23 مامىر، 2019

كۇرشىم تۇرعىندارى ەندى ءسۇتتى سىرتتان تاسىمايدى

895 رەت كورسەتىلدى

كۇرشىم اۋدانىندا سوڭعى 30 جىلدا ءسۇت ءوندىرۋ جانە وڭدەۋ ءىسى جۇرگىزىلمەگەن ەكەن.

شەكارا شەبىندە، وبلىس ورتالىعىنان جىراقتا جاتقان كۇرشىم اۋدانىنىڭ ەڭ وزەكتى ماسەلەسى – حالىق سانىنىڭ ازدىعى. بۇدان 20 جىل بۇرىن كۇرشىم مەن مارقاكول اۋداندارى بىرىكتىرىلگەندە مۇنداعى حالىق 50 مىڭنان اسىپ جىعىلسا، بۇگىندە 20 مىڭنان ازەر اسادى. ارينە، حالىق سانىن ازايتپاۋدىڭ ءبىر جولى – جۇرتتى جۇمىسپەن قامتۋ.

اۋىلدا ءسۇت زاۋىتى اشىلدى

 

جاقىندا كۇرشىم اۋدانىنىڭ قاراتوعاي اۋىلىندا شاعىن ءسۇت زاۋىتى اشىلدى. زاۋىتتىڭ ىسكە قوسىلۋى العاباس پەن سارىولەڭ اۋىلدارىندا ءسۇت قابىلداۋ بەكەتتەرىنىڭ اشىلۋىنا سەبەپ بولىپتى. «باسقا اۋىل تۇرعىندارىنان ءسۇت قابىلدايتىن ارنايى كولىكتەرىمىز بار. 40 توننالىق توڭازىتقىش جۇمىس ىستەپ تۇر. ەندى تۇرعىندار وزدەرىندە بار ءسۇتتى 80-100 تەڭگەدەن وتكىزىپ، قوسىمشا تابىس تابادى. قازىر ءار سيىردان كۇنىنە 15 ليتر ءسۇت الامىز، ساۋىلعان ءسۇت زاۋىتتا وڭدەلەدى»، – دەيدى اۋىلدا زاۋىت اشىپ، جەرلەستەرىن جۇمىسپەن قامتۋدى جوسپارلاپ وتىرعان «ارىن» شارۋا قوجالىعىنىڭ باسشىسى باقىتجان بايمۇحامبەتوۆ.

ازىرگە ءسۇت، ايران، ىرىمشىك، قۇرت، كىلەگەي سياقتى 8 ءتۇرلى تاۋار شىعارىپ، تاۋلىگىنە 2 توننا ءسۇت ءوندىرۋدى الدارىنا ماقسات قىلىپ قويعان شارۋا قوجالىعىنىڭ ونىمدەرى جاقىن ارادا اۋدانداعى بالاباقشا، مەكتەپ، اسكەري ءبولىم، اۋرۋحانا سياقتى الەۋمەتتىك نىساندارعا، بارلىق دۇكەن سورەلەرىنە تۇسە باستايدى. ەندى كۇرشىم تۇرعىندارى وسكەمەننەن كەلەتىن باعاسى 400-500 تەڭگە شاماسىنداعى ءسۇت ونىمدەرىن ەمەس، وزدەرىندە شىعاتىن باعاسى 220-250 تەڭگەلىك ءسۇت ونىمدەرىن ساتىپ الاتىن بولادى. «ءبىزدىڭ ءسۇت ونىمدەرى تابيعي، ەشقانداي قوسپاسىز، مايلىلىعى 2،5، 3،2 %. ازىرگە ساتىلىمعا شىققان جوق، قۇجاتتار دايىندالىپ جاتىر»، دەيدى باقىتجان بايمۇحامبەتوۆ.

شارۋا قوجالىعى 2 جىل بۇرىن شۇجىق، بۇقتىرىلعان ەت شىعاراتىن تسەح اشىپتى. مۇندا كۇنىنە 250 كەلى شۇجىق پەن 4800 دانا كونسەرۆى جاسالادى ەكەن. «ەشقانداي قوسپاسىز، تازا ەتتەن جاسايمىز. شۇجىعىمىز حالال. دۇكەندەردە ساۋدالاناتىن تاۋارلارعا قاراعاندا الدەقايدا ارزان. ءبىر كەلىسى 1200 تەڭگە اينالاسىندا. مەملەكەتتىڭ قولداۋىمەن كاسىپورىندى تولىق جاڭعىرتۋعا مۇمكىندىك الدىق، زاماناۋي جاڭا قۇرىلعىلارمەن تولىقتىرىپ، قولدا بار جابدىقتاردى جەتىلدىردىك»، دەيدى اتالعان تسەح جەتەكشىسى ەراسىل بايمۇحامبەتوۆ.

جۋىقتا سارىولەڭ اۋىلىنداعى «تىرشىلىك» شارۋا قوجالىعىنىڭ يەسى باقىتجان مياسەلەۆ 50 ورىندىق تاۋارلى-ءسۇت فەرماسىن اشىپتى. بىلتىر «سىباعا» باعدارلاماسى ارقىلى 25 ميليون تەڭگە نەسيە الىپ، وعان ءوز قاراجاتىن قوسىپ، رەسەيدەن اسىل تۇقىمدى 42 سيممەنتال سيىرىن ساتىپ اكەلگەن ازامات الداعى ۋاقىتتا ءسۇت وڭدەۋ زاۋىتىن اشقىسى كەلەتىنىن ايتادى.


