الدىمەن م.اشىمباەۆ قازاقستان مەن ەۋروپالىق وداق اراسىنداعى قارىم-قاتىناسقا نازار اۋداردى. ول سوڭعى جىلداردا ەكى ەلدىڭ ىنتىماقتاستىعىن ارتتىرۋ ماقساتىندا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ پەن ەۋروپا ەلدەرىنىڭ باسشىلارى تاراپىنان ايتارلىقتاي جۇمىستار اتقارىلعانىن اتاپ ءوتتى.
– ءبىزدىڭ تاراپتار 2015 جىلى قول قويىلعان ارىپتەستىك ءجانە ىنتىماقتاستىق تۋرالى كەلىسىمنىڭ نەگىزىندە ءوزارا بايلانىستى ودان ءارى كۇشەيتتى. بۇگىندە ەكىجاقتى ەكونوميكالىق بايلانىسىمىز جۇيەلى تۇردە دامىپ كەلەدى. كوپتەگەن ەۋروپالىق كومپانيالار قازاقستاندا تابىستى جۇمىس ىستەپ جاتىر. قازاقستان ەكونوميكاسىنداعى سىرتقى ساۋدا اينالىمىنىڭ 50 پايىزى ەۋروپالىق وداق ەلدەرىنە تيەسىلى. سول سەبەپتى ەۋروپالىق وداقتى ەلىمىزدىڭ ەڭ باستى ساۋدا-ەكونوميكالىق سەرىكتەسى دەپ اتاۋعا تولىق نەگىز بار, – دەدى م.اشىمباەۆ.
سونىمەن قاتار كەزدەسۋدە قازاقستان ەكونوميكاسىنداعى شەتەل ينۆەستيتسياسىنىڭ جارتىسىنان استامى ەۋروپالىق وداق ەلدەرىنىڭ ۇلەسىندە ەكەنى ايتىلدى. Nur Otan پارتياسى ءتوراعاسىنىڭ ءبىرىنشى ورىنباسارى ساۋدا جانە ينۆەستيتسيالىق قارىم-قاتىناستاعى بۇل دەڭگەيلەر شەكتىك كورسەتكىش ەمەس ەكەنىنە نازار اۋدارىپ, الداعى ۋاقىتتا بۇدان دا جوعارى ءناتيجەلەر بولاتىنىنا سەنەتىنىن جەتكىزدى. سونداي-اق ول تاراپتاردىڭ ساياسي ءجانە پارتياارالىق بايلانىسىنا دا توقتالدى.
شارا بارىسىندا ەلباسى نۇرسۇلتان نازارباەۆتىڭ ءوزىنىڭ قازاقستان پرەزيدەنتى رەتىندەگى وكىلەتتىگىن توقتاتۋ تۋرالى تاريحي شەشىمى جانە ونىڭ 30 جىلعا جۋىق ەل باسقارىپ, تاۋەلسىز, زاماناۋي, نارىقتىق, دەموكراتيالىق, قۇقىقتىق قازاقستاندى قالىپتاستىرعانى ءسوز بولدى.
ودان بولەك, پارتيا ءتوراعاسىنىڭ ءبىرىنشى ورىنباسارى قازىرگى تاڭدا قازاقستان حالقىنىڭ تاريحي كەزەڭدى باستان وتكەرىپ جاتقانىنا جانە الدا ۇلكەن ساياسي ناۋقان تۇرعانىنا نازار اۋداردى.
– پارتيامىزدىڭ 23 ساۋىردەگى XIX سەزىندە ەلباسى قازاقستان پرەزيدەنتتىگىنە كانديدات رەتىندە قاسىم-جومارت توقاەۆتى ۇسىندى. ونى بارشا سەزد دەلەگاتتارى ءبىراۋىزدان قولدادى. سوعان بايلانىستى قازىرگى تاڭدا كانديداتىمىزدىڭ ۇگىت-ناسيحات جۇمىستارىنا قىزۋ دايىندىق جۇرگىزىلىپ جاتىر. رەسپۋبليكالىق جانە ايماقتىق دەڭگەيدەگى قوعامدىق شتابتار قۇرىلدى. بارلىق قاجەتتى شارالار قولعا الىندى, – دەدى م.اشىمباەۆ.
كەزدەسۋدە سايلاۋدىڭ اشىق ءارى ءادىل ءوتۋ ماسەلەسى دە اڭگىمەگە ارقاۋ بولدى. وسى ماسەلەگە توقتالعان Nur Otan پارتياسى توراعاسىنىڭ ءبىرىنشى ورىنباسارى پارتيانىڭ تەك زاڭ شەڭبەرىندە عانا ارەكەت ەتەتىنىن ايرىقشا اتاپ ءوتتى.
