ەستە جوق ەسكى كەزەڭدە دە حالقىمىزدا قولى شيپالى ەمشىلەر از بولماعان. بۇگىندە كونە دۇنيە قۇپياسىنىڭ كەنەرەسى جاڭا زاماننىڭ جاڭالىعىمەن تولىعا تۇسۋدە. ەجەلگى جۇرتتىڭ ەمدەۋ ءتاسىلى دە سان ءتۇرلى دەرتتى تۇلا بويىڭنان پىشاقپەن سىلىپ العانداي جازىپ جىبەرۋگە قاۋقارلى. بۇگىنگى تاڭدا كوشپەندىلەردىڭ ەجەلگى سالت-داستۇرىمەن بايلانىستى جاتتىعۋدىڭ وسى تۇرىمەن اينالىساتىنداردىڭ قاتارى كوبەيىپ كەلەدى. مامانداردىڭ ايتۋىنا قاراعاندا, كەيبىرەۋگە شەكەسىنەن قارايتىن شەت ەلدىكتەر دە قازاق گيمناستيكاسىنا قىزىعۋشىلىق تانىتۋدا ەكەن.
ورتالىق مامانى اباي بايماعامبەتوۆ باعزى زامانداعى قازاق سىنىقشىلارى قولدانعان مىڭنان اسا ءتاسىلدى ساراپتاي كەلە, «ايكۇنە» دەپ اتالاتىن جاڭا جاتتىعۋ ءتۇرىن ويلاپ تاپقان. وسى ەمدەۋ ءتاسىلى كۇللى الەمگە تانىلىپ وتىر. ورتالىقتىڭ اشىلعانىنا قالا تۇرعىندارى دا قۋانىشتى.
العاشقى اشىلۋ كۇنى جينالعان جۇرتشىلىققا جاتتىعۋ تاسىلدەرى كورسەتىلىپ, قىر-سىرى ۇعىندىرىلدى. مامانداردىڭ ايتۋىنا قاراعاندا, ومىرتقا اۋرۋلارىنىڭ ەمى العاشقى كۇننەن-اق ءوز ناتيجەسىن كورسەتە باستاعان.
–جاتتىعۋ ومىرتقاارالىق نۇكتەلەر ارقىلى جاسالادى. قازاق گيمناستيكاسىنىڭ باسقا گيمناستيكالاردان ايىرماشىلىعى – ەمدىك شاراسىنىڭ باسىمدىعى. العاشقى جاتتىعۋدان-اق ەم الۋشىنىڭ بويى سەرگىپ, ناتيجەسىن بايقايدى. تاعى ءبىر ايتا كەتەرلىگى, ادامنىڭ جان-دۇنيەسى مەن ساناسىن سەرپىلتۋ باعىتىندا جۇمىس ىستەيمىز, دەيدى قازاق گيمناستيكاسىنىڭ جاتتىقتىرۋشىسى ءلايلا ماقىشەۆا.
«ايكۇنە» جاتتىعۋ ءتاسىلى بۇگىنگى تاڭدا ەۋروپا كەڭىستىگىنە قازاقتىڭ ءتول ونەرى رەتىندە تانىلا باستادى. ۇلى دالاداعى وسى ءبىر ەمدىك ءتاسىلدىڭ تاريحىنا دەگەن قىزىعۋشىلىق تا تۋىنداۋدا. باعزى زاماندا ات ۇستىنەن تۇسپەگەن اتا-بابامىز ومىرتقا اۋرۋى دەگەننىڭ نە ەكەنىن دە بىلمەگەن. ەندى سولاردان قالعان وزىق ءتاسىل بەل, دەمىكپە اۋرۋلارىنا دا مىڭ دا ءبىر داۋا.
