بۇل جولى ول سپورتتىق بي وكىلدەرىمەن كەزدەسىپ, ادەمىلىك پەن اسەمدىككە نەگىزدەلگەن وسى سپورت ءتۇرىنىڭ دامۋ بارىسى جايىندا كەڭىنەن اڭگىمە قوزعالدى. «الماتىلىق فەدەراتسيا – رەسپۋبليكامىزداعى ەڭ ۇزدىگى. الاتاۋ باۋرايىنداعى اسەم شاھاردا 31 كلۋب جۇمىس ىستەيدى جانە ولار ەشكىمگە الاقان جايماي, ءوز-وزدەرىن قارجىلاندىرىپ وتىر», – دەيدى قالالىق سپورتتىق بي فەدەراتسياسىنىڭ پرەزيدەنتى گالينا زايدەنترۋمف.
ايتۋلى كلۋبتاردى بالالارى سپورتتىق بيمەن اينالىساتىن اتا-انالار قارجىلاندىرادى. فەدەراتسيا ولاردى حالىقارالىق تۋرنيرلەرگە جىبەرەدى. ال ىشكى جارىستارعا كەلەر بولساق, بيشىلەردىڭ باستى پروبلەماسى – ارنايى الاڭدار جوق. جالداۋ باعاسى قىمبات. سول سەبەپتى دە ۇيىمداستىرۋشىلار جارىستار بيلەتىنىڭ باعاسىن كوتەرۋگە ءماجبۇر. ال بالالارىنىڭ ونەرىن تاماشالاۋ ءۇشىن اتا-انالارىنان بولەك, اتا-اپالارى, تۋعان-تۋىستارى دا كەلەدى. ياعني, ولاردىڭ قالتاسىنا سالماق تۇسەدى.
جيىندا الماتى قالاسىندا ءىرى حالىقارالىق تۋرنير وتكىزۋ ماسەلەسى تالقىلاندى. قۇرمەتتى قوناق رەتىندە ەڭ ۇزدىك جۇپتاردىڭ ءبىرى - يتاليالىق ستەفانو دە فيليپپو مەن داريا چەسنوكوۆانى شاقىرۋ جايىندا ۇسىنىس ايتىلدى. وسىنداي كاسىپقويلاردى كورگەننەن كەيىن كوپتەگەن الماتىلىق بي ونەرىمەن اينالىسقىسى كەلەتىنى ءسوزسىز.
