بيىلعى وقۋ جىلى ەلوردانىڭ ءبىلىم سالاسى ءۇشىن ايتارلىقتاي جەتىستىكتەرگە تولى بولدى. نۇر-سۇلتان قالاسىنىڭ مەكتەپتەرىندە وقىپ جۇرگەن وقۋشىلار رەسپۋبليكادا عانا ەمەس, حالىقارالىق دەڭگەيدەگى وليمپيادالاردا قازاقستاندىق ءبىلىم سالاسىنىڭ دارەجەسىنىڭ بيىكتىگىن كەزەكتى رەت بۇكىل الەمگە دالەلدەدى. مەكتەپ قابىرعاسىندا وقىپ جۇرگەندە-اق شەتەلدەگى ىرگەلى جوعارى وقۋ ورىندارىنىڭ ەمتيحانىنان سۇرىنبەي ءوتىپ, وقۋعا قابىلدانعاندارى دا بارشىلىق. ەلوردالىق وقۋشىلار جاساپ جاتقان جوبالار شەتەلدىك كومپانيالاردىڭ دا قىزىعۋشىلىعىن تۋدىرادى. بۇگىنگى شارا بارىسىندا وقۋشىلاردىڭ ينتەللەكتۋالدىق جانە تەحنيكالىق جوبالارى قالا باسشىسىنىڭ نازارىنا ۇسىنىلدى.
سولاردىڭ ءبىرى - №73 فيزيكا-تەحنيكالىق مەكتەپ-ليتسەيىنىڭ وقۋشىسى ءامىرجان دۋلاتتىڭ جوباسى. ول مۇمكىندىگى شەكتەۋلى ادامدارعا ارنالعان اۆتوماتتاندىرىلعان امبەباپ قۇرىلعىسىن جاساپ شىققان. وقۋشىنىڭ ارباسىنىڭ قۇنى قولجەتىمدى, ساتىلىمداعى باعاسى 80 مىڭ تەڭگەنى قۇرايدى. باقىت سۇلتانوۆ اتالعان اربانى جاساعان تالانتتى جاسقا ريزاشىلىعىن ءبىلدىرىپ, ونىڭ قۇرىلعىسىن يندۋستريالىق پاركتە جاساۋعا قاراستىراتىنىن جەتكىزدى. بۇل ەلورداداعى مۇمكىندىگى شەكتەۋلى جانداردىڭ ماسەلەسىن شەشۋگە سەپتىگىن تيگىزەتىن جوبا ەكەندىگى ايتىلدى.
كەزدەسۋگە كەلگەن تالانتتى وقۋشىلاردىڭ ءبىرى - №6 گيمنازيانىڭ وقۋشىسى رادومير رومانوۆ. رادومير رەسەيدىڭ ءبىرىنشى ارناسىندا كورسەتىلەتىن «بارىنەن دە كۇشتى» باعدارلاماسىنا قاتىسىپ, ەرەكشە ەستە ساقتاۋ قابىلەتىمەن كورەرمەندەردى تاڭعالدىرعان. وقۋشى الەمگە تانىمال تۇلعالاردىڭ ءومىربايانىن مۇدىرمەي جاتقا ايتادى. اباي قۇنانباەۆ, شوقان ءۋاليحانوۆ, جامبىل جاباەۆتان باستاپ ستيۆ دجوبسقا دەيىن تاريحتا ەسىمى قالعان كوپتەگەن تۇلعالاردىڭ ءومىرجولىن ەستە ساقتاپ العان.
№20 مەكتەپتىڭ وقۋشىسى, بلوگەر اقسۇلۋ بەكتاسوۆا تىكەلەي ەفيردە قالا باسشىنا سۇراق قويۋ مۇمكىندىگىنە يە بولدى.
«بۇگىندە مەندە 3 مىڭ جازىلۋشى بار. سوندىقتان سىزگە تىكەلەي ەفيردە سۇراق قويعىم كەلىپ وتىر. ەلوردا تۇرعىندارىنىڭ ءومىر ساپاسىن جاقسارتۋ ءۇشىن كوپتەگەن باعدارلامالار قولعا الىندى. جاقىن ارادا تاعى قانداي جاقسىلىقتار بولادى؟», - دەدى.
