ءور ماحامبەت ءوز اعام – ابايلاپ ءجۇر!
جولداس بولدىم ءبورىنىڭ بورىسىمەن,
ارۋاقتاندىم سولاردىڭ پەرىسىمەن...», دەپ قازاق پوەزياسىندا ءوز بولمىسىمەن ەرەكشەلەنىپ, قارىشتى قالامىمەن دارالانعان ەسەنقۇل جاقىپبەكتى ادەبيەتتەگى اعالارى«ەساعا» دەپ ەركەلەتكەن ساعىنىشقا تولى ەستەلىكتەردى الماتىدا وتكەن جىر كەشىندە تىڭدادىق.
ۇلتتىق كىتاپحانا تورىندە ءوتكەن بۇل كەشتىڭ ءبىر ەرەكشەلىگى ەسەنقۇلتانۋعا باستاعان تىڭ جوبالاردىڭ جۇزەگە اسۋىندا ەدى. اقىننىڭ كوزى تىرىسىندە شىعارمالارى ون شاقتى باسىلىم بولىپ جارىققا شىقسا, « ۇلى ولەڭ قۇيىلىپ تۇر وزەگىمە», «ەساعا» كىتاپتارى ءتورت جىل بويى جيناقتالىپ, سوناۋ 1970-جىلداردان بەرگى ارالىقتاعى ولەڭدەرى, سونداي-اق ايتىستارى «جامبىل» جانە «اققاينار» باسپالارىنان وقىرمانعا جول تارتىپ وتىر.
وزىنەن بەس-التى جاس كىشىلىگىنە قاراماستان كوزى تىرىسىندە ەسەنقۇل جاقىپبەكتى «ەساعا» دەپ ەركەلەتىپ كەتكەن اقىن, دراماتۋرگ, مەملەكەتتىك سىيلىقتىڭ لاۋرەاتى نۇرلان ورازالين تەبىرەنىستى ءبىر كەشتىڭ كۋاسى بولا وتىرىپ, اقىننىڭ رۋحىمەن تىلدەسىپ, ونىڭ جان دۇنيەسىنە قايتا بارلاۋ جاساپ وتىرعانىن جەتكىزدى. «بايگەگە ءتۇسەتىن, الامانعا شاباتىن بايىرعىنىڭ جۇيرىكتەرى ءتارىزدى ەساعاڭنىڭ پوەزياداعى ورنى بولەك ەدى. اۋىزەكى ادەبيەتىنىڭ جۋھارلارىنان ءنار العان ەسەنقۇل ەسىمى بىزگە شالا جانسار بولىپ جەتكەن ايتىس ونەرىنە جان بىتىرگەن سىناۋ جۇيرىكتەردىڭ قاتارىندا اتالادى. ەسەنقۇل كەيدە بۇراپ, كەيدە شانشىپ, قاۋىپ, تاۋىپ ايتاتىن ايتىسكەرلىك ونەرىمەن ەلىن ءتانتى ەتتى. سەيداحمەت اعامىزدىڭ ءوزى الاڭداۋشىلىق ءبىلدىرىپ, وسىنداي ولەڭدەرىن دە كوپ جازسا ەكەن دەپ تىلەگەن-ءدى. مۇقاعالي قايتقاندا قازاق قالاي كۇڭىرەنسە, ولەڭدى شىنايى تانيتىن, باس يەتىن جۇرتشىلىق ەسەنقۇل كەتكەندە ءدال وسىلاي جينالعانى بار. ەسەنقۇلدىڭ ءداۋىرى ەندى باستالىپ كەلەدى» دەپ ءتامامدادى جۇرەكجاردى پىكىرىن نۇرلان مىرقاسىم ۇلى.
ەسەنقۇل جىرلارىن تىڭداۋعا اسىعىپ جەتكەن جۇرتشىلىق الدىندا نۇرلان ورازالين باس بولىپ جۇماباي شاشتاي ۇلى, عالىمجان جايلىباي, باۋىرجان جاقىپ, انارباي بولدىباي جاڭا شىققان كىتاپتاردىڭ تۇساۋكەسەر ءراسىمىن جاسادى.
ءوز پىكىرىن «ەسەنقۇل تانىلعانعا دەيىن ءتاپ-ءتاۋىر اقىن ەدىم» دەپ ءازىل-قالجىڭمەن باستاعان جازۋشى جۇماباي شاشتاي ۇلى اقىننىڭ وسپانحان اعامىز سياقتى سىقاققا شەبەرلىگىن, جۋرناليست بولۋعا دا ابدەن ماشىق ەكەنىن جەتكىزدى. «الماتىدان جىراقتا ءجۇرىپ جازعان اقىن ولەڭدەرىنىڭ مازمۇنى ۇلتتىق ەرەكشەلىگىمەن دارا. الماتىدا تۇراقتاپ قالعان كۇننىڭ ءوزىندە ونىڭ بۇعاۋعا كونبەيتىن شىعارماشىلىعى ەركىندىكتى اڭساپ تۇراتىن. سوندىقتان دا ەسەنقۇل ولەڭدەرىنىڭ ءبىتىم-بولمىسى ەرەكشە», دەپ اتاپ وتسە, «كۇپايكە كيگەن پوەزيا» كەشىندە ەساعاسىن سومداعان قازاقستاننىڭ ەڭبەك ءسىڭىرگەن قايراتكەرى بەكجان تۇرىس «الداي-اۋ» ءانىن ورىنداپ, اقىن اعاسى حاقىندا تەبىرەنىستى ويلارىن ورتاعا سالدى.
ال ون ەكى جاسىنان اقىن اعاسىنىڭ شاراپاتى مەن شاپاعاتىن كورىپ وسكەن اقان ابدۋاليەۆ سوناۋ 2008 جىلدار قويناۋىنا بۇككەن ساعىنىشقا تولى سىرىمەن ءبولىسىپ, اقىن جىرىنىڭ اسقاق ەكەندىگىن ۋاقىت ەنشىسىنە تاستادى.
