى اياسىندا كۇرەجولدىڭ بويىندا 6 كوپىر, 3 تەمىرجول وتكەلى, 11 جاراقتاندىرىلعان كولىك ايرىعى, 276 سۋ وتكىزۋ قۇبىرلارى, دەمالىس الاڭدارى جانە پاۆيلون سالىنادى. تاعى ءبىر ايتا كەتەرلىگى, «مەركى-بۋرىلبايتال» اۆتوجولىنىڭ قۇرىلىسىنا توزىمدىلىگى جوعارى قيىرشىق تاس – ماستيكالىق اسفالتبەتون پايدالانىلماق. جوبا 2022 جىلدىڭ ماۋسىم ايىندا تولىعىمەن اياقتالادى دەپ جوسپارلانىپ وتىر. بۇگىنگە دەيىن جامبىل جۇرتشىلىعىنىڭ باستى ماسەلەسى بولىپ كەلگەن كۇرەجول ەندى شەشىمىن تاباتىن بولادى.
سونىمەن قاتار تاراز قالاسى كوشەلەرىنىڭ جول جابىندىلارىن قالپىنا كەلتىرۋ دە وزەكتى ماسەلەلەردىڭ ءبىرى. جامبىل وبلىسىنىڭ اكىمى اسقار مىرزاحمەتوۆتىڭ تاپسىرماسىنا وراي بۇل باعىتتا بارلىق كوشەلەردى تۇگەندەۋ جۇمىستارى ءجۇرگىزىلگەن. ناتيجەسىندە, بۇعان دەيىن كوممۋنالدىق مەنشىكتە ۇزىندىعى 996 شاقىرىمدى قۇرايتىن بارلىعى 576 كوشە تىركەلسە, ءتۇگەندەۋ جۇمىستارى بارىسىندا ۇزىندىعى 1531 شاقىرىمدى قۇرايتىن 1330 كوشە انىقتالدى. سونداي-اق وڭىردە قالاداعى كوشە جابىندىلارىن رەتتەۋ ءۇشىن ارنايى ءۇش جىلدىق جول كارتاسى بەكىتىلگەن بولاتىن. كارتاعا سايكەس, ءبىرىنشى كەزەكتە مەكتەپتەر, بالاباقشالار, دەنساۋلىق ساقتاۋ نىساندارى سىندى الەۋمەتتىك ماڭىزى بار مەكەمەلەر ورنالاسقان جانە قوعامدىق كولىكتەر قاتىنايتىن, ينجەنەرلىك جۇيەلەرمەن تولىعىمەن قامتىلعان كوشەلەردى جوندەۋ كوزدەلۋدە. بۇل باعىتتا بيىل اعىمداعى جوندەۋ جۇمىستارىنا بيۋدجەتتەن 100 ميلليون تەڭگە ءبولىنىپ, 22000 شارشى مەتردى قۇرايتىن, قوعامدىق كولىكپەن قامتىلعان 86 كوشەنى قامتۋ جوسپارلانعان. بۇگىنگى تاڭدا ونىڭ 8900 شارشى مەترىندە, ياعني 36 كوشەدە ناقتى جۇمىس اتقارىلدى. قالعان جۇمىس اعىمداعى جىلدىڭ شىلدە ايىندا اياقتالادى دەپ كۇتىلۋدە.
سونىمەن قاتار قالاداعى 29 جوبا بويىنشا ۇزىندىعى 75 شاقىرىمدى قۇرايتىن 148 كوشەگە قۇنى 1,5 ميلليارد تەڭگە بولاتىن ورتاشا جوندەۋ جۇمىستارى جۇرگىزىلەتىن بولادى. بۇل ورايدا نەگىزىنەن «تايۆان», «اراي» تۇرعىن القاپتارىنىڭ كوشەلەرى دە قامتىلادى. بۇدان بولەك, جەرگىلىكتى بيۋدجەت ەسەبىنەن 600 ميلليون تەڭگە قارالىپ, قالانىڭ كوپقاباتتى تۇرعىن ۇيلەرى ورنالاسقان شاعىن اۋداندارداعى جول جابىندىلارىنا دا اعىمداعى جوندەۋ جۇمىستارى اتقارىلاتىن بولادى. جالپى قازىرگى تاڭدا تاراز قالاسىن دامىتۋ باستى نازاردا. ونىڭ ىشىندە شاھارداعى بارلىق كوشەلەردى ءجوندەۋ ماقساتىندا ءتيىستى جۇمىس اتقارىلۋدا. «بۋرىل ا,ب,ۆ» تۇرعىن ءۇي ءماسسيۆىنىڭ 26 شاقىرىمدى قۇرايتىن 50 كوشەسىنە شاعىل تاس توسەۋ جۇمىستارى باستالدى. ونىڭ جالپى قۇنى 260 ميلليون تەڭگەنى قۇراپ وتىر. بۇل جۇمىستاردى «ايا سەرۆيس» جاۋاپكەرشىلىگى شەكتەۋلى سەرىكتەستىگى جۇرگىزۋدە. وبلىس اكىمدىگىنىڭ مالىمەتىنشە, اتالعان ماسەلەلەر تۇراقتى باقىلاۋعا الىنعان. وبلىس اكىمى اسقار مىرزاحمەتوۆتىڭ تىكەلەي باستاماسىمەن قولعا الىنعان جامبىل وڭىرىندەگى جول جوندەۋ جۇمىستارى جاندانۋدا. سونىمەن قاتار قالا ىشىندەگى جۇمىستار دا تاراز قالاسىنىڭ ساۋلەتتىك كەلبەتىنىڭ ارتۋىنا ءوز سەپتىگىن تيگىزەتىنى ءسوزسىز.
