قوعام • 17 مامىر، 2019

رەسپۋبليكالىق بوس جۇمىس ورىندارى جارمەڭكەسىنە 150 جۇمىس بەرۋشى قاتىستى

895 رەت كورسەتىلدى

قازاق ۇلتتىق قىزدار پەداگوگيكالىق ۋنيۆەرسيتەتىندە «جاس مامان» رەسپۋبليكالىق بوس جۇمىس ورىندارى جارمەڭكەسى ءوتتى. شاراعا 700-گە جۋىق ستۋدەنت پەن 150-دەن استام جۇمىس بەرۋشى قاتىستى.

قر ءبىلىم جانە عىلىم مينيسترلىگى مەن قىزدار ۋنيۆەرسيتەتىنىڭ ۇيىتقى بولۋىمەن العاش رەت ۇيىمداستىرىلعان جارمەڭكە پەداگوگيكالىق ماماندىقتار بويىنشا ءبىلىم العان تۇلەكتەردى جۇمىسپەن قامتۋعا ارنالعان. باستاما جاستارعا بۇگىندە ءبىلىم بەرۋ وشاقتارىندا قاي سالا ماماندارىنا سۇرانىس كوپ نەمەسە تاپشى ەكەندىگىن جانە ەڭبەك ءوتىلىنسىز جۇمىسقا ورنالاسۋعا بولاتىندىعىن انىقتاۋعا سەپتەسەدى. سونداي-اق شارا «ديپلوممەن – جۇمىسقا» جوسپارىن جۇزەگە اسىرۋعا مۇمكىندىك بەرمەك. جوعارى جانە ورتا ارناۋلى وقۋ ورىندارى، قالالىق، اۋداندىق ءبىلىم باسقارمالارى، جالپى ءبىلىم بەرۋ ۇيىمدارى مەن نازارباەۆ زياتكەرلىك مەكتەپتەرىنىڭ قىزمەتكەرلەرى قاتىسقان جيىندى قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستراتەگيالىق دامۋ جانە حالىقارالىق بايلانىستار جونىندەگى پرورەكتورى ءلاززات بولەباەۆا اشىپ، ۇستازدار دايارلايتىن وقۋ ورنىنىڭ ءبىتىرۋشى تۇلەكتەرىن جۇمىسپەن قامتۋ ورايىندا وتكىزىلىپ وتىرعان شارانىڭ ءمانى مەن ماڭىزىنا كەڭىنەن توقتالدى.

– جارمەڭكە وتاندىق پەداگوگيكالىق جوعارى وقۋ ورىندارىنىڭ بىرىڭعاي قازاقستاندىق ءبىلىم بەرۋ كەڭىستىگىن قالىپتاستىرۋ، جاستاردى جۇمىسقا ورنالاستىرۋ ماسەلەسى بويىنشا ورتاق ديالوگ الاڭىن قۇرۋ، ولارعا جۇمىسقا ورنالاسۋ مۇمكىندىكتەرى تۋرالى اقپارات بەرۋ جانە تۇلەكتەردى تۇراقتى جۇمىسپەن قامتۋعا جاردەمدەسۋ ماقساتىندا ۇيىمداستىرىلىپ وتىر. بۇگىندە پەداگوگيكالىق ماماندىقتار بويىنشا بوس جۇمىس ورىندارى جارمەڭكەسى جاستار اراسىندا جۇمىسسىزدىق ماسەلەسىن وڭتايلى شەشۋدىڭ ءتيىمدى تەتىگى بولىپ تابىلادى، – دەدى ءلاززات بولەباەۆا.

ال وقۋ جانە وقۋ ادىستەمەلىك جۇمىستار جونىندەگى پرورەكتور قايرات ءجۇنىس قىزدار ۋنيۆەرسيتەتىنىڭ قول جەتكىزگەن جەتىستىكتەرى جايىندا ءسوز قوزعاپ، ءبىلىم ورداسى مەن جۇمىس بەرۋشىلەر اراسىنداعى بايلانىسقا نازار اۋداردى.

– 2018 جىلعى اككرەديتتەۋ جانە رەيتينگتىڭ تاۋەلسىزدىك اگەنتتىگى قورىتىندىسى بويىنشا قازاقستاننىڭ ۇزدىك 20 جوعارى وقۋ ورنىنىڭ جالپى رەيتينگىندە ۋنيۆەرسيتەت 7 ورىندى يەلەنسە، «ءبىلىم بەرۋ» باعىتىنداعى مامانداردى دايارلاۋ بويىنشا 2015 جىلى 1-ورىنعا، 2016، 2017، 2018 جىلدارى 2 ورىنعا قول جەتكىزدى. ۋنيۆەرسيتەت نارىق سۇرانىسىن ەسكەرە وتىرىپ، ءبىلىم باعدارلامالارىنىڭ مازمۇنىن جاڭارتۋ ماقساتىندا جۇمىس بەرۋشىلەرمەن، نازارباەۆ ۋنيۆەرسيتەتى، نازارباەۆ زياتكەرلىك مەكتەپتەرىمەن جانە جالپى ورتا ءبىلىم بەرۋ مەكەمەلەرىمەن تىعىز بايلانىستا جۇمىس ىستەيدى. جىل سايىن ءبىلىم بەرۋ باعدارلاماسى بويىنشا ارنايى جۇمىس توبى قۇرىلىپ، ءار جاڭا وقۋ جىلىنا جۇمىس بەرۋشىلەردىڭ، ستۋدەنتتەردىڭ سۇرانىسى بويىنشا وقۋ باعدارلامالارى 30 پايىزعا جاڭارتىلىپ وتىرادى، – دەدى قايرات ءجۇنىس.

