2009 جىلعى جەتىسۋ ءوڭىرىندە وتكەن ءدۇبىرلى دودادا جەرلەستەرىمىز 4 التىن, 1 كۇمىس جانە 2 قولانى يەلەندى. دەسەك تە ءبىر باس جۇلدەسى ارتىق قىتاي ەلىنىڭ وكىلدەرى بىزدەن وزىپ كەتتى. ولاردىڭ ەنشىسىندە – 5 التىن مەن 6 كۇمىس. جەرلەستەرىمىزدىڭ اراسىنان سۆەتلانا پودوبەدوۆا (75 كيلو), تاتيانا حروموۆا (+75 كيلو), ۆلاديمير سەدوۆ (94 كيلو) جانە سەرگەي يستومين (105 كيلو) توپ جارسا, ياكوۆ بەرح (+105 كيلو) كۇمىس الدى. مايا مانەزا (63 كيلو) مەن الماس وتەشوۆ (85 كيلو) قولاعا قول سوزدى. ءۇشىنشى ورىندا – يران (2 التىن+1 كۇمىس+2 قولا).
2011 جىلى قىتايدىڭ تۋنلين قالاسىندا التى جۇلدە العانىمىزبەن التىنشى ورىندى قاناعات تۇتتىق. وعان سەبەپ – التىن جۇلدەنىڭ جوقتىعى. تاتيانا حروموۆا (75 كيلو) مەن ۆلاديمير سەدوۆ (94 كيلو) ەكىنشى ورىندى يەلەنسە, الەكساندرا ابورنەۆا (+75 كيلو), كيريلل پاۆلوۆ (77 كيلو), ۆلاديمير كۋزنەتسوۆ (85 كيلو) جانە سەرگەي يستومين (105 كيلو) ءۇشىنشى ساتىعا تابان تىرەدى. وسى جارىستا ءتورت-اق ەلدىڭ ورەندەرىنە باس جۇلدە بۇيىردى. قىتاي 12 التىندى ولجالاسا, قالعانىن يران, ماكاو جانە وڭتۇستىك كورەيا قۇرامالارى ەنشىلەدى.
2012 جىلى وڭتۇستىك كورەيانىڭ پحەنتحەكەسىندە جەتىنشى ورىنعا تۇراقتادىق. بۇل جولى بۇيىرعانى – ءتورت جۇلدە. الەكساندرا ابورنەۆا (+75 كيلو) مەن نۇرسۇلتان راحاتوۆ (77 كيلو) كۇمىس جانە گۇلناز ناۋرىزوۆا (75 كيلو) مەن يگور ۆاشانوۆ (94 كيلو) قولا مەدالدى ەنشىلەدى. جالپى ەسەپتە قىتاي (6+5+1) وزسا, ودان كەيىنگى ورىنداردى جارىس قوجايىندارى (2+2+2) مەن يران قۇراماسى (2+1+2) يەمدەندى.
2013 جىلى استانادا ۇيىمداستىرىلعان ازيا چەمپيوناتىندا سولتۇستىك كورەيانىڭ باعى جاندى. قۇرامى كىل مىقتىلاردان جاساقتالعان اتالمىش مەملەكەتتىڭ وكىلدەرى 4 التىن, 3 كۇمىس جانە 2 قولانى ولجالادى. ەكىنشى جانە ءۇشىنشى ورىندى يران (4+1+2) مەن قازاقستان (3+1+2) يەلەندى. ەلوردا تورىندە دۇركىرەپ تۇرىپ وتكەن دودادا اننا نۇرمۇحامبەتوۆا (75 كيلو), الەكساندرا ابورنەۆا (+75 كيلو) جانە الەكساندر زايچيكوۆ (94 كيلو) تەڭدەسسىز دەپ تانىلسا, فارحاد حاركي (62 كيلو), ەۆگەني ەستافەۆ (85 كيلو) جانە يبراگيم بەرسانوۆ (+105 كيلو) جۇلدەگەرلەر قاتارىنا قوسىلدى.
2015 جىلى تايلاندتىڭ پحۋحەت قالاسىندا جەرلەستەرىمىز قايتا ەكىنشى ورىنعا كوتەرىلدى. بايراقتى باسەكەدە 3 التىن مەن 3 قولانى يەمدەندىك. وسى ورايدا ءبىر قۋاناتىن جاعداي, جەڭىس تۇعىرىنا كوتەرىلگەن ءۇش ءزىلتەمىرشىلەرىمىزدىڭ بارلىعى دا ءوز قانداستارىمىز. اتاپ ايتساق, ايدار قازوۆ (77 كيلو), ەرمەك ءومىرتاي (85 كيلو) جانە رۇستەم سىباي (94 كيلو) قارسىلاس شاق كەلتىرمەسە, اسەم سادىقوۆا (58 كيلو), فاينا سىبانباەۆا (63 كيلو) جانە مايرا فايزوللاەۆا (69 كيلو) ءۇزدىك ۇشتىكتى قورىتىندىلادى. كوماندالىق ەسەپتە ءبىرىنشى ورىندى قىتاي (6+1+3) جانە ءۇشىنشى ورىندى فيليپپين (2+0+0) يەلەندى.
