ايماقتار • 23 مامىر، 2019

الاكول دەمالۋشىلاردى قارسى الۋعا دايىن با؟

872 رەت كورسەتىلدى

جاز تۋسا، كوپ جۇرتتىڭ سۋى شيپالى، ايدىندى الاكولگە قاراي الىپ ۇشاتىنى بەلگىلى. ءيا، بىرەر ايدىڭ كولەمىندە كول جاعاسىندا قىزۋ تىرشىلىك، قاربالاس شاق باستالادى.

سوڭعى جىلدارى مۇن­دا­عى ينفراقۇرىلىمنىڭ جەت­كى­لىكسىز­دىگىنە، جولدىڭ ناشار­لى­عىنا قاراماستان الاكولگە كەلۋ­­شى­لەر­دىڭ قاتارى كوبەيە تۇسكەنى ءمالىم. كولدىڭ شىعىس قازاقستانداعى بولىگىن ابات­تان­دى­رۋعا كەيىنگى ءۇش-ءتورت جىل كولەمىندە وبلىس اكىمدىگى تاراپىنان قوماقتى قارجى ءبولىندى.

ەل پرەزيدەنتى قاسىم-جومارت توقاەۆ جاقىندا شىعىس قازاق­ستان جانە الماتى وبلىستارىنا جاسا­عان جۇمىس ساپارى بارىسىندا الاكولدىڭ رەسپۋبليكاداعى 10 نەگىزگى تۋريستىك ورتالىقتىڭ قاتارىنا ەنگەنىمەن، تۋريستەرگە ساپاسىز قىزمەت كورسەتىلىپ وتىرعانىن اتاپ ءوتىپ: «وسىعان باي­لانىستى ەكى وبلىستىڭ اكىم­دەرىنە جەرگىلىكتى جولداردى ءجون­دەۋ، قىزمەت كورسەتۋ ساپا­سىنىڭ دەڭگەيىن كوتەرۋ ماسە­لە­لە­رىن تەز ارادا شەشۋدى تاپسىرامىن»،  دەپ ناقتى تاپسىرما جۇكتەگەن ەدى.

جۋىق­تا وبلىس اكىمدىگىندە ايماق باسشىسى دانيال اح­مە­توۆ­تىڭ قا­تىسۋىمەن وتكەن جيىن­دا الاكولدىڭ جاعاسىنداعى قىز­مەت­­­تەردىڭ ساپاسىن جاقسارتۋ ماسە­لە­لە­رى جان-جاقتى تالقى­لان­دى.

پويىز 1 ماۋسىمنان جۇرە باستايدى

الاكولگە بارعىسى كەلەتىن جۇرتتىڭ كوڭىلىن الاڭداتاتىن اۋەلگى ماسەلە – جول. وبلىستىق تۋريزم باسقارماسىنىڭ باسشىسى مارات قاباقوۆتىڭ ايتۋىنشا، قازىرگى ۋاقىتتا «تاسكەسكەن-باقتى» باعىتىنداعى جولدىڭ 0-20، «الماتى-وسكەمەن» باعى­تىن­داعى جولدىڭ 615-967، 971-1017 شاقىرىمدارىندا جوندەۋ جۇ­مىس­تارى جۇرگىزىلىپ جاتىر. «بيىل جاعالاۋعا دەيىنگى اۆتو­كولىك جولىنىڭ جوندەۋ جۇ­مىستارى اياقتالۋى ءتيىس. 2019 جىلى تەمىر جول جانە اۋە رەيس­تە­رىنە 122 ميلليون تەڭگە­نىڭ سۋبسيدياسىن ءبولۋ قاراس­تى­رىلعان. قازىر «الماتى – ءۇرجار»، «نۇر-سۇلتان – ءۇرجار» جانە «وسكەمەن – سەمەي – ءۇرجار» باعىتتارىنا ۇشاقپەن قاتىناۋعا بولادى. وسكەمەن مەن سەمەيدەن جالاڭاشكول ستانساسىنا دەيىن جۇرەتىن پويىزدار 1 ماۋسىمنان باستاپ قايتا جولعا شىعا­تىن بولادى. پويىز ەكى قالادان دا تاق كۇندەرى اتتانىپ، جۇپ كۇندەرى كەرى قايتىپ وتىرادى. ياعني، قالالاردان 1 ماۋسىمدا، ال الاكولدەگى «دوستىق» ستانساسىنان 2 ماۋسىمدا جۇرەدى. پويىز جاز بىتكەنشە، ياعني تامىزدىڭ سوڭىنا دەيىن ءجۇرىپ تۇرادى. جول ءجۇرۋ ۋاقىتى – 17-18 ساعات»، دەيدى باسقارما باسشىسى.

جيىندا وبلىس اكىمى 18 ساعات­تىڭ دەمالۋشىلار ءۇشىن تىم ۇزاق ەكەندىگىن ايتىپ، جولاۋشى كولىگى جانە اۆتوموبيل جولدارى باسقارماسىنا كەستەنى قايتا قاراس­تىرىپ، جولعا كەتەتىن ۋا­قىت­تى قىسقارتۋدى تاپسىردى.

