قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەدي ۇلى باستاعان ەلىمىزدىڭ ءبىر توپ ونەر مايتالماندارى, جوعارعى وقۋ ورىندارىنىڭ رەكتورلارى مەن ونەر مەكەمەلەرىنىڭ باسشىلارى باس قوسقان شارا شىمىلدىعى اكادەميانىڭ «تەاتر ونەرى», «ەسترادا ونەرى» «ۇلتتىق ونەر» فاكۋلتەتتەرى جانە «Astana Musical» تەاترى ارتىستەرىنىڭ ناۋرىز مەرەكەسىنە ارنايى دايىنداعان تەاترلاندىرىلعان سالت-ءداستۇر كورىنىسىمەن اشىلدى.
ناۋرىزدى جاڭاشا تويلاۋ تۋرالى تىڭ باستاما كوتەرىپ جۇرگەن مادەنيەت جانە سپورت ءمينيسترى ارىستانبەك مۇحامەدي ۇلى مەرەكەگە جينالعان قاۋىمعا: «ءتول مەرەكەمىز ءاز-ناۋرىزدىڭ بۇگىن تويلانىپ جاتۋىنىڭ وزىندىك ەرەكشەلىگى بار. سىزدەردى ناۋرىز مەرەكەسىمەن قۇتتىقتاۋ ءۇشىن ەلىمىزدىڭ الدىڭعى بۋىن ونەر وكىلدەرى, قازاق ونەرىنىڭ ماقتانىشتارى جيىلىپ وتىر. ارينە, ت.جۇرگەنوۆ اتىنداعى قازاق ۇلتتىق ونەر اكادەمياسى سياقتى ىرگەلى ونەر ورداسىندا ۇلتتىق مەرەكەمىزدىڭ ءدال وسىنداي جوعارى دەڭگەيدە ۇيىمداستىرىلۋى زاڭدىلىق. سەبەبى ونەردىڭ باستاۋ-بۇلاعى, قاينارى – وسىندا. بارلىعىڭىزدى ناۋرىز مەرەكەسىمەن قۇتتىقتايمىن» , دەپ جۇرەكجاردى تىلەگىن ارنادى.
اكادەميا رەكتورى اسحات ماەميروۆ بيىلعى ناۋرىزدى تويلاۋدا ارىستانبەك مۇحامەدي ۇلىنىڭ رەسپۋبليكالىق «ەگەمەن قازاقستان», «ايقىن», «اباي.كز» باسىلىمدارىندا جارىق كورگەن «ناۋرىزعا – جاڭا كوزقاراس» ماقالاسىندا ايتىلعان تىڭ ويلاردىڭ نەگىزگە الىنعانىن, اسەر-ىقپالى بولعانىن جاسىرمادى. ماقالاداعى «ناۋرىزعا ابدەن جاتتاندى بولعان شاپان مەن كامزولدىڭ ورنىنا, اركىم ءوزىنىڭ ۇستىنە قونىمدى, ءسان-سالتاناتى كەلىسكەن, ماقتانىشپەن كورسەتەتىن زاماناۋي ۇلگىمەن كيىنىپ, ىسىراپقا جول بەرمەۋگە بارىنشا دەن قويدىق. سونداي-اق بۇل كۇنگى باستى ماقساتىمىز – بۇلدىرشىندەردى قۋانتۋ», دەدى رەكتور. وسىعان وراي ورتاعا الماتىداعى № 1 بالالار ءۇيىنىڭ بالعىندارى شاقىرىلىپ, اكادەميا ۇجىمى اتىنان بالالارعا كيىم-كەشەك, تاتتىلەر مەن ويىنشىقتار تارتۋ ەتىلدى.
قازاقستاننىڭ حالىق ءارتيسى, ابىز اكتەر ءسابيت ورازباەۆ سىيلىقتارعا يە بولعان بۇلدىرشىندەردى جانە اكادەميانىڭ ستۋدەنتتەرى مەن قىزمەتكەرلەرىن مەرەكەمەن قۇتتىقتاپ, كيەلى شاڭىراقتان تۇلەپ ۇشاتىن جاستارعا اق باتاسىن بەردى.
مەرەكەگە قازاقستاننىڭ ەڭبەك ەرى, كسرو جانە قازاقستاننىڭ حالىق ءارتىسى ءاسانالى ءاشىموۆ, قازاقستاننىڭ حالىق ءارتىسى, مەملەكەتتىك سىيلىقتاردىڭ لاۋرەاتى ءسابيت ورازباەۆ, قازاقستاننىڭ ەڭبەك سىڭىرگەن قايراتكەرى, قازاق ۇلتتىق ونەر اكادەمياسىنىڭ پروفەسسورى پەرنەبەك مومىنوۆ, قازاقستان رەسپۋبليكاسىنىڭ مەملەكەتتىك سىيلىعىنىڭ يەگەرى, جازۋشى-دراماتۋرگ دۋلات يسابەكوۆ, س.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ رەكتورى تالعات نۇرعوجين, قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى گاۋحار الدامبەرگەنوۆا, قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ارمان جۇدەباەۆ, قازاقستاننىڭ حالىق ارتىستەرى نۇرعالي ءنۇسىپجانوۆ, لاكي كەسوگلۋ, بەلگىلى رەجيسسەرلەر ساتىبالدى نارىمبەتوۆ, باقىت قايىربەكوۆ, سماعۇل ەلۋباي, سونداي-اق م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى ءسابيت ابدىحالىقوۆ, جامبىل اتىنداعى مەملەكەتتىك فيلارمونيانىڭ ديرەكتورى اسقار بورىباەۆ, چايكوۆسكي اتىنداعى مۋزىكالىق كوللەدجدىڭ ديرەكتورى ءبىرجان حاسانعاليەۆ, اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ديرەكتورى ايا قاليەۆا, «استانا وپەرا» تەاترىنىڭ باس ديرەكتورى عالىم احمەدياروۆ جانە ءمۇسىنشى سەرگەباەۆ سىندى ەلگە بەلگىلى تانىمال تۇلعالار قاتىستى.
ودان ءارى ناۋرىز تويى تۇساۋكەسەر ءراسىمى, ۇيلەنۋ تويىنىڭ راسىمىنە ۇلاسىپ, بوبەكتىڭ تۇساۋىن ارىستانبەك مۇحامەدي ۇلى كەسىپ, قۇتتى مەرەكە قارساڭىندا باس قوسىپ, شاڭىراق كوتەرۋگە نيەتتەنگەن جۇرگەنوۆتىك قوس شاكىرتكە قازاق ونەرىنىڭ كوريفەيى ءاسانالى ءاشىموۆ باتاسىن بەردى.
وسىلايشا جۇرگەنوۆتىكتەر ناۋرىز مەرەكەسىن تويلاۋدىڭ جاڭا ۇلگىسىن ۇسىنىپ, مەرەكەنىڭ قازاقى ونەرىن مەيىلىنشەتۇرلەندىرىپ, فولكلورلىق-ەتنوگرافيالىق اۋقىمنان مەيىرىم مەن ادامگەرشىلىكتى دارىپتەگەن ىزگىلىكتى مەرەكە دارەجەسىنە جەتكىزدى.
مەرەكە سوڭى سالت-ءداستۇردى ناسيحاتتايتىن تەاترلاندىرىلعان كورىنىستەر مەن مۋزارت, كەشيۋ توبى باستاعان تانىمال شەبەرلەردىڭ ونەرىنە ۇلاسىپ, ۇلتتىق ويىندارمەن ايشىقتالدى.