كەزدەسۋگە شاقىرتۋ العان 120 بالانىڭ ارقايسىسى ەلىمىزدىڭ وركەندەپ وسۋىنە وزىندىك ۇلەسىن قوسۋعا اتسالىساتىن جانە جارقىن بولاشاعىنا ءساتتى قادام جاساعان وركەندەر. ولار ب.سۇلتانوۆتان مەكتەپ قابىرعاسىنداعى ساتتەردەن ەستەلىگىمەن ءبولىسۋدى سۇرادى.
ب.سۇلتانوۆ رەسپۋبليكالىق فيزيكا-ماتەماتيكا مەكتەبىنە ەمتيحان كەزىندە ارحيمەد زاڭىن ۇمىتىپ, وقۋ ورنىنا تۇسە الماي, كەلەسى سىندا عانا ءوتىپ, قابىلدانعانىن ەسكە الدى. سونىمەن قاتار بۇل ءبىلىم وشاعىندا تەك ماتەماتيكا مەن فيزيكامەن شەكتەلمەيتىنىن, تاريح, بيولوگيا مەن باسقا دا گۋمانيتارلىق پاندەردىڭ تەرەڭدەتىلىپ وقىتىلاتىنىن ءتۇسىندىردى.
«بيولوگيا ءپانىنىڭ مۇعالىمى بىردە «3» دەگەن باعا قويدى. سوندا مەن «بىزگە بيولوگيانىڭ كەرەگى نە, ءبىز فيز-ماتپىز عوي» دەپ قارسىلىق ءبىلدىردىم. مۇعالىم مەنى تىڭداپ بولعان سوڭ «رفمم تۇلەكتەرى بارلىق پاننەن ۇزدىك بولۋى كەرەك» دەگەنى ەسىمدە. سوندىقتان رفمم جان-جاقتى, بارلىق ءپاندى تەرەڭدەتىپ وقىتاتىن ءبىلىم ورداسى ەكەنىن ءبارىمىز جادىمىزدا ساقتاپ الدىق», - دەدى ب.سۇلتانوۆ.
قالا اكىمى ءوزى دە ءبىر كەزدەرى ءدال بۇگىنگى وقۋشىلار سياقتى بولعانىن تىلگە تيەك ەتىپ, سەندەر الدىڭعى تولقىن اعالاردان دا اسىپ تۇسەسىڭدەر, باعىندىرار بيىكتەرىڭ الدا دەگەن سەنىمىن جەتكىزدى. سوندىقتان ەرىنبەي, جالىقپاي ەڭبەكتەنۋ, ۇزدىكسىز ءبىلىم الۋ - باستى شارت دەي كەلە, قازىر ادام كاپيتالىنىڭ قۇنى ولشەۋسىز ەكەنىن ەسكە سالدى.
«بۇگىن استانانىڭ مەرەيىن اسىرىپ جۇرگەن سىزدەرمەن كەزدەسۋىم مەنى قۋانىشقا بولەپ وتىر. ەلوردالىق وقۋشىلار كومانداسى 13 جىل قاتارىنان مەكتەپ پاندەرى بويىنشا رەسپۋبليكالىق وليمپيادا مەن عىلىمي جارىستاردا «ۇزدىك كوماندا» اتاعىن يەلەنىپ كەلەدى. ءبىزدىڭ بالالاردىڭ قورجىنىندا 412 مەدال بار. بۇل – ۇلكەن جەتىستىك. الداعى تاڭدا دا وسى بيىكتەن كورىنىپ, وقۋدا وزات, ومىردە تابىستى بولۋلارىڭىزعا تىلەكتەسپىن», – دەدى قالا اكىمى.
كەزدەسۋدىڭ رەسمي بولىگى قورىتىندىلانعان سوڭ, وقۋشىلار قالا باسشىسىمەن ۇزاق اڭگىمەلەسىپ, فوتوعا ءتۇستى.
