القالى جيىنعا تۇركيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى نەۆزات ۋيانىك, ازەربايجان رەسپۋبليكاسىنىڭ توتەنشە جانە وكىلەتتى ەلشىسى راشاد ماممادوۆ, قوعام قايراتكەرلەرى, تۇركى الەمىنىڭ سىيلى اقساقالدارى مىرزاتاي جولداسبەكوۆ, ءادىل احمەتوۆ, پارلامەنت ءماجىلىسىنىڭ دەپۋتاتى نۇرلان دۋلاتبەكوۆ, كورنەكتى قوعام قايراتكەرلەرى, بەلگىلى عالىمدار, تۇركولوگتار جانە ەتنومادەني ورتالىقتاردىڭ جەتەكشىلەرى قاتىستى.
جيىندا ءسوز العان حالىقارالىق تۇركى اكادەمياسىنىڭ پرەزيدەنتى دارحان قىدىرالى تۇرىك حالقىن ايتۋىلى مەرەكەمەن قۇتتىقتاي وتىرا, بيىلعى جىلدىڭ «اتاتۇرك جانە ۇلت-ازاتتىق كۇرەس» جىلى دەپ جاريالانعانىن, سوعان بايلانىستى بىرقاتار شارا وتكىزىلىپ جاتقانىن ايتىپ ءوتتى. «اتاتۇرك – تەك تۇرىك ەلىنىنىڭ ەمەس تۇگەل تۇركى حالقىنىڭ سىيلى پەرزەنتى. ءوزىنىڭ ۇلت-ازاتتىق قوزعالىسىمەن كۇللى تۇركى الەمىنە سەرپىلىس الىپ كەلدى», دەدى دارحان قىدىرالى.
تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى نەۆزات ۋيانىك جيىن ۇيىمداستىرۋشىلارىنا العىسىن ءبىلدىرىپ, «1919 جىلى 19 مامىردا سامسۋن قالاسىندا باستالعان ۇلت-ازاتتىق كۇرەسىنىڭ تۇركيا رەسپۋبليكاسىنىڭ مەملەكەت رەتىندە قۇرىلۋىندا ماڭىزى زور. ۇلت-ازاتتىق كۇرەس وتانىمىزعا باسقىنشىلىق جاساپ, حالقىمىزعا تۇتقىن شىنجىرىن تاعۋدى كوزدەگەندەرگە قارسى داڭقتى تويتارىس بولدى. ءبىر جاعادان باس, ءبىر جەڭنەن قول شىعارا بىلگەن حالقىمىز ءبىر شاڭىراق استىندا باس قوستى», دەدى.
تاۋەلسىزدىك العان جىلدارى تۇركياعا قازاقستان دەلەگاتسياسىن باستاپ بارعان تۇركى الەمىنىڭ سىيلى اقساقالى مىرزاتاي جولداسبەكوۆ سول كەزدىڭ ەستەلىكتەرىمەن بولىسە وتىرا, تۇرىك حالقىنىڭ قازاقتارعا جاساعان جاقسىلىعى مەن قولداۋى تۋرالى اڭگىمەلەپ بەردى.
بۇدان بولەك قازاقستاننىڭ ەڭبەك سىڭىرگەن قايراتكەرى, حالىقارالىق جوعارى مەكتەپ عىلىم اكادەمياسىنىڭ اكادەميگى ءادىل احمەتوۆ, پارلامەنت ءماجىلىسىنىڭ دەپۋتاتى نۇرلان دۋلاتبەكوۆ ءسوز سويلەپ, باۋىرلاس مەملەكەتكە ءوز لەبىزدەرىن ءبىلدىردى.
جيىندا تۇركيا رەسپۋبليكاسىنىڭ نەگىزىن قالاۋشى مۇستافا كەمال اتاتۇرك تۋرالى دەرەكتى فيلم كورسەتىلىپ, فوتوكورمە ۇيىمداستىرىلدى. شارا سوڭىندا تۇركولوگيا فاكۋلتەتىنىڭ ستۋدەنتتەرى اتاتۇرككە ارنالعان ولەڭدەر وقىدى.
