رۋحانيات • 24 ءساۋىر، 2019

الماتىدا دۇنيەجۇزىلىك كىتاپ كۇنىنە ارنالعان جيىن ءوتتى

808 رەت كورسەتىلدى

23 ءساۋىر - الەم ادەبيەتى ءۇشىن ءمانى بار اتاۋلى كۇن. كىتاپ پەن سوزگە دەگەن سۇيىسپەنشىلىكتە، شىن مانىندە، شەك جوق. جىل سايىن بۇل كۇن الەمنىڭ 100-دەن استام ەلىندە دۇنيەجۇزىلىك كىتاپ جانە اۆتورلىق قۇقىق كۇنى رەتىندە اتالىپ وتەدى.

ءىس-شارا كىتاپ پەن اۆتورلارعا قۇرمەت كورسەتىپ، كىتاپ وقۋدى ناسيحاتتاۋدى  ماقسات ەتەدى. بۇل مەرەكە جاڭا تەحنولوگيالار عاسىرىندا كىتاپتىڭ بۇرىنعىشا كوشباسشىلىق ورىندا تۇراتىنىن، ال كىتاپ وقۋ جانعا ءلاززات سىيلايتىندىعىن ەسكە سالۋعا باعىتتالعان.

وسىعان وراي، 23 ساۋىردە الماتىداعى قازاقستان رەسپۋبليكاسىنىڭ ۇلتتىق كىتاپحاناسىندا ءداستۇرلى تۇردە دۇنيەجۇزىلىك كىتاپ كۇنى اتالىپ ءوتتى.

«KITAP SHOY´- 2019» -مەرەكەسىنىڭ مازمۇندى باعدارلاماسىندا كىتاپ كورمەلەرى، ادەبي ۆيكتورينالار جانە تەاترلاندىرىلعان كورىنىستەر، تانىمال جازۋشىلارمەن كەزدەسۋلەر، كىتاپتاردىڭ تۇساۋكەسەرى جانە كونتسەرتتەر، ەڭ ۇزدىك وقىرماندار مەن اۆتورلارعا قۇرمەت كورسەتۋ سياقتى قىزىقتى شارالار قامتىلدى. بۇل، شىن مانىندە،  كوپتىلدى كىتاپ وقۋ مەرەكەسى جانە ۋاقىتتى پايدالى وتكىزۋدىڭ تاماشا مۇمكىندىگى بولدى.

كىتاپ وقۋعا، رۋحاني قازىنانى قۇرمەتتەۋگە شاقىرعان شارانى الماتى قالاسىنداعى يۋنەسكو-نىڭ كلاستەرلىك بيۋروسى، قازاقستان رەسپۋبليكاسىنداعى رەسەي ىنتىماقتاستىق وكىلدىگى، الماتى قالاسىنداعى قىتاي حالىق رەسپۋبليكاسىنىڭ باس كونسۋلدىعى، الماتى قالاسىنداعى گەتە-ينستيتۋتى، الماتى قالاسىنىڭ مادەنيەت باسقارماسى، الماتى قالاسى  ورتالىقتاندىرىلعان كىتاپحانالار جۇيەسى، «EDU Stream» ءبىلىم بەرۋ كومپانياسى، «ادەبيەت الەمى» جاستاردى  قولداۋ ورتالىعى، «داريا» دامۋ ورتالىعى قولداي وتىرىپ، مەرەكە سەرىكتەستەرى رەتىندە جان-جاقتى باعدارلامامەن بايىتا ءتۇستى. مىسالى، قازاقستان رەسپۋبليكاسىنداعى رەسەي ىنتىماقتاستىق وكىلدىگى «كەڭەس اقىندارى – بالالارعا بازارلىق»  ادەبي-تەاترلاندىرىلعان كومپوزيتسيا ۇسىنسا، قحر-ءدىڭ الماتى قالاسىنداعى باس كونسۋلدىعى «سيان سينحاي: «قازاقستانداعى ءومىر» كىتابىنىڭ اۆتورى قالامقاس اريسلانوۆامەن  كەزدەسۋ وتكىزىپ، سيان سينحايدى ەسكە الۋ فوتوكورمەسىن ۇيىمداستىردى. كىتاپحانا قوناقتارىنا «قىتاي ەرتەگىلەرى» اتتى كىتاپتارىن سىيعا تارتتى. قازاقستان گەتە-ينستيتۋتى «ينتەراكتيۆتىك وقۋ: برەمەن مۋزىكانتتارى»، بالالار ادەبيەتىنىڭ كورمەسىمەن جانە «Actionbound» موبيلدىك ويىنىمەن قۋانتتى. الماتى قالاسى ورتالىقتاندىرىلعان كىتاپحانا جۇيەسى بولسا، بالالار جازۋشىسى، "زولوتوە پەرو رۋسي" ۇلتتىق ادەبي سىيلىعىنىڭ، "التىن قالام-2011" قازاقستاندىق ادەبي سىيلىعىنىڭ لاۋرەاتى، بالالارعا ارنالعان "جەلتايا گۋسەنيتسا" 1 بۇكىلرەسەيلىك جازۋشىلار بايقاۋىنىڭ جەڭىمپازى ەلەنا كلەپيكوۆا جانە بالالار اقىنى، اۋدارماشى، رەسپۋبليكالىق «ءمولدىر بۇلاق» جۋرنالىنىڭ رەداكتورى سايات قامشىگەرمەن كەزدەسۋ وتكىزىپ، كىتاپتىڭ ادام ومىرىندەگى ماڭىزى تۋرالى اڭگىمە ءوربىتتى. «ادەبيەت الەمى» الماتى قالاسى جاستار ساياساتىن دامىتۋ ورتالىعى كىتاپسۇيەر كوپشىلىكتى «وتان، ساعان جىر ءورىمىن ۇسىنام» اتتى اقىن مۇراتحان شوقاننىڭ جەكە شىعارماشىلىق  كەشىمەن قاۋىشتىردى. سونداي-اق تانىمال كينورەجيسسەر ەرمەك تۇرسىنوۆپەن  جانە «شال» ءفيلمىنىڭ اكتەرلەرىمەن شىعارماشىلىق كەزدەسۋ ءوتتى.

الماتى







سوڭعى جاڭالىقتار

جارىس پەن تابىس

ەكونوميكا • بۇگىن، 00:00

اقىلدىڭ ازابى

تاريح • كەشە

مەيرامحانالار جانە پاندەميا

كوروناۆيرۋس • كەشە

جۇرت جاعاجاي ىزدەپ ءجۇر

ايماقتار • كەشە

ۇقساس جاڭالىقتار