8 بەن 12 جاس ارالىعىنداعى دارىندىلار بايقاۋىنىڭ مەنەدجەرى تولعاناي حاسەن قاتاڭ تالاپتان ىركىلمەي وتكەن بالدىرعاندار عانا سۋپەرفينالدا ونەر كورسەتەتىنىن, ودان باعى جانعانى مۋزىكالىق وقۋ ورنىنا ارنالعان ءبىلىم گرانتىمەن قوسا, «ديسنەيلەند» ەرتەگىلەر ەلىنە ساياحات جاساۋ باقىتىنا يە بولاتىنىن جەتكىزدى.
اۋداندار مەن ەلدى مەكەندەردەن وبلىس ورتالىعىنداعى وقۋشىلار سارايىنا جينالىپ, كاستينگكە قىزۋ دايىندىققا كىرىسكەندەردىڭ اراسىنان كيىم ۇلگىسى دە, ءان ايتۋ مانەرى دە وزگەشە ءبىر قىز كوزىمىزگە وتتاي باسىلدى. سويتسەك, ول پەتروپاۆل قالاسىنداعى №2 ورىس مەكتەبىنىڭ وقۋشىسى بولىپ شىقتى. «توعىز جاستامىن, ەسىمىم دانا باسكەنوۆا» دەپ قازاقشا امانداستى. انا ءتىلىن جاتىق بىلەتىنى قۋانتتى ءارى ءبىزدىڭ ءوتىنىشىمىزدى جەرگە تاستاماستان قازاقشا ءاندى شىرقاي جونەلدى.
شالعايداعى ءۋاليحانوۆ اۋدانىنان كەلگەن ايگەرىم اباي قازاق, ورىس, اعىلشىن تىلدەرىندە ءۇش ءان دايىنداپ كەلگەنىن ايتتى. دومبىرا دا تارتادى ەكەن. ءان ايتۋ ونەرىن مەڭگەرۋگە اناسى باعلان مەن تەحنولوگيا ءپانىنىڭ مۇعالىمى گاۋھار كوپ كومەكتەسىپتى. ايماقتىق «ءانشى بالاپان» كونكۋرسىنا قاتىسىپ, جۇلدەلى ورىندى يەلەنىپتى.
قازىلار القاسىنىڭ ءمۇشەلەرى فاريدا نيازوۆا مەن ءالىمجان وماروۆ باعىن سىناۋعا كەلگەن 102 ۇمىتكەرگە كاستينگتىڭ ەرەجەلەرى مەن شارتتارى دارىندى بالالاردى انىقتاۋ جانە قولداۋ, شىعارماشىلىق الەۋەتىن ءجۇزەگە اسىرۋ, قابىلەتتەرىن ودان ءارى دامىتۋعا كومەكتەسۋ ەكەنىن تۇسىندىرگەننەن كەيىن ىرىكتەۋ جارىسى باستالىپ كەتتى. ساحناعا العاش كوتەرىلگەندەردىڭ قاتارىندا 11 جاستاعى ايگۇل «تۋعان جەر» ءانىن ناقىشىنا كەلتىرە ورىنداپ, قازىلار القاسىن قاتتى تولقىتتى. 6 جاستاعى نارعىز دا اپكەلەرىنەن قالىسا قويعان جوق. ءسوز مانەرىنەن ۇلتتىق بالاباقشادا تاربيەلەنگەنى بىردەن بىلىنەدى. اڭگىمە اراسىندا كاستينگتە قازاقشا اندەردىڭ مولىنان قامتىلعانىن ايتا كەتكەن ءجون. ورىس قىزى يرينا «مارالدىمدى» شىرقاعاندا زالداعىلار سىلتىدەي تىنىپ تىڭدادى.
مادەنيەت جانە سپورت مينيسترلىگى مەن تۇڭعىش پرەزيدەنت قورىنىڭ قولداۋىمەن «جاندانۋ الەمى» قورى ۇيىمداستىرعان وڭىرلىك ءان بايقاۋى جاس تالانتتاردىڭ شىعارماشىلىق قابىلەت-قارىمىن تانىتۋعا جان-جاقتى مۇمكىندىكتەر بەردى. مىنا قىزىقتى قاراڭىز! جارىستىڭ شىمىلدىعى اشىلار قارساڭىندا جولىقتىرىپ, ءان ايتۋ ونەرىنە سۇيسىنگەن دانا ءباسكەنوۆا ىرىكتەۋ كەزەڭىنىڭ جەڭىمپازى اتاندى.
ول ەندى الماتىدا وتەتىن اقتىق سايىستا وبلىس نامىسىن قورعايتىن بولادى.
سولتۇستىك قازاقستان وبلىسى
