ازاماتتىق قورعانىس ورگاندارىنىڭ قىزمەتكەرلەرى الدىن الۋ جۇمىستارىن جۇرگىزىپ جاتىر, قالا ايماعىنداعى بارلىق 15 سۋ قويماسى تەكسەرىلدى. تەك ۇشەۋى عانا جۇزۋگە جارامدى دەپ تانىلدى, قالعاندارى ومىرگە قاۋىپتى. قالانىڭ تجد-ءنىڭ ازاماتتىق قورعانىس باسقارماسىنىڭ اعا وفيتسەرى ەلدور رايمبەكوۆتىڭ مالىمەتى بويىنشا نۇرا-ەسىل ارناسى, ەسىل وزەنىنىڭ اعىنى, سونىمەن قاتار اقبۇلاق جانە سارىبۇلاق وزەندەرىنىڭ اعىنى جۇزۋگە جارامسىز. قالاداعى سۋ بۇرقاقتارى دا جۇزۋگە ارنالماعان. رەديسسون قوناق ءۇيىنىڭ ماڭىنداعى ورتالىق قالالىق جاعاجايدا, سونىمەن قاتار «تري پەسكاريا» جانە «كۇيگەن جار» دەمالىس ورىندارىندا عانا شومىلۋعا رۇقسات ەتىلگەن.
«رۇقسات ەتىلمەگەن جەرلەرگە ءبىز تىيىم بەلگىلەرىن, اقپاراتتىق ستەندتەر ورناتامىز. ستاتيستيكا بويىنشا بىزدە قايعىلى جاعدايلار ءدال وسى شومىلۋعا رۇقسات ەتىلمەگەن جەرلەردە تىركەلەدى», دەدى ەلدور رايمبەكوۆ.
بالالاردىڭ قاتىسۋىمەن بولاتىن قايعىلى جاعدايلاردىڭ سانىن ازايتۋ ءۇشىن جازعى دەمالىستىڭ الدىندا قالانىڭ بارلىق مەكتەپتەرىندە قۇتقارۋشىلار جاتتىعۋ-ساباقتار مەن دارىستەر وتكىزەدى.
«تەك قانا رۇقسات ەتىلگەن ورىنداردا ءجۇزىڭىزدى, سۋ قويمالارىنىڭ جانىندا بالالارىڭىزدى قاراۋسىز قالدىرماۋىڭىزدى, سۋ قويمالارىنىڭ ماڭىندا دەمالعان كەزدە سپيرتتىك ىشىمدىكتەردى قولدانباۋىڭىزدى, سونىمەن قاتار, بالىقشىلاردان بالىق اۋلاۋ كەزىندە قۇتقارۋ جيلەتىن كيۋلەرىن سۇرايمىز», دەپ قورىتىندىلادى ە.رايمبەكوۆ.