2016 جىلى تاشكەنتتە قىتاي (5+4+3) كوش باستاسا, ەكىنشى جانە ءۇشىنشى ساتىعا تايپەي (2+1+1) مەن قازاقستان (2+0+0) تۇراقتادى. وتانداستارىمىزدىڭ اراسىنان دەنيس ۋلانوۆ (85 كيلو) پەن ۆلاديمير سەدوۆ (94 كيلو) التىن تۇعىردان قول بۇلعادى.
2017 جىلى تۇرىكمەنستاننىڭ باس شاھارى – اشحابادتا جالاۋى جەلبىرەگەن جارىستا ءبىر عانا التىنى بار قازاقستان قۇراماسى جەتىنشى ورىندا قالىپ قويدى. ءبىزدىڭ سايىپقىراندار اراسىنان تەك البەرت ليندەردىڭ (69 كيلو) عانا جۇلدىزى جارقىرادى. ال جالپى كوماندالىق ەسەپتە قىتاي (8+2+2) ايقىن جەڭىسكە قول جەتكىزدى. ودان كەيىنگى ساتىلارعا سولتۇستىك كورەيا (2+2+1) مەن وزبەكستان (2+0+1) جايعاستى.
2019 جىلعى ازيا چەمپيوناتىنا قازاقستان قۇراماسى كىل مىقتىلاردى اپاردى. كەزىندە وليمپيا ويىندارى مەن الەم چەمپيوناتتارىندا اتوي سالعان ساڭلاقتاردىڭ بارلىعى دا قىتايدا ونەر كورسەتتى. بىراق سولاردىڭ ەشقايسىسى بابىندا بولماي شىقتى. وسى كۇنگە دەيىنگى رەسمي دودالاردىڭ بارلىعىندا ۇنەمى جەڭىس تۇعىرىنىڭ ەڭ بيىك ساتىسىنا كوتەرىلگەن يليا يلين بەسىنشى ورىندا قالىپ قويعاندا, شىنايى جانكۇيەرلەردىڭ قانداي كۇي كەشكەنىن قۇر سوزبەن ايتىپ جەتكىزۋ قيىن...
كەزىندە ازيا چەمپيونى اتانۋعا كۇش-جىگەرى جەتكەن رۋستەم سىبايدىڭ جەتى سپورتشى اراسىنان جەتىنشى ساتىعا جايعاسقانىن ەستىگەن ساتتە جاعامىزدى ۇستادىق... سول سەكىلدى تالاي ۇلى دۇرمەكتەردە ىسىلىپ, اتاقتارى الىسقا جايىلعان ءزۇلفيا چينشانلو, فارحاد حاركي, كارينا گوريچەۆا, الەكساندر زايچيكوۆتىڭ وزدەرى وزگە ەلدىڭ ورەندەرىنە جارىتىپ قارسىلىق كورسەتە الماعانىن كورگەندە كوڭىلىمىز قاتتى قۇلازىدى. ال وليمپيادا چەمپيونى نيجات راحيموۆ ءوزىنىڭ العاشقى ءمۇمكىندىگىن پايدالانا الماعاننان كەيىن جارىستى جالعاستىرۋدان باس تارتتى. ناتيجەسىندە قازاقستان قۇراماسى سارى قۇرلىقتىڭ باستى دوداسىندا ءۇش قولا مەدالدى يەلەنۋمەن عانا شەكتەلدى. بۇل ءجۇلدەلەردىڭ يەگەرلەرى – ارلي چونتەي (55 كيلو), دەنيس ۋلانوۆ (81 كيلو) ءجانە راۋشان مەشىتحانوۆا (81 كيلو).
جوعارىدا ايتىلعان جايسىز جاعداي ەل سپورتى باسشىلارى جانە رەسپۋبليكالىق اۋىر اتلەتيكا فەدەراتسياسىنىڭ تىزگىنىن ۇستاعان ازاماتتارعا ۇلكەن وي سالۋعا ءتيىس. «وسى تىعىرىقتان قالاي شىعامىز؟», «بۇرىنعى دەڭگەيىمىزگە قايتا كوتەرىلۋ ءۇشىن نە ىستەۋ كەرەك؟», «ءاربىر جاۋاپتى جارىستار قارساڭىندا ءزىلتەمىرشىلەردى قالاي جىگەرلەندىرەمىز؟» دەگەن سانسىز ساۋالدارعا دەرەۋ جاۋاپ تابۋ قاجەت. ال ەگەر ەشتەڭە وزگەرمەي, «باياعى جارتاس – ءبىر جارتاس» كۇيىندە قالا بەرەتىن بولسا, وندا الداعى ءدۇبىرلى دودالاردا دا جەر سيپاپ قالاتىنىمىز ايدان انىق.
