وعان سوڭعى كەزدەگى الەمدەگى وقيعالار كۋا. اقش وكىمەتىنىڭ باسىنا ەشقاشان مەملەكەتتىك قىزمەتتە ىستەپ كورمەگەن بيزنەسمەن د.ترامپ سايلانعاندا تاڭعالىپ ەدىك, ەندى ۋكراينا پرەزيدەنتىنىڭ ورىنتاعىنا اكتەر, كوميك ۆ.زەلەنسكي سايلانعاندا نە ايتارىمىزدى دا بىلمەي قالدىق. مىنە, بۇلار ساياسي تەحنولوگيانىڭ مىقتىلىعىنىڭ, ءوتىمدىلىگىنىڭ ارقاسىندا جەڭىسكە قول جەتكىزگەندەر. ءايتپەسە وسى ەكەۋىن ساياساتكەر رەتىندە بۇرىن ەشكىم بىلمەگەن.
ساياسي تەحنولوگتاردى ساياسي كونسۋلتانتتار دەپ اتايدى. ۆ.زەلەنسكيدىڭ سونداي كەڭەسشىلەرىنىڭ ءبىرى دميتري رازۋمكوۆ سايلاۋالدى ناۋقان ەندى قىزا باستاعان ءبىر تۇستا اكتەردىڭ ەشقانداي دەمالىس الماي, ءوز جۇمىسىن جۇرگىزىپ جاتقانىن, ال بۇل كەزدە ونىڭ قارسىلاستارى پەتر پوروشەنكو مەن يۋليا تيموشەنكو جوعارعى رادانىڭ مىنبەرىن پايدالانىپ, وزدەرىن جارنامالاپ كەتكەنىن, الايدا ولار بۇل جارناما ءۇشىن اقى تولەمەيتىنىن بەلگىلى باسىلىمداردىڭ بىرىندە ايتىپ قالدى.
ەلەۋسىز كورىنگەن وسى جايت حالىقتىڭ قاراپايىم توبىندا پ.پوروشەنكو مەن يۋ.تيموشەنكوعا دەگەن قارسىلىقتى ۇدەتە ءتۇستى. ويتكەنى وسى ەكەۋىن دە حالىق وليگارح رەتىندە تانيدى, سوندىقتان ولاردىڭ رادا مىنبەرىن تەگىن پايدالانۋىنا قارسىلىق وتى بۇرق ەتىپ: تىم بولماسا قازىر حالىقتىڭ قالتاسىنا تۇسپەي, سايلاۋ ناۋقانىنىڭ شىعىنىن وزدەرى تولەمەي مە دەگەن وي ميلليونداعان باستاردا ءبىر مەزەتتە تۋعان سياقتى.
قازىرگى ادامداردىڭ ساناسىنا ۇلكەن ءمىنبەرلەردەن ايتىلعان جالىنداعان ۇراندار, جالاڭ ناسيحاتتار ەمەس, جاندى جەرىنە تيەتىن جاي عانا ايتىلعان ءوتىمدى سوزدەر اسەر ەتەدى. قىزىلدار وكىمەت باسىنا كەلگەندە ەڭ باستى ءتاسىل جالاڭ ۇراندار بولعان. قازىر حالىق جالاڭ ۇرانعا سەنبەيدى, ول كوپ ايتىلا بەرسە, ءتىپتى اينالىپ تا كەتەدى.
قوعامداعى ەڭ باستى كەسەل قانداي بولسا, سوعان قارسى جاسالعان قارسىلىق قازىر حالىقتىڭ جۇرەگىنە جىلدام جەتەدى. سونىڭ ىشىندە سىبايلاس جەمقورلىق ابدەن جايلاعان پوستكەڭەستىك ەلدەردە كانديداتتىڭ قولىنىڭ تازالىعى قاتتى اسەر ەتەدى. ەگەر قولى بۇرىن بىلعانعانى بەلگىلى ادام بولسا, ونى ءسۇرىندىرۋگە بولاتىن ءجۇز ءتۇرلى ءادىستى ساياسي تەحنولوگتار ويلاپ تابادى. ال ۆ.زەلەنسكي سايلاۋالدى باعدارلاماسىندا «وكىمەت باسىنا جەتەتىن بولسام, جەمقوردى كورسەتكەن ادامعا اقشالاي سىيلىق بەرەمىن» دەپ جاريالادى. مۇنداي كوپىرمە ۋادەلەر حالىقتىڭ جۇرەگىنە وڭاي جول تابادى.
