ۇيىمداستىرۋشىلاردىڭ ايتۋىنشا شارا ماقساتى – ەلىمىزدەگى وتباسى دارىگەرلەرىنىڭ قىزمەتى تۋرالى تۇرعىنداردىڭ حاباردار بولۋىن ارتتىرۋ.
– بۇكىل الەم حالىقارالىق وتباسى دارىگەرى كۇنىن اتاپ وتەدى. وتباسى دارىگەرى ءبىر وتباسىنىڭ مۇشەلەرىنىڭ دەنساۋلىعىن قاداعالايتىن مامان. ونىڭ نەگىزگى قىزمەتى پروفيلاكتيكالىق قىزمەت بولىپ تابىلادى. ءبىزدىڭ ەمحانا نازارباەۆ ۋنيۆەرسيتەتى مەديتسينا مەكتەبىنىڭ كلينيكالىق بازاسى بولعاندىقتان بۇگىنگى اكتسيا سول وقۋ ورنى ستۋدەنتتەرىنىڭ قاتىسۋىمەن ۇيىمداستىرىلىپ وتىر. ولار بولاشاق وتباسى دارىگەر بولعاندىقتان وسى كۇننەن باستاپ ءبىزدىڭ ەمحانادا تاجىريبەدەن وتەدى. ءبىزدىڭ دارىگەرلەر مەن ستۋدەنتتەر ەمحاناعا كەلگەن پاتسيەنتتەرگە وتباسى دارىگەرىنىڭ قىزمەتى مەن ماڭىزى تۋرالى اقپاراتتىق ءتۇسىندىرۋ جۇمىستارىن وتكىزۋدە, - دەدى قالالىق №9 ەمحانانىڭ باس دارىگەرى ساۋلە سماعۇلوۆا.
سونىمەن قاتار, اكتسيا بارىسىندا قالا تۇرعىندارى سكرينينگكە تەكسەرىلۋگە جانە ول تۋرالى بىلۋگە, يممۋنيزاتسيا جايلى ساۋاتتىلىعىن ارتتىرۋعا جانە دە جۇرەك-قان تامىرلارى اۋرۋلارىنا ەكسپرەسس دياگنوستيكا وتكىزۋگە جاعداي جاسالدى.
– سول سياقتى شارا بارىسىندا پاتسيەنتتەر اراسىندا ساۋالناما جۇرگىزۋ ارقىلى ءتۇرلى اۋرۋلاردىڭ الدىن الۋدى قاراستىرۋدامىز. قازاقستاندا ولىمگە اپاراتىن نەگىزگى 6 اۋرۋ ءتۇرى بار, سولارعا قارسى تەكسەرىستەن ءوتىپ, ونى بولدىرماۋعا تىرىسۋ كەرەك. ءبىز وسى سەكىلدى حالىققا ارنالعان مەديتسينالىق شارالاردى وتە ءجيى وتكىزەمىز. اكتسيا بولاتىن كەزدە الەۋمەتتىك جەلىلەر ارقىلى جانە قالالىق دەنساۋلىق ساقتاۋ باسقارماسى ارقىلى الدىن الا اقپارات جىبەرىپ وتىرامىز. ياعني ەلوردالىقتار ءبىلسىن, كەلىپ تەكسەرىلسىن دەگەن ماقساتپەن. بۇگىندىككە تاڭەرتەڭنەن بەرى 50 شاقتى ادام كەلىپ تەكسەرىلدى, - دەدى ول ساۋلە سماعۇلوۆا.
ايتا كەتەيىك, اتالعان مەديتسينالىق اكتسيا نازارباەۆ ۋنيۆەرسيتەتىنىڭ مەديتسينا مەكتەبىمەن بىرلەسىپ جۇزەگە اسىرىلۋدا.