وبلىستىق تۋريزم باسقارماسى وكىلىنىڭ سوزىنە سەنسەك، الداعى ءتورت جىلدا الاكولدىڭ جاعالاۋىندا سۋ، كارىز قۇبىرلارى سالىنىپ، ەلەكتر جەلىلەرى تارتىلىپ، ەمدىك قاسيەتى بار رودوندىق سۋعا ارنال­عان ارنايى قۇبىر توسەلەدى. ەڭ ماڭىزدىسى، سۋ شايۋىنىڭ الدىن الۋ ءۇشىن الاكولدىڭ جاعاسىن بەكىتۋ جۇمىستارى ودان ءارى جالعا­سادى، جولاۋشىلار اعىنىن ارت­تىرۋ ماقساتىندا ءۇرجار اۋى­لىن­داعى اۋەجايدىڭ ۇشۋ-قونۋ الاڭى جاڭارتىلادى.

الاكولدى اباتتاندىرۋ با­عى­تىن­داعى جۇمىستار دا اۋقىم­دى. بيىل دەمالىس ساياباعى كەڭ­ەي­تى­لىپ، جاياۋ جۇرگىنشىلەرگە جانە ۆەلوسيپەدشىلەرگە ارنالعان جول­دار سالىنىپ، تاكسي تۇراعى ءجون­دەلمەك. تۋريستەردىڭ قاۋىپ­سىز­دىگىن قامتاماسىز ەتۋ ءۇشىن اعىمداعى جىلى پوليتسەيلەردىڭ سانى ەكى ەسەگە كوبەيىپ، قوسىمشا 60 باقىلاۋ كامەراسى ورناتىلماق (قازىر ىستەپ تۇرعانى – 80). سونى­مەن قاتار قايىقتارعا ارنايى تۇراق جاسالىپ، جاعالاۋعا كولىك ينسپەكتسياسى قاداعالاۋ ءجۇر­گىز­بەك.

 

قىزمەت ساپاسىن جاقسارتۋ قاجەت

اكىم­دىكتە وتكەن جيىندا وبلىس­تىق تۋريزم باسقارماسىنىڭ باسشىسى الداعى جىلى «بارلىق-اراسان» – الاكول كولى» وبلىس­تىق ماڭىزداعى اۆتوجولىنا ورتا­شا جوندەۋ جۇمىستارى جۇرگى­زى­لە­تىندىگىن ايتقاندا ايماق باس­شىسى «بارلىق-اراسان» شيپاجايىنىڭ جۇمىسىنا قا­تىس­تى نارازىلىعىن ءبىلدىردى. «الاكولگە كەلۋشى تۋريستەردىڭ سانى جىل ساناپ ارتىپ كەلەدى. البەتتە، بۇعان ءبىز قۋانىشتىمىز. بىراق جولداردى جوندەپ، قال­پىنا كەلتىرۋ عانا ازدىق ەتەدى، جاعالاۋدا ۇسىنىلاتىن قىز­مەت­تەردىڭ ساپاسى جوعارى بول­ۋى شارت. ماسەلەن، «بارلىق-اراسان» شيپاجايى جەكەمەنشىك كوم­پانيانىڭ يەلىگىندە، ولار دەما­لىس ورنىنىڭ دامۋىنا ەشقان­داي قارجى قۇيىپ وتىرعان جوق. شيپاجايدىڭ تازالىعىن جەكە­مەن­شىك كومپانيا تەكسەرەدى. ونىڭ ءمىنسىز ەكەنىنە ەشكىم كەپىل­دىك بەرمەيدى. ەمدەلۋگە بارعاندار اۋىرىپ قايتپاسىن دەسەك، ول جاقتى باقىلاۋدا ۇستاعانىمىز ءجون. ول جەردەگى 1917 جىلعى سارعايىپ كەتكەن ۆاننانى دا بىلە­مىن» دەگەن دانيال احمەتوۆ سانيتارلىق-ەپيدەميولوگيالىق قىزمەت پەن دەنساۋلىق ساقتاۋ باسقارماسىنا نىسانعا باقىلاۋ جۇرگىزۋدى تاپسىردى.

جيىندا بيىل الاكول جاعا­سىندا 8 دەمالىس بازاسى ىسكە قوسىلاتىنى، سونداي-اق «كەر­ۋەن پلازا» تۋريستىك كەشەنى، «چاي­كا» ساۋىقتىرۋ كەشەنى جانە «كۇنشىعىس الاكول» مادەني-كوڭىل كوتەرۋ كەشەنى قۇرىلىستارىنىڭ باستالعانى تۋرالى دا ايتىلدى.

 

شىعىس قازاقستان وبلىسى

 

سوڭعى جاڭالىقتار

نار نارىمبەتوۆ ەدى...

قازاقستان • كەشە

«وميكرون» شتامى وقشاۋلايدى

كوروناۆيرۋس • كەشە

پورترەتتەگى پاراسات

ەلباسى • كەشە

ۇقساس جاڭالىقتار