شاڭىراق شاتتىعى مەن وتباسى مارتەبەسىن ارتتىرىپ, ۇلتتىق قۇندىلىقتاردى جاڭعىرتۋعا باعىتتالعان «مەرەيلى وتباسى» ۇلتتىق بايقاۋىنىڭ اق جايىق وڭىرىندەگى كەزەڭى وتە تارتىستى ءوتتى. ءاۋ باستا ءوز كۇشىنە, ءبىلىمى مەن ونەرىنە سەنگەن 48 وتباسى سايىسقا تۇسكەنىمەن, سوڭعى سىنعا 13 وتباسى ىرىكتەلىپ شىقتى. بايقاۋعا تورەلىك ەتكەن وبلىستىق كوميسسيا بايقاۋعا قاتىسقان وتباسىنىڭ قوعامداعى ابىروي-بەدەلىنە, ازاماتتىق بەلسەندىلىگىنە, شاڭىراقتا ۇلتتىق قۇندىلىقتاردى قانشالىقتى ساقتاۋىنا باسا ءمان بەرىپتى.
- اتادان بالاعا ميراس بولىپ كەلە جاتقان ءتالىم-تاربيەنى ۇرپاققا دارىتۋ, ۇل-قىزىن قاتارىنان كەم قىلماي ءوسىرۋ, ولاردى ەلىن سۇيەتىن ازامات ەتىپ تاربيەلەۋ – ءار وتباسىنداعى ۇلتتىق يدەولوگيا ەكەنى ءسوزسىز. تاۋەلسىز ەلىمىزدىڭ كوك بايراعىن كوككە كوتەرەتىن جاستارىمىز وسىنداي مەرەيلى وتباسىلاردان ءوسىپ شىعادى. وتباسىن قالاي قۇرىپ, پەرزەنتىن قالاي تاربيەلەۋدى ۇيرەنەدى, - دەيدى باتىس قازاقستان وبلىسى اكىمىنىڭ ورىنباسارى باعدات ازباەۆ بايقاۋدىڭ رەسپۋبليكالىق كەزەڭىنە جولداما العان جەڭىمپاز وتباسىلاردى قۇتتىقتاپ تۇرىپ.
سونىمەن, رەسپۋبليكالىق «مەرەيلى وتباسى-2019» ۇلتتىق بايقاۋىنىڭ وبلىستىق كەزەڭىندە قازتالوۆ اۋدانىنان كەلگەن قارساقوۆتار وتباسى جۇلدەلى 1 ورىنعا قوسا, رەسپۋبليكالىق بايقاۋعا جولدامانى ۇتىپ الدى. جەڭىمپاز شاڭىراقتىڭ وتاعاسى مەدەت قارساقوۆ - دەنە شىنىقتىرۋ ءپانىنىڭ I ساناتتى مۇعالىمى, 15 جىلدىق ءوتىلى بار ۇستاز. مەدەتتىڭ جۇبايى گۇلايىم وتەگەنوۆا دا – 16 جىلدان بەرى باستاۋىش سىنىپتارعا ساباق بەرىپ كەلە جاتقان ۇزدىك مۇعالىم, ءبىلىم دەپارتامەنتىنىڭ ساراپشىسى, اۋداندىق شىعارماشىلىق توپتىڭ مۇشەسى ەكەن. ونەگەلى ۇستازدار وتباسىندا 2 ۇل, 3 قىز ءوسىپ كەلەدى. ايتا كەتەيىك, 2016 جىلى ءدال وسى قازتالوۆ اۋدانىنان بيعاليەۆتار وتباسى دا ۇزدىك شىققان بولاتىن.
بايقاۋ قورىتىندىسى بويىنشا تەرەكتى اۋدانىنان كەلگەن جۇماعاليەۆتەر وتباسى – 2 ورىنعا, جانىبەك اۋدانىنان قاتىسقان يساتاەۆتار وتباسى - 3 ورىنعا يە بولدى. بايقاۋدىڭ سوڭعى كەزەڭڭىنە قاتىسقان بارلىق 13 وتباسى ءتۇرلى اتالىم بويىنشا ماراپاتتالىپ, ديپلومدار مەن سىيلىقتارعا يە بولدى.
سۋرەتتى تۇسىرگەن تەمىربولات توقمامبەتوۆ
باتىس قازاقستان
