ايماقتار • 24 ءساۋىر، 2019

ورالدا اۋىل رەجيسسەرلارى شەبەرلىگىن شىڭدادى

622 رەت كورسەتىلدى

ورال قالاسىندا قىزىلوردا، اقتوبە، اتىراۋ، ماڭعىستاۋ جانە باتىس قازاقستان وبلىستارىنىڭ حالىقتىق تەاتر جانە كوپشىلىك شارالارى رەجيسسەرلەرىنە ارنالعان «كەڭىستىك. رەجيسسۋرا. قولتاڭبا» ايماقتىق شەبەرلىك ساعاتى ءوتتى.

حاديشا بوكەەۆا اتىنداعى باتىس قازاقستان وبلىستىق قازاق دراما تەاترىندا وتكەن ءبىر اپتالىق شەبەرلىك ساباعىنا ەلىمىزدىڭ باتىس ايماعىنداعى 5 وبلىس وكىلدەرى قاتىستى. اۋىل-اۋداندارداعى حالىق تەاترلارىنىڭ رەجيسسەرلەرى جانە كوپشىلىك شارالاردى ۇيىمداستىرۋشى ماماندار ءۇشىن بۇل ساباقتار وتە پايدالى بولدى. اۋىل رەجيسسەرلەرىنىڭ الدىندا بەلگىلى الماتىلىق مامان، م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ قويۋشى رەجيسسەرى دينا جۇماباي مەن وڭتۇستىك قازاقستان مەملەكەتتىك ۋنيۆەرسيتەتى «ونەر» كافەدراسىنىڭ وقىتۋشىسى، شىمكەنت قالاسى ءازىل-سىقاق جانە ساتيرا تەاترىنىڭ قويۋشى رەجيسسەرى سامات التاەۆ ءدارىس وقىپ، پراكتيكالىق ساباق وتكىزدى.

اۋىل ونەرپازدارى دينا جۇمابايدىڭ «قازىرگى تەاترداعى كلاسسيكا جانرى»، «قازىرگى تەاتر رەجيسسۋراسى»، «ستانيسلاۆسكيدەن مەيەرحولدقا دەيىن» تاقىرىبىنداعى دارىستەرىن قىزىعا تىڭدادى. ال سامات التاەۆتىڭ «بۇقارالىق ءىس-شارا ۇيىمداستىرۋداعى رەجيسسەرلىك ينتەرپرەتاتسيا»، «قوعامدىق ماڭىزدى رەسمي مەرەكەلەردى ۇيىمداستىرۋ»، «ۇلتتىق جانە ءداستۇرلى شارالار، زاماناۋي شارالار»، «كوپشىلىك مادەني تىنىعۋ جۇمىستارىنداعى رەجيسسەرلىك ۇستانىم، ەتيكا، قولتاڭبا»، «مەملەكەتتىك رەسمي مەرەكەلەردى ۇيىمداستىرۋداعى رەجيسسەرلىك كوزقاراس» تاقىرىبىنداعى ترەنينگ-ساباقتارى ەلدىمەكەندەردە كوپشىلىك شارالاردى ۇيىمداستىرۋ جونىندە تاپتىرماس كومەك بولدى.

- شاراعا بارلىعى 24 رەجيسسەر قاتىستى. شەبەرلىك ساعاتى اۋىل رەجيسسەرلەرى ءۇشىن شىن مانىندە دامۋ، شىعارماشىلىق تاجىريبە الماسۋ الاڭى بولدى. كاسىبي بىلىكتىلىگىن ءوسىرىپ، شەبەرلىگىن شىڭداپ، زامان تالابىنا ساي ءوزىن-ءوزى دامىتتى دەپ ويلايمىن. شاقىرىلعان ترەنەرلەر تىڭداۋشىلارعا دايىن ستسەناري بەرمەي، سوعان جەتۋ جولدارىن، تاقىرىپتى يگەرۋ ادىستەرىن ايتتى. وتە پايدالى كەزدەسۋ بولدى، - دەيدى وسى شارانى ۇيىمداستىرۋشى باتىس قازاقستان وبلىستىق حالىق شىعارماشىلىعى ورتالىعىنىڭ كوركەمدىك جەتەكشىسى، رەجيسسەر ارايلىم يحسانوۆا.

بۇگىندە باتىس قازاقستان وبلىسىندا 11 حالىق تەاترى جۇمىس ىستەيدى. اۋىل رەجيسسەرلەرىنىڭ سەمينارعا قاتىسۋ شىعىنىن اۋداندىق مادەنيەت بولىمدەرى كوتەرگەن. ءبىر اپتالىق شارا سوڭىندا قاتىسۋشىلارعا ارنايى سەرتيفيكاتتار تابىستالدى.


باتىس قازاقستان

سوڭعى جاڭالىقتار

ۇقساس جاڭالىقتار