اقتاۋدان گاسترولدىك ساپارمەن كەلگەن ن.ءجانتورين اتىنداعى ماڭعىستاۋ وبلىستىق مۋزىكالىق دراما تەاترى قالا اكىمدىگىنىڭ اقپاراتتىق-كوممۋنيكاتسيالىق ورتالىعىندا كەزەكتى ونەر ساپارىنىڭ جوسپارىمەن ءبولىستى.
2003 جىلدىڭ 21 ناۋرىزىندا ع.مۇسىرەپوۆتىڭ «قىز جىبەك» مۋزىكالىق دراماسىمەن اشىلعان ونەر ۇجىمىن باستاپ كەلگەن تەاتر ديرەكتورىنىڭ ورىنباسارى توقتامۇرات تىلەۋ اتالعان مەكەمە تۋرالى قىسقاشا تانىستىرىپ ءوتتى.
«قۇرامىندا 200-گە جۋىق قىزمەتكەرى بار شىعارماشىلىق ۇجىم 16 جىلدىڭ ىشىندە ءۇش حالىقارالىق جانە ءبىر رەسپۋبليكالىق تەاتر فەستيۆالىنىڭ باس جۇلدەسىن, بىرنەشە رەت اتاۋلى نوميناتسيالادى يەلەنگەن. ءوزىمىز فەستيۆالدى كوپ ۇيىمداستىرامىز جانە بايقاۋلارعا كوپ قاتىسامىز. قۇر قول قايتقان كەزىمىز جوق. الداعى جوسپارلارىمىز تۋرالى ايتار بولساق, زامانىمىزدىڭ زاڭعار جازۋشىسى, كەمەڭگەر قايراتكەرى ءا.كەكىلباەۆتىڭ 80 جىلدىعىنا وراي تۇركسوي ۇيىمىمەن بىرلەسىپ جانە قر مادەنيەت مينيسترلىگىنىڭ قولداۋىمەن «ءابىش الەمى» اتتى ءى حالىقارالىق تەاتر فەستيۆالىن وتكىزۋگە دايىندالىپ جاتىرمىز. وسى رەتكى ساپارىمىزدا 22-25 ءساۋىر كۇندەرى شىمكەنتتىك كورەرمەندەرگە «شىڭىراۋ» (دراما), «اتىڭ ءوشسىن,...!» (تراگيفارس), «ءاليحاننىڭ اماناتى» (رەكۆيەم), «حانۋما» (پوپ-ارت مۋزىكالىق كومەديا) قويىلىمدارىن ۇسىنباقپىز», دەدى توقتامۇرات تىلەۋ.
«ەلىمىزدەگى ەڭ جاس تەاتر بولساق تا, اكتەرلەرىمىز وزدەرىن شىعارماشىلىق تۇرعىدان ۇنەمى شىڭداپ كەلەدى», دەيدى قوناقتار. ونىڭ جارقىن دالەلى رەتىندە «دارىن» مەملەكەتتىك جاستار سىيلىعىنىڭ جانە «ەڭلىكگۇل» كاسىبي سىيلىعىنىڭ يەگەرى مەدعات ومىراليەۆتى ايتۋعا بولادى. مۇنان بولەك, تەاتر ارتىستەرى وتاندىق سەريالدار مەن فيلمدەرگە («كۇلاش», «قىز جولى», «اقىلدىڭ كىلتى», «تار زامان», «بالۋان شولاق») ءتۇسىپ, ۇلتىمىزدىڭ كوپتەگەن مەملەكەت جانە ونەر قايراتكەرلەرىنىڭ رولدەرىن ءساتتى سومداپ, رەسپۋبليكا كورەرمەندەرىنىڭ اراسىندا تانىمالدىققا يە بولعان.
تەاتر ارتىستەرى الداعى ەكى كۇندە قالا تۇرعىندارى مەن قوناقتارىن شىمكەنت قالالىق ورىس دراما تەاترىنا ءوز ونەرلەرىن تاماشالاۋعا شاقىردى.
