ايماقتار • 22 مامىر، 2019

قاراعاندىلىق ايشا ابەنوۆا الەمنىڭ كىشكەنتاي ارۋى اتاندى

تۇركيانىڭ بودرۋم قالاسىندا وتكەن Little Miss World-2019 («الەمنىڭ كىشكەنتاي ارۋى») اتتى قىز بالالار اراسىنداعى سۇلۋلىق بايقاۋىندا قاراعاندىلىق ايشا ابەنوۆا باس جۇلدەنى جەڭىپ الدى.

قايرات ءابىلدا

كىشكەنتاي ارۋلاردىڭ بۇل سايىسىندا 7-12 جاس ارالىعىنداعى 30 ۇمىتكەر باق سىناعان بولاتىن. مىنە، وسى سىندا سۇرىنبەي وتكەن ايشا «الەمنىڭ كىشكەنتاي ارۋى» اتاعىنان باسقا Best of the best («ۇزدىكتەردىڭ ۇزدىگى) جانە Miss Talent («تالانتتى ارۋ») جۇلدەلەرىن دە جەڭىپ الدى.

بودرۋم قالاسىنداعى بايقاۋدا ايشا قىز لەزگينكا بيىمەن كورەرمەن قاۋىم مەن قازىلار القاسىن ءتانتى ەتكەن. سونىمەن قاتار، ول ۇلتتىق كويلەككە مالىنىپ، تۋعان ەلى – قازاقستاندى جۇرتشىلىققا وتە اسەرلى ەتىپ تانىستىرعان. ودان كەيىن ايشا قازاقتىڭ دارحان دا جومارت كوڭىلىن ساحنادا پاش ەتىپ، كونكۋرسقا قاتىسۋشىلاردىڭ بارىنە ەستەلىك سىيلىق تارتۋ ەتىپتى.

– ايشا ءبىزدىڭ ءۇمىتىمىزدى تولىعىمەن اقتادى. الداعى ۋاقىتتا ونىمەن بىرىگىپ، كوپتەگەن جوسپار قۇرامىز با دەگەن ويىمىز بار، – دەيدى Art Line مودەلدىك اگەنتتىگىنىڭ ديرەكتورى ءمادينا احمەتباەۆا.

الەمنىڭ كىشكەنتاي ارۋى اتالعان اگەنتتىكتە 3 جىلدان بەرى كاسىبي مامانداردان ءدارىس الىپ كەلەدى. ايشا بودرۋمداعى تابىستان بۇرىن دا تالاي بايقاۋعا قاتىسىپ، ماڭدايى جارقىراپ جۇرگەن تالانتتى بالا. مىسالى، ول 2017 جىلى «قاراعاندىنىڭ كىشكەنتاي ارۋى»، ودان كەيىن Mini Miss Grand Prix Russia-2018 اتاقتارىن جەڭىپ العان.

قاراعاندى قالاسىندا دۇنيەگە كەلگەن ايشا ابەنوۆانىڭ جاسى الداعى ايدىڭ 13-ءى كۇنى سەگىزگە تولادى. ول قولى بوس كەزىندە بيمەن اينالىسىپ، فورتەپيانودا ويناعاندى جاقسى كورەدى. كىشكەنتاي ارۋدىڭ اكتەرلىق قابىلەتى دە بار. ايشا استانامىزدىڭ 20 جىلدىعىنا ارنالعان «ءومىر تاريحى» اتتى دەرەكتى فيلمگە تۇسكەن.

قاراعاندى وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز