ايماقتار • 30 ءساۋىر، 2019

شىمكەنتتىڭ تۋريستىك سيمۆولى قوناقتاردى تاڭعالدىردى

شىمكەنتتە ءۇشىنشى مەگاپوليستىڭ تۋريستىك لوگوتيپىنە اينالعان قىزعالداقتاردى ءناسيحاتتايتىن «قىزعالداق جولى» حالىقارالىق فەستيۆالى ءوتتى.

نۇرشات توكەن

شىمكەنتتە ءۇشىنشى مەگاپوليستىڭ تۋريستىك لوگوتيپىنە اينالعان قىزعالداقتاردى ءناسيحاتتايتى «قىزعالداق جولى» حالىقارالىق فەستيۆالى ءوتتى. قالالىقتاردىڭ سۇيىكتى دەمالىس ايماعى – ارباتقا فلوريستەر دايىنداعان شوق گۇلدەر قويىلىپ، فوتوكورمە، بالعىنداردىڭ قىلقالامىنان تۋىنداعان سۋرەتتەر گاللەرەياسى ۇيىمداستىرىلدى. سونداي-اق، شاھاردىڭ ۇلى جىبەك جولى بويىنداعى ەجەلگى قالا ەكەندىگىن تۋريستەرگە ناسيحاتتاۋ ءۇشىن اربات جولىمەن ساۋداگەرلەر مەن قولونەرشىلەردىڭ ەجەلگى كەرۋەنى ءجۇرىپ ءوتتى.

ايتۋلى مادەني شاراعا قالا اكىمى عابيدوللا ءابدىراحىموۆ قاتىسىپ، مەگاپوليس تۇرعىندارى مەن قوناقتارىن قۇتتىقتادى.

«قىزعالداق فەستيۆالى قالامىزدا حالىقارالىق دەڭگەيدە تۇڭعىش رەت ۇيىمداستىرىلىپ وتىر. قىزعالداقتىڭ وتانى – ەلىمىزدىڭ وڭتۇستىگى ەكەنىن ماقتانىش ەتەمىز. سوندىقتان وسى گۇلدى برەندىمىزگە اينالدىرىپ، الەم قىزعالداق ارقىلى شىمقالانى تانىپ-بىلسە دەگەن ماقساتپەن فەستيۆالدى ۇيىمداستىردىق»، دەدى شاھار باسشىسى.

فەستيۆال اياسىندا ارباتتا تۇرعىزىلان شەبەرلەر قالاسىندا جاسوسكىندەر ەڭبەگىمەن ەل القاۋىن العان ءورت ءسوندىرۋشى، پوليتسيا، دارىگەرلەر سەكىلدى ماماندىق يەلەرىمەن جۇزدەسىپ، ءوز ءىسىنىڭ شەبەرلەرىنىڭ جۇمىسىمەن تانىستى.

شىمكەنتتى گۇلگە وراعان فەستيۆال كەشكە دەيىن جالعاسىپ، فلوريستەر شەبەرلىك ساباق وتكىزدى. مەرەكەلىك دۋماننىڭ سوڭى ەسترادا جۇلدىزداردىڭ كونتسەرتتىك باعدارلاماسىنا ۇلاسادى.

- ەلىمىزدىڭ وڭتۇستىگىندەگى ەجەلگى شاھاردىڭ وڭ ءيميدجدىن تەك ەل ىشىندە عانا ەمەس، شەتەلگە شىعارۋعا سەرپىن بەرگەن بۇل رەتكى فەستيۆالدىڭ كوزدەگەنى تۋريستىك ينفراقۇرىلىمدى دامىتۋ، تۋريستىك ونىمدەر مەن قىزمەتتەردىڭ ساپاسىن ارتتىرۋ، مەگاپوليستە ءتۋريزمدى العا جىلجىتۋ، دەيدى فەستيۆال ۇيىمداستىرۋشىلارى.