جارمەڭكەدە جۇمىس بەرۋشىلەر ءوز مەكەمەلەرىندەگى بوس جۇمىس ورىندارىن ۇسىندى. ستۋدەنتتەر بۇل مۇمكىندىكتى پايدالانىپ تۇيىندەمەلەرىن جولدادى. سونداي-اق ءبىلىم، عىلىم، ونەر جانە سپورتتاعى جەتىستىكتەرى جايلى ارنايى پورتفوليولار كورمەسىن وتكىزىپ، پرەزەنتاتسيا جاسادى.

– بوس جۇمىس ورىندار جارمەڭكەسىن ۇيىمداستىرۋ جاس ماماندارعا عانا ەمەس، جۇمىس بەرۋشىلەر ءۇشىن دە ماڭىزدى. جاستار وزدەرىن قىزىقتىراتىن بوس ورىندار تۋرالى مالىمەت الۋعا، ال بىزدەر ءۇشىن تۇلەكتەردىڭ ىسكەرلىك قاسيەتىن باعالاۋعا مۇمكىندىك تۋدىرادى. ماسەلەن، اتىراۋ وبلىسىنا فيزيكا، دەفەكتولوگيا، ينفورماتيكا، ورىس ءتىلى مەن ادەبيەتى پاندەرىنىڭ مۇعالىمدەرى قاجەت. وسى تاقىلەتتەس شارالار ارقىلى تۇلەكتەرگە اقپارات بەرە الامىز. ورتا مەكتەپكە قىزمەتكە ورنالاسقان جاس مامانعا تاجىريبەسى مول ۇستازدار باعىت-باعدار بەرىپ، جۇمىسىنىڭ قىر-سىرىن تەرەڭ مەڭگەرۋىنە ارقاشان قولۇشىن كورسەتەدى. سوندىقتان جاستار جۇمىس ىستەۋگە دەگەن ىنتا-ىقىلاس تانىتسا، ءبىز ءوز تاراپىمىزدان ءاردايىم قولداۋ كورسەتۋگە دايىنبىز، – دەيدى اتىراۋ وبلىستىق ءبىلىم باسقارماسىنىڭ باسشىسى جانسۇلۋ تورەمۇراتوۆا.

جوعارى وقۋ ورنىنا دەيىنگى ءبىلىم بەرۋ مەن مانساپ ءبولىمىنىڭ اقپاراتىنا سۇيەنەر بولساق، جارمەڭكە پەداگوگيكالىق، گۋمانيتارلىق، جاراتىلىستانۋ جانە ونەر سالاسىندا ماماندار دايارلاۋدىڭ جەكەلەگەن باعىتتارى بويىنشا ۇيىمداستىرىلدى. شارا اياسىندا «ەڭبەك نارىعىنداعى سۇرانىس جانە الەۋەتتى جۇمىس بەرۋشىلەرمەن ىنتىماقتاستىق» تاقىرىبىندا دا جيىن ءوتتى. القالى باسقوسۋدا جوعارى وقۋ ورىندارىنىڭ وكىلدەرى مەن جۇمىس بەرۋشىلەر تۇلەكتەردى جۇمىسپەن قامتۋدىڭ ماسەلەسىن تالقىلاپ، ءوزارا كەلىسىم جاسادى. سونداي-اق «Head  hunter» كومپانياسىنىڭ وكىلدەرى تاقىرىپ تۋراسىندا جانە مانساپتى قۇرۋ ماقساتىندا ارنايى شەبەرلىك سىنىبىن جۇرگىزدى.

ستاتيستيكالىق مالىمەتتەر بويىنشا، وتكەن وقۋ جىلىندا ۋنيۆەرسيتەتتى 1548 ستۋدەنت ءتامامداپ، ولاردىڭ 95 پايىزى جۇمىسقا ورنالاسقان. ال 2017 جىلى «ەكى قولعا ءبىر كۇرەك تاپقانداردىڭ» ۇلەس سالماعى 88 پايىزدى قۇرايدى.

سوڭعى جاڭالىقتار

شابىت شاقىراتىن شاھار

ەلوردا • بۇگىن، 08:23

اقجايناق استانا

ەلوردا • بۇگىن، 08:22

وزىق ءوندىرىس ورنىندا بولدى

ايماقتار • بۇگىن، 08:20

باعدارىڭ قالاي، باس قالا؟

ەلوردا • بۇگىن، 08:17

ديماش پەن دجەكسون

ونەر • بۇگىن، 08:10

ۇتقانىمىز شامالى بولىپ تۇر

قوعام • بۇگىن، 08:05

ەگىزدەر فەستيۆالى

قوعام • بۇگىن، 08:00

ۇقساس جاڭالىقتار