1000 باسقا ارنالعان مال بورداقىلايتىن 2 كەشەن سالىندى


كۇرشىم اۋدانىنىڭ اكىمى دۋلات قاجانوۆ بىلتىر قاراشا ايىندا بىزگە بەرگەن شاعىن سۇحباتىندا: «جوسپار كوپ. ماڭايداعى مەكتەپتەردى تازا، ەكولوگيالىق ونىمدەرمەن قامتاماسىز ەتۋ ءۇشىن ءسۇت تاۋارلى فەرمالارىن اشىپ، جانىنان شاعىن تسەحتار قۇرىپ، پاستەرلەنگەن ءسۇت، ماي، ىرىمشىك شىعارساق پا دەيمىز. كووپەراتيۆ جۇمىستارىن جانداندىرۋ دا ويىمىزدا بار. جاسىراتىنى جوق، قازىر ەشكىم مال باققىسى كەلمەيدى، قويا بەرەدى. ءبىز تۇرعىندارعا: «كووپەراتيۆ اشامىز، مالدىڭ ءبارىن سوندا قوساسىزدار. ءسۇتتى ساۋاسىزدار، كووپەراتيۆ توراعاسىنا وتكىزەسىزدەر. اقشالارىڭىزدى كۇندەلىكتى تولەپ وتىرادى» دەپ ءتۇسىندىرىپ جاتىرمىز. نەگىزى اۋداننىڭ بارلىق اۋىلدىق وكرۋگتەرىندە كووپەراتيۆتەر اشىلعان. بىراق جۇمىستارى دۇرىس جۇرمەي تۇر. كەلەسى جىلى اباي مەن بۋراباي اۋىلدارىندا مىڭ باسقا ارنالعان ەكى مال بورداقىلاۋ الاڭىن اشۋدى جوسپارلاپ وتىرمىز. دۇرىس، ءتيىمدى پايدالانبايتىن جەرلەردى مەملەكەتكە قايتارىپ، ول جەرلەردى ءسۇت تاۋارلى فەرمالارىن اشۋعا، بورداقىلاۋ الاڭدارىن سالۋعا بەرسەك دەيمىز» دەپ جوسپار-جوبالارىمەن بولىسكەن ەدى. جارتى جىلدىڭ كولەمىندە ويعا العان ىستەر اقىرىنداپ جۇزەگە اسا باستاعان سەكىلدى. دۋلات قاجانوۆتىڭ ايتۋىنشا، كۇرشىم اۋدانىندا سوڭعى 30 جىلدا ءسۇت ءوندىرۋ جانە وڭدەۋ ءىسى جۇرگىزىلمەگەن ەكەن. «بۇل جۇمىس اۋدانىمىزدا قازىر جولعا قويىلۋدا. 100 جانە 50 باسقا ارنالعان 3 ءسۇت تاۋارلى فەرما جۇمىسىن باستادى. ەكى ءسۇت قابىلداۋ پۋنكتى اشىلدى. شيكىزات قاراتوعاي اۋىلىنداعى ءسۇت وڭدەۋ زاۋىتىندا وڭدەلەدى. الداعى ۋاقىتتا تۇرعىنداردان ءسۇت قابىلداۋ جوسپاردا بار. اۋىلداعى اعايىن ءسۇت ساتۋ ارقىلى قوسىمشا تابىس كوزىنە كەنەلەدى. سونداي-اق، اۋدانىمىزدا 1000 باسقا ارنالعان اسىل تۇقىمدى مال بورداقىلايتىن 2 كەشەن سالىندى. كەشەن تولىعىمەن اۆتوماتتاندىرىلعان. مالدىڭ جەم-ءشوبىن بەرۋدى قوسا العاندا، ونى سويۋ دا اۆتوماتتى تۇردە جۇرگىزىلمەك. وعان كۇرشىم، قاراتوعاي، اباي اۋىلدارىنىڭ 26 قوجالىعى مال باسىن بىرىكتىرەدى.وسى جانە وزگە دە اۋقىمدى شارالار ارقىلى قوسىمشا جۇمىس ورىندارى اشىلۋدا. اۋدانىمىزدى گۇلدەندىرۋ ماقساتىندا ىسكەر ازاماتتارمەن تىزە قوسىپ جۇمىستى ودان ءارى جالعاستىراتىن بولامىز. اۋدان تۇرعىندارىن وزىمىزدە وندىرىلەتىن تابيعي تازا ونىمدەردى تۇتىنۋعا شاقىرامىن. جاقىندا ءوز ءونىمىمىزدى دۇكەن سورەسىنەن كورە الاسىزدار. باعاسى دا سىرتتان كەلەتىن تاۋارلاردان الدەقايدا ارزان»، دەيدى اۋدان اكىمى.

شىعىس قازاقستان وبلىسى،

كۇرشىم اۋدانى

سوڭعى جاڭالىقتار

ۇرلانعان 28 كولىك تابىلدى

وقيعا • بۇگىن، 15:11

اتىراۋدا 23 ادامدى شايان شاققان

ايماقتار • بۇگىن، 13:35

سپورت جاڭالىقتارىنا شولۋ

سپورت • بۇگىن، 09:11

سۋرەتشىلەر ءۇيى اشىلدى

ايماقتار • بۇگىن، 09:08

بال بۇلاق بولىپ اقتى

ايماقتار • بۇگىن، 09:07

وڭايلىقپەن ەم قونبايدى

مەديتسينا • بۇگىن، 09:05

بارەكەلدى، ۆيكتوريا!

سپورت • بۇگىن، 09:02

ۇقساس جاڭالىقتار