مەكتەپتەرگە ەلەكتروندى وقۋلىقتاردى ەنگىزۋ جونىندەگى قاناتقاقتى جوبا قورىتىندىلاندى

بيىل اقپان ايىندا «الماتىكىتاپ باسپاسى» www.opiq.kz پلاتفورماسىندا ەلەكتروندى وقۋلىقتاردى ەنگىزۋگە بايلانىستى بايقاۋ جاريالاعان ەدى. بۇل باسپا ەلەكتروندى وقۋلىقتاردى ەنگىزۋدى 2018 جىلى 1 قىركۇيەكتەن باستاپ قازاقستاننىڭ 11 مەكتەبىندە قولعا العان-دى. استانا قالاسىنداعى №85 مەكتەپتە وتكەن العاشقى ساباققا ەلباسى قاتىسىپ، جاقسى باعالاعان بولاتىن.

سونىمەن، بۇگىن بۇل جوبا مارەگە جەتىپ، ونى جىلجىتۋعا اتسالىسقان جەڭىمپاز مۇعالىمدەر مەن وقۋشىلاردى ماراپاتتاۋ ءراسىمى ءوتتى.

ءوز كەزەگىندە ەلىمىزدىڭ 6 وبلىسىنداعى (نۇر-سۇلتان، الماتى قالالارى مەن الماتى، جامبىل، قاراعاندى، تۇركىستان وبلىستارى) 12 مەكتەپتە ەلەكتروندى وقۋلىقتار سىناقتان ءوتتى. بايقاۋ كەزەڭىندە مەكتەپ باسشىلىعى، ۇستازدار، وقۋشىلار مەن اتا-انالار قاۋىمى opiq.kz پلاتفورماسىنداعى ەلەكتروندى وقۋلىقتاردىڭ (ينفورماتيكا، ماتەماتيكا، ادەبي وقۋ) تيىمدىلىگىن  باقىلاپ وتىردى. پيلوتتىق جوباعا 3، 6 جانە 8-سىنىپ وقۋشىلارى قاتىستى.

جالپى بايقاۋعا 350 ۇمىتكەر قاتىسىپ، ناتيجەسىندە «تسيفرلىق تەحنولوگيانى جاقسى مەڭگەرگەن ۇزدىك وقۋشى»، «يننوۆاتسيالىق وقىتۋ يدەياسىن قولداۋشى ۇزدىك مەكتەپ باسشىسى» اتالىمدارى بويىنشا ماراپاتتالدى.

جەڭىمپازداردى سالتاناتتى تۇردە ماراپاتتاۋ راسىمىنە «الماتىكىتاپ باسپاسىنىڭ» پرەزيدەنتى گاۋحار سايماساەۆا، EDTECH.KZ حالىقارالىق ءبىلىم بەرۋ ورتالىعىنىڭ باس ديرەكتورى عاني بەيسەمباەۆ، يۋنەسكو مەكتەپتەرىنىڭ ۇلتتىق كوورديناتورى لەونيد كيم قاتىستى.

وسى ارادا Opiq.kz ەلەكتروندى وقۋلىقتاردى «الماتىكىتاپ باسپاسى» ەستونيالىق AVITA كومپانياسىمەن بىرلەسە وتىرىپ جاساعانىن اتاپ ءوتۋ كەرەك.

Opiq.kz پلاتفورماسىندا ەلەكتروندى وقۋلىقتاردىڭ نەگىزگى مازمۇنىنا كوپتەگەن قوسىمشا ماتەريال، ياعني اۋديو، ۆيدەو، گرافيكا، سلايدتار بەرىلەدى. بۇل ەلەكتروندى وقۋلىقتار بارلىق زاماناۋي قۇرىلعىلارعا  لايىقتالعان (نوۋتبۋك، كومپيۋتەر، سمارتفون، پلانشەت) جانە قوسىمشا باعدارلامالىق قۇرىلعىلاردى قاجەت ەتپەيدى.

تاجىريبە كورسەتكەندەي، ەلەكتروندى وقۋلىقتار وقۋشى مەن مۇعالىمگە عانا ەمەس، اتا-انالار ءۇشىن دە ءتيىمدى. بۇل وقۋلىقتاعى تاپسىرمالاردى بالانىڭ ءبىلىم دەڭگەيىنە لايىقتاپ قۇرۋعا بولادى. ەكىنشى ءبىر ارتىقشىلىعى، وقۋشى وزىنە ۇناعان ءبىر تاقىرىپتى تەرەڭ زەرتتەۋىنە مۇمكىندىك بەرەدى.

ەلەكتروندى وقۋلىقتار كوركەم بەزەندىرىلگەن، مۋلتيمەديالىق قوسىمشاعا باي، ەلىمىزدىڭ مەملەكەتتىك وقۋ ستاندارتى مەن پاندىك باعدارلامالارعا (باستاۋىش جانە ورتا ءبىلىم) تولىق سايكەس كەلەدى دەپ ەسەپتەيدى ماماندار.

سونىمەن، باس جۇلدەگە نۇر-سۇلتان قالاسىنداعى №79 مەكتەپ-ليتسەيىنىڭ ۇستازى ايمان رىسپاەۆا لايىق دەپ تانىلدى. ءبىرىنشى ورىندى الماتى قالاسىنداعى №110 مەكتەپ-گيمنازياسىنان گۋلمەرا روزيەۆا، ەكىنشى ورىندى قاراعاندى قالاسىنداعى №93 مەكتەپ-گيمنازياسىنان ەلەنا مارتەميانوۆا مەن تاراز قالاسىنداعى «ا-Status» مەكتەبىنىڭ مۇعالىمى لاريسا گيلەۆا، ءۇشىنشى ورىندى كەنتاۋ قالاسىنداعى №14 مەكتەپ-گيمنازياسىنان قاماجاي بايسىماقوۆا، نۇر-سۇلتان قالاسىنداعى №62 مەكتەپ-ليتسەيىنەن اياگوز كەنبەيلوۆا مەن الماتى قالاسىنداعى ب.مومىش ۇلى اتىنداعى №131 مەكتەپ- ليتسەيىنىڭ ۇستازى دينارا اليەۆا الدى.