شەتەلدىك جانە قازاقستاندىق سپيكەرلەر, مەملەكەت جانە تسيفرلىق قاۋىپسىزدىكتىڭ ەكوجۇيەسى; ۇدەرىستەر, تەحنولوگيالار, بىلىكتى ماماندار – تسيفرلىق قاۋىپسىزدىكتىڭ ىرگەتاسى; قاۋىپسىزدىكتى قامتاماسىز ەتەتىن ماسەلەلەر جونىندەگى قوعام مەن بيزنەس ديالوگىنىڭ تيىمدىلىگى تاقىرىپتارىنا ارنالعان ءۇش سەكتسيا جۇمىسىنىڭ بارىسىندا ءوزارا تاجىريبە الماستى.
شەتەلدىك بايانداماشىلار قاتارىندا پولشا رەسپۋبليكاسىنىڭ كاسىپكەرلىك پەن تەحنولوگيالار ۆيتسە-ءمينيسترى تادەۋش كوشچينسكي; مالايزيانىڭ عىلىم, تەحنولوگيالار جانە يننوۆاتسيالار مينيسترلىگى جانىنداعى كيبەرقاۋىپسىزدىك سالاسىنا ماماندار دايارلاۋ ۇلتتىق ورتالىعىنىڭ باس ديرەكتورى, دوكتور اميرۋددين ابدۋل ۆاحاب; يتاليانىڭ بارلاۋ قىزمەتى قاۋىپسىزدىگى دەپارتامەنتى باس ديرەكتورىنىڭ ورىنباسارى, پروفەسسور روبەرت بالدوني; وزبەكستاننىڭ اقپاراتتاندىرۋ جانە تەلەكوممۋنيكاتسيا سالاسىنداعى باقىلاۋ جونىندەگى مەملەكەتتىك ينسپەكتسياسى جانىنداعى تەحنيكالىق ىقپالداستىق ورتالىعى ديرەكتورىنىڭ ورىنباسارى باحتيور يۋلداشەۆ; حالىقارالىق ەلەكتروبايلانىس وداعىنىڭ تمد بويىنشا وڭىرلىك ءبولىمىنىڭ باسشىسى كيريلل وپارين, سونداي-اق دومەندىك اتاۋلار مەن ICANN IP-مەكەنجايلاردى باسقارۋ جونىندەگى حالىقارالىق كورپوراتسيا وكىلدەرى بولدى.
اتالعان سالا بويىنشا قازاقستاندا وتكەن جىلى اتقارىلعان ناقتى مەحانيزمدەر مەن ءىس-شارالار تۋرالى تسيفرلىق دامۋ, قورعانىس جانە اەروعارىش ۆيتسە-ءمينيسترى اسحات ورازبەك ايتىپ بەردى. مەملەكەتتىك ورگانداردىڭ بىرلەسە اتقارعان جۇمىسىنىڭ ناتيجەسىندە قازاقستان بۇۇ-نىڭ كيبەرقاۋىپسىزدىكتىڭ جاھاندىق رەيتينگىسىندە 82-ءشى ورىننان 40-شى ورىنعا كوتەرىلدى.
بۇگىنگى كۇنى قازاقستاندا ازاماتتاردىڭ جەكە باس مالىمەتتەرىن قورعاۋ ماسەلەسى جان-جاقتى قاراستىرىلۋدا. تەحنولوگيالاردى قولدانۋ, سونىڭ ىشىندە مەملەكەتتىك جانە كورپوراتيۆتىك سەكتورلاردىڭ مالىمەتتەر بازاسىنا قاشىقتان قول جەتكىزۋدە قاۋىپسىزدىكتى قورعاۋ ادىستەرى يگەرىلۋدە. وسىمەن بىرگە, ءوندىرىستى تسيفرلاندىرۋ جانە «اقىلدى» ەكوجۇيەلەردى قۇرۋ جونىندەگى اقپاراتتىق قاۋىپسىزدىككە جۇيەلى تالداۋ جۇرگىزىلۋدە.
بۇل ماسەلەلەردىڭ وزەكتىلىگىنە وراي, اقپاراتتى قورعاۋ سالاسىندا كاسىبي اۋتسورسينگ قىزمەتتەرىنە سۇرانىس ارتىپ وتىر. سونداي-اق اقپاراتتىق قاۋىپسىزدىك سالاسىنا بولىنگەن ءبىلىم بەرۋ گرانتتارىنىڭ سانى 11 ەسەگە ءوسىپ, 60-تان 674-كە كوبەيگەن.
بۇدان بولەك, 100 مىڭنان استام حوستتى قۇرايتىن ينتەرنەت جەلىسىنىڭ ۇلتتىق سەگمەنتى قولدانۋشىلار ءۇشىن ايتارلىقتاي قاۋىپسىز بولا ءتۇستى. ينتەرنەت-كەڭىستىكتى مونيتورينگلەۋدى اۆتوماتتاندىرۋدىڭ ناتيجەسىندە ينتەرنەت-رەسۋرستىڭ زيان كەلتىرەتىن ۋاقىتى بىرنەشە ساعاتقا قىسقارعان.
سەسسيا بارىسىندا ساراپشىلار الەمدىك تۇراقتىلىق پەن مەملەكەتتىڭ جانە الەمدىك قوعامداستىقتىڭ قاۋىپسىزدىگىنە اقپاراتتىق كەڭىستىك ارقىلى تونەتىن قاتەرلەردەن قورعانۋ جولدارىن تالقىلادى.