سونىمەن بىرگە پارتيا ءتوراعاسىنىڭ ءبىرىنشى ورىنباسارى كانديدات قاسىم-جومارت توقاەۆتىڭ سايلاۋداعى باستى قاعيداسى ەلباسى ساياساتىنىڭ ساباقتاستىعىن ساقتاۋ ەكەنىن ايتتى. ونىڭ سوزىنە قاراعاندا, بۇل ەكونوميكادا, الەۋمەتتىك ساياساتتا, ساياسي جۇيەدە ەش نارسە وزگەرمەيدى دەگەندى بىلدىرمەيدى.
– ساباقتاستىق ەلباسى ساياساتىنىڭ نەگىزگى باسىمدىقتارىن ساقتاپ قالۋمەن ەرەكشەلەنەدى. ولار كوپۆەكتورلى سىرتقى ساياسات پەن بەيبىتسۇيگىشتىك قاعيدالارى. ەكونوميكاداعى ساباقتاستىق نارىقتىق ەكونوميكا, الەۋمەتتىك از قامتىلعان توپتارعا قولداۋ كورسەتۋ جانە شەتەلدىك ينۆەستيتسيالاردى جۇمىلدىرۋ قاعيدالارىنا تابان تىرەيدى. ال ساياساتتا بۇرىنعىداي تۇراقتىلىق پەن دەموكراتيالىق دامۋ قاعيداسىنا باسىمدىق بەرىلەدى. ال جۇمىس بارىسىندا جاڭا, تىڭ باستامالاردىڭ قولعا الىناتىنى ءسوزسىز, – دەدى Nur Otan پارتياسى توراعاسىنىڭ ءبىرىنشى ورىنباسارى.
سونداي-اق م.اشىمباەۆ ءوز سوزىندە ۇگىت-ناسيحات جۇمىستارى نەگىزىنەن ءۇش باعىت بويىنشا ءجۇرگىزىلەتىنىن دە تىلگە تيەك ەتتى.
– ەڭ الدىمەن ءداستۇرلى بۇقارالىق اقپارات قۇرالدارىنا باسىمدىق بەرىلەدى. ەكىنشىدەن, ەلىمىزدىڭ بارلىق وڭىرىندەگى حالىقپەن تىكەلەي كەزدەسىپ, كانديداتتىڭ سايلاۋالدى باعدارلاماسىن ءتۇسىندىرەمىز. سونداي-اق ناۋقان كەزىندە الەۋمەتتىك جەلىلەردى دە كەڭىنەن پايدالانامىز. بۇل جۇمىستاردىڭ بارلىعى زاڭ شەڭبەرىندە جۇرگىزىلەدى, – دەگەن م.اشىمباەۆ سايلاۋدان كەيىن دە قازاقستان مەن ەۋروپالىق وداق ەلدەرىنىڭ بايلانىسى ودان ءارى جالعاساتىنىنا سەنىم ءبىلدىردى.
ءوز كەزەگىندە سۆەن-ولوۆ كارلسسون قازاقستانداعى قازىرگى ساياسي وقيعالار حالىقارالىق نورمالار مەن ەلدىڭ كونستيتۋتسياسىنا سايكەس ءوربىپ جاتقانىن ايتتى. ول ەكى تاراپتىڭ قارىم-قاتىناسىن ودان ءارى دامىتۋ, ينۆەستيتسيا تارتۋ سالاسىن جەتىلدىرۋ جانە 2015 جىلعى ارىپتەستىك جانە ىنتىماقتاستىق تۋرالى كەلىسىمدە كورسەتىلگەن باسىمدىقتاردى جۇزەگە اسىرۋ جۇمىستارىن جالعاستىرۋ جايىنا دا توقتالدى.
– نۇرسۇلتان نازارباەۆتىڭ وتكەن جىلدىڭ قازان ايىنداعى بريۋسسەلگە جاساعان ساپارىن, سول كەزدەگى اسەم سامميتىندەگى ءسويلەگەن ءسوزىن ءبىز جوعارى باعالايمىز. تاياۋدا عانا بەيجىڭدە وتكەن «ءبىر جول, ءبىر بەلدەۋ» فورۋمىندا دا نۇرسۇلتان نازارباەۆ جاھاندىق ديالوگتى دامىتۋ ماسەلەسىن كوتەردى. بۇل قازاقستاننىڭ الەمدىك قوعامداستىقتا ۇلكەن ابىرويعا يە ەكەنىن كورسەتەدى, – دەدى ول.
