ۋنيۆەرسيتەتتىڭ 80 جىلدىق مەرەكەسىن اتاپ ءوتۋدىڭ سالتاناتتى جيىنىنا ءبىلىم ورداسىنىڭ ۇجىمىمەن قاتار, پارلامەنت سەناتىنىڭ دەپۋتاتتارى سەرىك بەكتۇرعانوۆ پەن جەڭىس نۇرعاليەۆ, وبلىس ءماسليحاتىنىڭ حاتشىسى سايلاۋبەك ەسجانوۆ قاتىستى.
جەڭىس نۇرعاليەۆ سەنات ءتورايىمى داريعا نازارباەۆانىڭ ۋنيۆەرسيتەتكە قۇتتىقتاۋ حاتىن وقىپ بەردى.
«قۇرمەتتى قوستانايلىقتار! سىزدەردى اكادەميك ءو.سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتىنىڭ 80 جىلدىعىمەن قۇتتىقتايمىن. اكادەميك ومىرزاق سۇلتانعازين الەمدىك عىلىمي ورتادا ءوز ورنى بار اسا ءىرى تۇلعا. ول تەك قازاقستان عىلىمىنىڭ دامۋىنا عانا ەمەس, جالپى الەمدىك عىلىمعا ۇلەس قوستى. مەملەكەتتىك سىيلىقتىڭ لاۋرەاتى, اكادەميك جانە قازاقستان عىلىم اكادەمياسىنىڭ پرەزيدەنتى قىزمەتىن اتقارعان ول ىلعي بيىك زيالىلىعىمەن ەرەكشەلەندى. ومىرزاق ماحمۇت ۇلى «اسار» پارتياسىنىڭ قۇرامىندا بولعان كەزەڭدە عالىم تەرەڭ ويلارىمەن, ەڭبەكقورلىعىمەن پارتيالاستارىنىڭ قۇرمەتىنە بولەنگەن ەدى. الەمدىك دەڭگەيدەگى عالىمنىڭ ەسىمىن الۋ قوستاناي مەملەكەتتىك پەداگوگيكالىق ۋنۆەرسيتەتى ۇجىمىن عىلىمي زەرتتەۋ جۇمىستارى مەن پەداگوگتار دايىنداۋدا اسا شابىتقا بولەيدى دەپ ويلايمىن» دەپ جازىلعان داريعا نۇرسۇلتانقىزىنىڭ قۇتتىقتاۋىندا.
سەناتور سەرىك بەكتۇرعانوۆ تا قوستانايلىقتاردى ءبىلىم ورداسىنىڭ 80 جىلدىعىمەن قۇتتىقتادى. ول سونىمەن قاتار ءبىلىم جانە عىلىم مينيسترلىگىنىڭ اتىنان ۋنيۆەرسيتەتتىڭ دامۋىنا زور ۇلەس قوسقان پەداگوگتار مەن قىزمەتكەرلەردى «ى.التىنسارين مەدالىمەن» ماراپاتتادى. ۋنيۆەرسيتەت رەكتورى ەركىن ءابىل ۋنيۆەرسيتەتتىڭ دامۋىنا ۇلەس قوسقاندارعا جانە قۇرمەتتى قوناقتارعا, ونىڭ ىشىندە اكادەميك ومىرزاق سۇلتانعازيننىڭ جۇبايى رايحان عانيقىزىنا دا «ءو.سۇلتانعازين مەدالىن» تاپسىردى.
ءبىلىم ورداسىنىڭ 80 جىلدىعى مەرەكەسى ۋنيۆەرسيتەت ستۋدەنتتەرى مەن ە.ومىرزاقوۆ اتىنداعى وبلىستىق فيلارمونيا ارتىستەرىنىڭ ءان-كۇي, بيىمەن ورنەكتەلىپ وتىردى.
قوستاناي