ۋكرايناداعى ۆ.زەلەنسكي جەڭىسىنىڭ فەنومەنى قازىر الەمنىڭ بارلىق تۇكپىرىندەگى ساياسي تەحنولوگتاردىڭ زەرتتەۋ نىسانىنا اينالعان. ونىڭ قارسىلاستارىنىڭ وسال جەرىن تاپقانى عانا ەمەس, زاڭنىڭ دا ءالسىز جەرلەرىن ءدوپ تاۋىپ, ءتيىمدى پايدالانىپ كەتكەندىگى تۋرالى اڭگىمەلەر كوپ ايتىلۋدا. ماسەلەن, 30 ناۋرىزدا سايلاۋدىڭ «تىنىشتىق كۇنى» جاريالانىپ, بارلىق تۇردەگى ناسيحاتتار توقتاتىلعان. الايدا, وسى كۇنى ۋكراينانىڭ كوپ ادام قارايتىن, رەيتينگى جوعارى تەلەارنالارىنىڭ ءبىرى ۆ.زەلەنسكي قاتىسقان «كەشكى شوۋلاردى» بىرىنەن سوڭ ءبىرىن كورسەتكەن. ءتىپتى باسقا ارنالار دا اكتەردىڭ قاتىسۋىنداعى باسقا جوبالاردى ەكراننان تۇسىرمەگەن. ساراپشىلار مۇنى الاياقتىق دەپ باعالاعانىمەن, سايلاۋ تۋرالى زاڭنىڭ تالاپتارى بۇزىلماعان سوڭ قۇقىق قورعاۋ ورگاندارى ەش قارسىلىق بىلدىرە الماعان. ويتكەنى تەلەارنالار بۇل زەلەنسكيدىڭ بۇرىن قاتىسقان جوبالارى, ول كەزدە اكتەر پرەزيدەنتتىككە كانديدات بولعان ەمەس دەپ قۇتىلىپ كەتكەن...
مىنە, بۇل ساياسي تەحنولوگيانىڭ ايلالى تاسىلدەرى. حالىققا ۆ.زەلەنسكيدى ناسيحاتتاۋ قيتۇرقى جولمەن جاسالىپ جاتىر دەۋگە ەشكىمنىڭ جۇرەگى داۋالامايدى. ويتكەنى ءبارى دە زاڭنىڭ شەڭبەرىندە. وسىنداي تاسىلدەردى كوپ قولدانعان زەلەنسكيدىڭ ساياسي تەحنولوگتارى اقىرى ساياساتقا ءۇش قايناسا سورپاسى قوسىلماعان كوميك, اكتەر, پروديۋسەردى پرەزيدەنتتىككە جەتكىزدى.
قازىر الەمدە ساياسي تەحنولوگتاردىڭ ءوز قاۋىمداستىقتارى دا بار. ولارعا ارقاشان دا سۇرانىستار ءتۇسىپ تۇرادى. مامىر ايىنىڭ ەكىنشى جەكسەنبىسى ساياسي تەحنولوگتار كۇنى دەپ بەلگىلەنگەن. ويتكەنى بۇل كۇن يتاليانىڭ ايگىلى ويشىلى, فيلوسوفى نيكوللو ماكياۆەلليدىڭ تۋعان كۇنى. ول مەملەكەتتىك بيلىكتى كۇشەيتۋ ءۇشىن كەز كەلگەن قۇرالدى پايدالانۋعا بولادى دەگەن. سونىڭ ىشىندە لاس قۇرالدار دا بار, ارينە. ساياسي تەحنولوگتار ونى وزدەرىنىڭ ۇستازى سانايدى.
مىنە, ساياسي تەحنولوگيا تۋرالى شاعىن پىكىرىمىز وسىنداي.
