ونەردى وزىمشىلدىك جەڭە مە؟

بايلىقتىڭ وركەۋدەلىگى، وزىمشىلدىگى مەن ونەردىڭ كىرشىكسىز كەلبەتىنىڭ عاسىرلاردان بەرى ءبىر قازانعا باسى سىيعان ەمەس. ايتپەسە، ءحىح عاسىردا ءبىرجان سال بايلىقتىڭ بۋىنا مالدانعان شونجارلارعا ارناپ اشۋ-ىزاعا تولى «جانبوتا»، «اداسقاق» اندەرىن شىرقار ما ەدى. مۇنداي مىسالداردى جىپكە تىزە بەرۋگە بولادى. بىراق وركەنيەتتىڭ ورىنە شىققان قازىرگى زاماندا دا ودان ساباق المايتىنىمىز نەلىكتەن دەگەن ويعا قالاسىز. ال ادىلەتسىزدىكتىڭ بالالار اراسىنداعى باسەكەگە كوشۋى ءتىپتى دە كوز جۇما قارايتىن دۇنيە ەمەس ەكەنىن قالىڭ كورەرمەننىڭ وسى ءبىر جان جابىرقاتار جونسىزدىككە بەيجاي قاراماعانىنان بىلۋگە بولار.

رەسەيدىڭ «بالا داۋىسى» ءان بايقاۋىنىڭ فينالىنا دەيىن جەتكەن قازاقستاندىق ەرجان ماقسىم (ەرجاننىڭ اناسى گۇلميرا الىبەك ۇلىنىڭ «ماكسيم» تەگىن بۇرىنعى قۇجاتتاردىڭ ورىسشا بۇرمالانىپ تولتىرىلۋىمەن تۇسىندىرگەن بولاتىن، ال ءبىز انا تىلىمىزدەگى باستاپقى نۇسقاسى بويىنشا جازدىق) بۇگىندە بارشا وتانداستارىمىزدىڭ، ءتىپتى رەسەيلىك تىڭدارمانداردىڭ ءىلتيپاتىنا بولەندى. ەكىنشى ورىنعا يە بولعان 12 جاسار ەرجان – ورال قالاسىنىڭ تۋماسى. بۇل بايقاۋدا ەرجان رەسەيلىك بەلگىلى كاسىپكەر يان ابراموۆ پەن تانىمال ءانشى السۋ سافينانىڭ قىزى ميكەللاعا جول بەردى. الايدا شوۋدىڭ قورىتىندى شەشىمىنىڭ ادىلدىگىنە كوپتەگەن كورەرمەنمەن بىرگە رەسەي شوۋ-بيزنەسىنىڭ اتاقتى جۇلدىزدارى دا كۇمانمەن قارادى.

وسىلايشا، تمد كەڭىستىگىنە تەز تانىلىپ ۇلگەرگەن بالاقايدى ەلىمىزدە ەركەلە­تىپ «باۋىرساق بالا» دەپ تە اتاي باستادى. جۋىردا مادەنيەت جانە سپورت ءمينيسترى ا.مۇحامەدي ۇلى جەڭىمپاز بالانى قابىلداپ قوشەمەت كورسەتسە، بىرقاتار تەلەارنالار مەن ينتەرنەت ارنالار تىكەلەي سۇحباتقا دا شاقىرىپ ۇلگەردى. سونداي-اق ماسكەۋدە جازدا وتەتىن مۋز-تۆ ارناسىنىڭ كونتسەرتىندە ءان ايتپاق. ياعني، ەرجان ەكىنشى ورىن العانىمەن، ەرلەپ تۇر. بۇل تۋرالى اقپارات قۇرالدارىندا كەڭىنەن جازىلىپ جاتىر.

ءيا، اتالعان بايقاۋدىڭ قورىتىندىسىنا، الەۋمەتتىك جەلىلەردەگى الەۋمەتتىڭ ءار الۋان پىكىرىنە زەر سالا وتىرىپ، قازىرگى قوعامنىڭ تامىرىن تاپ باسۋعا بولادى.

