ءۇمىت — ءبىلىمدى ۇرپاقتا

امانگەلدى سوپبەكوۆ, پوليتەحنيكالىق كوللەدج ديرەكتورى, وبلىستىق ءماسليحاتتىڭ دەپۋتاتى, عىلىم دوكتورى. ەلباسى يندۋستريالىق-يننوۆاتسيالىق دامۋ باعدار­لاماسى بويىنشا ۇكىمەتكە تاپسىرمالار بەردى. جاقىندا وبلىسىمىزعا پرەمەر-ءمينيستردىڭ ءبىرىنشى ورىنباسارى ومىرزاق شوكەەۆ باستاعان جەدەل جۇمىس توبى ىسساپارمەن كەلدى. وڭىردەگى قولعا الىنىپ جاتقان ءىرى جوبالاردى كوردى, دامۋ باعدارلاماسىنا كىرگەن جۇمىستاردىڭ اياعىنا دەيىن ەش كەدەرگىسىز ورىندالاتىندىعىن ايتتى. ء“بىزدىڭ شيكىزاتتىق ەمەس ەكسپورتشىلاردى قولداۋ يندۋستريالاندىرۋدىڭ شەشۋشى باعىتى بولۋى كەرەك”, دەپ اتاپ كورسەتتى مەملەكەت باسشىسى. شىنىندا, قازاقستان جۇرتتىڭ كوزى ۇيرەنگەن شيكىزات وتانى بولۋدان گورى يندۋستريالىق-يننوۆاتسيالىق دامۋدى نەگىزگە العان مەملەكەت بولارلىقتاي جاعدايى بار. مەملەكەتىمىز وڭدەۋشى كاسىپورىندارعا ۇلكەن ارتىقشىلىقتار جاساۋدا. وسىنداي مۇمكىندىكتەردى جۇزەگە اسىرۋدا ءبىلىمدى ۇرپاققا ارتىلىپ وتىرعان ءۇمىت ەرەكشە. كاسىپتىك جانە تەح­نيكالىق ءبىلىم بەرۋ كاسىبي ستاندارتتارعا نەگىزدەلىپ, قاتاڭ تۇردە ەكونوميكانىڭ قاجەتتىلىكتەرىمەن ءوزارا باي­لانىستىرىلۋى كەرەك, دەگەن نۇرسۇلتان ءابىش ۇلى جوعارى ءبىلىم ساپاسى ەڭ جوعارى حالىقارالىق تالاپتارعا جاۋاپ بەرۋى ءتيىس ەكەندىگىن دە اتاپ كورسەتتى. ەلدەگى جوعارى وقۋ ورىندارى الەمنىڭ جەتەكشى ۋنيۆەرسيتەتتەرىنىڭ رەي­تين­گى­نە ەنۋگە ۇمتىلعاندارى ءجون. مۇنداي جوعارى تالاپتارعا جالپى ءبىلىم بەرەتىن ورتا مەكتەپتەرىمىز دايىن با دەگەن ساۋال توڭىرەگىندە ويلاساتىن ماسەلەلەر دە بارشىلىق. وڭتۇستىك قازاقستان وبلىسىنىڭ اكىمى اسقار مىرزاحمەتوۆ پروبلەمالاردى كورە ءبىلۋ, شەشۋ جولدارىن ىزدەۋ قاسيەتىمەن ەرەكشەلەنەدى. وبلىستىق ءماسليحاتتىڭ دە­پۋتاتى بولعاننان كەيىن سايلانعان وكرۋگىمىزدەن ارىز­دار ءتۇسىپ جاتادى. ونىڭ ءبىرپاراسى مەكتەپتەرگە بايلا­نىستى. ءتۇرلى قۇقىق قورعاۋ ورگاندارى بال كورگەن اراداي مەكتەپتەر مەن اۋرۋحانالاردى اينالشاقتاپ جۇرەدى, ءىرىلى-ۇساقتى كەمشىلىك تاپسا, باسشىلارىن اۋرەلەيدى. ونىڭ سوڭى مەكتەپ باسشىلارىنىڭ ۇستازداردان اقشا جيناپ, تەكسەرۋشىلەردىڭ اۋزىن مايلاۋىنا ۇلاسىپ جاتادى. وتكەن جىلى وبلىس مەكتەپتەرى 2983 مارتە تەكسەرۋدەن ءوتىپتى. الىپ-ساتاتىن ساۋدا ورنى, تاۋارلار شىعارىپ جاتقان ءون­دىرىس ەمەس, جاس ۇرپاقتى تاربيەلەپ جاتقان ءبىلىم وشاق­تا­رىنا تەكسەرۋشىلەر نەگە ءۇيىر, الدە تىسكە جۇمساق كورە مە؟ وبلىس باسشىسى ءبىلىم وشاقتارىنداعى سىبايلاس جەمقورلىققا قاتىستى قۇقىق بۇزۋشىلىقتىڭ قارجىعا قاتىستىلىعىن ايتىپ, ۇكىمەت الدىنا مەكتەپتەگى ەسەپ-قيساپ شتاتتارىن قىسقارتىپ, اۋداندىق, قالالىق ءبىلىم بولىمدەرىنىڭ جانىنان ورتالىقتاندىرىلعان بۋحگالتەريا اشۋدى ۇسىندى. مۇنىڭ ارتىقشىلىقتارى كوپ. قارجى ۇنەمدەلەدى, تەكسەرۋشىلەر ازايادى. ەڭ باستىسى, مەكتەپ ديرەكتورى رەۆيزوردىڭ كوڭىلىن قالاي تابامىنمەن ەمەس, ءوز مىندەتى – ساپالى ءبىلىم, سانالى تاربيە بەرۋ ىسىمەن اينالىسادى. ەلباسىنىڭ جوعارى جانە ورتا ارناۋلى وقۋ ورىن­دارى­نا قويىپ وتىرعان تالاپتارىنىڭ ۇدەسىنەن شىعۋ ءۇشىن ءبىز وسىنداي كۇرمەۋلى ماسەلەلەرىمىزدى شەشىپ الۋى­مىز قاجەت. ونسىز اۋىل ماڭىن شيىرلاپ, ءورىسىن تاۋىسىپ العان جامان مالشىداي الىسقا ۇزاي المايمىز. بۇل باس­تا­مانى مۇعالىمدەر قاۋىمى قۋاتتاپ وتىرعانىن ايتۋ كەرەك. ويتكەنى, تەكسەرۋشىلەردەن زارداپ شەگىپ, تابان اقى, ماڭداي تەرىمەن تاپقان جالاقىسىنان جىرىپ بەرەتىندەر سولار عوي. ورتا مەكتەپكە ۇلكەن رەفورمالار قاجەت. سوڭعى جىلدارى مۇعالىمدىك قىز-كەلىنشەكتەردىڭ كاسىبى سانالىپ, ەر-ازاماتتاردىڭ سانىن ازايتىپ الدىق. ايەل زاتىن كەمىتكەنىمىز ەمەس, مەكتەپتەگى ۇلداردا ەرلەرگە ءتان اسقاق قاسيەتتەردىڭ ازايىپ بارا جاتۋى قوعامدى الاڭداتادى. ساباق جوسپارىنا قاتىستى قاعازباستىلىق ءبىلىم بەرۋدىڭ جاڭا تاسىلدەرىن ىزدەۋدەن گورى, تاپتاۋرىندىلىققا ۇرىندىراتىندىعىن دا ايتقان ءجون. باياعىدا كوپ ايتىلىپ, كوپ ناسيحاتتالاتىن “بىتىباەۆا مەكتەبى”, “ايتقاليەۆ مەكتەبى” سىندى وزات ءىس-تاجىريبەلەردى ازايتىپ العاندايمىز. ەلباسىنىڭ جوعارى مەكتەپكە قويعان تالاپتارىن ورىنداۋ ءۇشىن ورتا مەكتەپتەردەگى تۇيىندەردى شەشۋ كوپ جەڭىلدىك اكەلەر ەدى. وڭتۇستىك قازاقستان وبلىسى