– مەدياتسيا – اسسامبلەيا اينالىساتىن ماڭىزدى ءىستىڭ ءبىرى. مەدياتور – تاۋەلسىز تۇلعا. مەدياتسياعا قاتىسۋشى تاراپتار مەدياتوردىڭ ءتاجىريبەسىنە, ءبىلىمى مەن ىسكەرلىگىنە سۇيەنە وتىرىپ, ءوزارا ءتيىمدى شەشىمگە ءوز بەتىنشە كەلەدى, – دەيدى «قوعامدىق كەلىسىم» كمم مەدياتسيا كابينەتىنىڭ مەڭگەرۋشىسى ءسانيا ساتاليەۆا.
قازىرگى تاڭدا قازاقستان حالقى اسسامبلەياسىنىڭ جانىنداعى مەدياتسيا كابينەتى 3 رەسپۋبيكالىق جانە 1 جەرگىلىكتى مەدياتسيا ورتالىقتارىمەن تىعىز قارىم-قاتىناستا جۇمىس ءجۇرگىزىپ وتىر. بۇل ورتالىقتاردىڭ كاسىبي مەدياتورلارى مەن قازاقستان حالقى اسسامبلەياسىنىڭ قوعامدىق مەدياتورلارى تەگىن مەدياتسيا راسىمدەرىن ءجۇرگىزەدى. وبلىس تۇرعىندارىن اقپاراتتاندىرۋ ماقساتىندا تەلەارنادان ارنايى «جۇگىرتپە جول» بەرىلىپ وتىرادى. ءوز جۇمىستارىن حالىق جانە ۇجىم اراسىنا «اشىق ەسىك كۇندەرى» قوعامدىق قابىلداۋ, كوشپەلى اقپارات-ناسيحاتتىق جۇمىستارى, مەدياتورلار وتىرىسى, سەمينار-ترەنينگ ءجانە دوڭگەلەك ۇستەل فورماتىندا جۇرگىزەتىن مەدياتورلار اۋدان, قالالاردى ارالاپ قىزمەت ەتەدى. مەدياتسيا باعىتىنداعى جۇمىستاردى ودان ءارى جانداندىرۋ ءۇشىن قازاقستان حالقى اسسامبلەياسىنىڭ جانىندا قۇرىلعان كوشپەلى اقپاراتتىق-ناسيحاتتىق توپتار ەلدى مەكەندەردى ارالاپ, سونىڭ ىشىندە جاڭاوزەن قالاسى, قۇرىق كەنتى, ماڭعىستاۋ, مۇنايلى جانە بەينەۋ اۋداندارىنا ءىسساپارمەن باردى.
مەدياتسيا كابينەتىنە كەلۋشىلەر سانىنىڭ كوبەيۋى ەل اراسىندا مەدياتسياعا دەگەن قاجەتتىلىكتىڭ بار ەكەندىگىن اڭعارتادى. كەلۋشىلەردىڭ شەشىمىن تابا الماي جۇرگەن نەگىزگى ماسەلەلەرى كرەديتتىك ۇيىمدارعا, وتباسى پروبلەمالارىنا, ساقتاندىرۋ مەكەمەلەرىنە, ەڭبەك داۋلارى مەن جالاقى تولەمەۋگە, ءبىلىم بەرۋ جانە دەنساۋلىق ساقتاۋ مەكەمەلەرىندەگى كەيبىر ماسەلەلەرگە قاتىستى بولىپ كەلەدى. مەدياتسيا كابينەتىنە 2016 جىلى – 56 ادام, 2017 جىلى – 301, ال 2018 جىلى 443 ادام كەلگەن.
– قازىر جاسوسپىرىمدەردىڭ پروبلەمالارى ەرەسەكتەردىڭ الاڭداۋشىلىعىن تۋدىرادى, سونداي-اق مەكتەپ وقۋشىلارى اراسىندا جانجالدار بولماي تۇرمايدى. ءوڭىرلەردەگى مەكتەپتەر مەن كوللەدجدەردە وقيتىن جاسوسپىرىمدەر اراسىندا ءتارتىپ بۇزۋشىلىق تۇرلەرىنىڭ بايقالۋىنا بايلانىستى ءبىلىم بەرۋ ۇيىمدارىنىڭ جانە قحا مەدياتسيا كابينەتتەرى ماماندارىنىڭ بىرلەسكەن مەدياتسيا دامىتۋ جۇمىستارى ۇيىمداستىرىلۋدا, – دەيدى ماڭعىستاۋ وبلىسى قازاقستان حالقى اسسامبلەياسى حاتشىلىعىنىڭ مەڭگەرۋشىسى گ.يسمۋرزينا.
الداعى ۋاقىتتا جوبا اياسىندا كاسىبي مەدياتورلار اتا-انالارعا, مەكتەپ پسيحولوگتارىنا, تاربيە ىسىمەن اينالىساتىن ماماندارعا ارنايى سەمينارلار ۇيىمداستىرىپ, داۋلار مەن كيكىلجىڭدەردىڭ الدىن الۋ ادىستەمەلەرىن ءتۇسىندىرۋدى جوسپارلاۋدا. وقۋ ورىندارىنان بولەك اۋرۋحانالار مەن ەمحانالاردا, وزگە دە ۇجىمداردا ءتۇسىندىرۋ, كيكىلجىڭدەردى بولدىرماۋ باعىتىنداعى جۇمىستار جۇرگىزىلۋدە.
ماڭعىستاۋ وبلىسى