ەڭ باستىسى، بۇل جەردە اتا-انانىڭ ماحابباتى مەن امبيتسياسىنىڭ اراسى ءبىر-اق قادام ەكەنىن بايقاعاندايمىز. «بالا داۋىسى» بايقاۋىنىڭ جەڭىمپازى اتانعان قىزدىڭ اتا-اناسىنا قالىڭ بۇقارا وتكىر سىندى قارشا بوراتىپ جاتىر. بۇل ورىندى دا. سەبەبى بارشا كورەرمەن بايگەدە بالالاردىڭ ونەرىمەن بىرگە اتا-انانىڭ امبيتسياسى دا جارىسقا تۇسكەنىن كوردى. ال بالا الەمى – كىرشىكسىز الەم. وسى بايقاۋدا وزا شاپقانىمەن كوپشىلىكتىڭ كوڭىل تورىنەن ورىن الماعان سوڭ ءبارى بەكەر بولماق. ياكي بالا كوڭىلىنە قىلاۋ ءتۇستى دەۋگە بولادى. بۇل بالاعا قانداي ساباق؟..

راس، ءومىر – جىلتىر جۋرنالداردىڭ مۇقابا­سىن­­داعىداي جارقىراعان مەرەيلى ساتتەردەن دە تۇرا بەرمەيتىنىن ميكەللانىڭ اتا-اناسى كەش اڭداعان بولۋى كادىك. ايتپەسە ءبىر كەز­دە ءوزى دە اتا-انانىڭ قارجىلىق كاپيتالى­مەن شوۋ-بيزنەستىڭ شىمىلدىعىن ەركىن ءتۇر­گەن السۋ بالاسىنىڭ ونەر جولىندا ءدال سون­داي قادامدى قايتالاۋعا بارماس پا ەدى، كىم ءبىلسىن؟.. بىراق قازاقتا «ۇيادا نە كورسەڭ، ۇش­قان­دا سونى ىلەسىڭ» دەگەن دە ءتامسىل بارىن تانىمال وتباسىنىڭ تاريحىنان كورەمىز. الما اعا­شىنان الىسقا تۇسپەيدى. الەۋمەتتىك جەلىدە پىكىر قالدىرۋشىلار رەسەيلىك ساحنادا اجەپ­تاۋىر ورنى بار ءانشىنىڭ 20 جىل بۇرىن «ەۆرو­ۆيدەنيە» بايقاۋىندا جۇلدەگەر بولۋىنا ىق­پال ەتكەن داۋىستىڭ دا قولدان جاسالعانىن ەسكە سالادى. ەندى سوڭعى داۋلى وقيعادان كەيىن السۋدىڭ بيىلعى «ەۆروۆيدەنيە» باي­قاۋىنا قاتىسۋشىلاردىڭ جيناعان ۇپايىن ءمالىم­دەيتىن «روسسيا-1» تەلەارناسىنداعى ميسسياسىنا شەكتەۋ قويىلدى. 

مىنە، «وتىرىكتىڭ قۇيرىعى ءبىر-اق تۇتام» دەگەن وسى. شىندىقتىڭ بار ەكەنىنە كوز جەت­كىز­گەن شۋلى وقيعا ونىڭ ءاردايىم كەشىگىپ جۇرە­تىنىن دە كورسەتكەندەي... دەسە دە، بۇل باي­قاۋ بۇدان كەيىن قامپايعان قالتاسىنا سەنگەن قايسىبىر قاۋىمنىڭ الشاڭ باسقان اياعىن اڭداپ باسۋىنا الىپ كەلەدى دەگەن ءۇمىتتى وياتتى. بۇل اراداعى باستى جەڭىس تە وسى بولسا كەرەك.

البەتتە، بارلىق اتا-انا بالاسىنىڭ قاتا­رى­نان كەم بولعانىن قالامايدى. قولى جەتكەنشە قۇربى-قۇرداستارىنىڭ الدى بولۋىنا قام قىلادى. الايدا، ءبىر مەزەت بالانىڭ دا ءوز مۇمكىندىگىن وزىنە قالدىرۋ كەرەك سياقتى...

ال ەرجانىمىز ەلدىڭ ەرى بولار كۇن الدا!