دوداعا قازاقستان, رەسەي جانە وزبەكستاننان 500-گە جۋىق سپورتشى قاتىستى. ەلوردالىق كوماندا ساپىندا بارلىق مۇگەدەكتىك ءتۇرى بويىنشا ءارتۇرلى جاستاعى پارا-كاراتەشىلەر كۇش سىناستى. ەرەجەگە سايكەس, جەكپە-جەكتەرگە تەك دەنساۋلىعى بويىنشا شەكتەۋ قويىلماعان قاتىسۋشىلار عانا جىبەرىلدى.
شارا ۇيىمداستىرۋشىلارى – نۇر-سۇلتان قالاسىنىڭ مادەنيەت جانە سپورت باسقارماسى, WKF كاراتە-دو جانە ءداستۇرلى جاۋىنگەرلىك ونەر فەدەراتسياسى مەن «اسىل بالا» قاۋىمداستىعى. تۋرنيرگە پارا-كاراتەدەن الەم چەمپيونى, رف بالالار قۇقىعى جونىندەگى قوعامدىق پالاتاسىنىڭ مۇشەسى, پروتەزبەن 42 شاقىرىم جۇگىرگەن مارافونشى سەرگەي بۋرلاكوۆ قوناق رەتىندە شاقىرىلدى. تانىمال سپورتشى ءوز ونەرىن كورسەتىپ, ەلوردالىق مۇگەدەكتىگى بار بالالارعا ارنالعان بالالار-جاسوسپىرىمدەر سپورت مەكتەبىنىڭ سپورتشىسى ءاسيا تۇرسىنوۆاعا «جەڭىسكە دەگەن جىگەرى ءۇشىن» ارنايى سىيلىقتى تابىستادى.
