وبلىستىق توتەنشە جاعدايلار قىزمەتى مەن ورمان شارۋاشىلىعى اۋماقتىق ينسپەكتسياسىنىڭ بەرگەن دەرەكتەرىنە كوز سالساڭىز, ءورتتىڭ الدىن الۋعا, قورعاۋعا دەگەن دايىندىق مۇزداي قاتىپ تۇر. 10 باللدىق كورسەتكىشتىڭ 7,9 پروتسەنتىن قامتيدى. بىراق, سوعان قاراماستان, قىزىل جالىننىڭ وڭەشىنە ىلىككەن جاسىل ورمان كۇيىك شالىپ, باۋداي بۇراتىلىپ ءتۇسىپ جاتىر. ول ازداي زاڭسىز اعاش كەسۋشىلەر دە تىيىلار ەمەس. وتكەن جىلى زاڭسىز اعاش كەسۋ بويىنشا 22 وقيعا ورىن السا, بيىل وسىنداي كەلەڭسىز جاعداي ەكى رەت قايتالانعان. مۇنىڭ ءبىر سەبەبى, قالا تۇرعىندارى ساتىپ الاتىن وتىننىڭ قىمباتتاۋىندا. ياعني, ورمان قاراقشىلارى سۇرانىس بولعاننان كەيىن اعاش ۇرلاپ ساتۋدى كادىمگىدەي كاسىپكە اينالدىرىپ وتىرعاندىعىن نەسىن جاسىرامىز. قالاعا كەلەتىن سانتاراۋ دالا جولى بار. ونىڭ بارىندە قاپىسىز كۇزەت ۇيىمداستىرۋعا ورمانشىلاردىڭ قاۋقارى جەتە بەرمەيدى. كولىگى تاپشى, كىسىسى كەم.
قالا ىرگەسىندەگى «بۇقپا» ورمان شارۋاشىلىعى اۋماعىندا وتكەن جىلى بەس مارتە ورمان ورتەنسە, بيىلعى جىلى قىزىل جالىننىڭ الاپات ءتىلى سۋماڭداپ, ەكى مارتە قولدىڭ سالاسىنداي اق قايىڭدار مەن ماڭگى جاسىل قاراعايلاردى, ءالى بۇرشىگىن جارا قويماعان تال-تەرەكتى جايپاپ كەتتى. تابيعاتى تامىلجىعان ساندىقتاۋ ولكەسىندە دە ءورت پەن ۇرىدان كەلگەن زالال كوپ. قازىر بۇل وڭىردە وسىنداي وقيعالارعا بايلانىستى تەرگەۋ جۇمىستارى جۇرگىزىلۋدە. قالاي بولعان كۇندە دە وتانىمىزدىڭ ءبىر بايلىعى – ورمانىمىزعا اباي بولايىقشى!
اقمولا وبلىسى
