الەمنىڭ جيىرمادان استام ەلىنەن ءۇش جۇزدەن اسا كومپانيالار ات باسىن تىرەگەن كورمە الاڭى حالىقارالىق تۋريزم جەتىستىكتەرىنىڭ جاڭالىقتارىن جاريالاپ, العاشقى ارىپتەستىك كەلىسىمدەرگە قول قويىلدى دەۋگە نەگىز بار.
بۇگىندە KITF ىشكى تۋريزم رەيتينگىندە مەديتسينالىق جانە ىسكەرلىك تۋريزمنەن كوش ىلگەرى تۇر. «مىڭ بوياۋلى الماتى» ءوز قوناقتارىن بيىل ەرەكشە كەلبەتتە قارسى الىپ وتىر. ماركەتينگتىك زەرتتەۋلەر ناتيجەسىنە سايكەس وسى 19 جىلدا ۇيىمداستىرۋشىلار 350-دەن اسا كەلىسىم-شارتتارعا قول جەتكىزسە, بيىلعى جىلعى كورمە اياسىندا مىڭنان استام كەلىسىمدەر جاسالادى دەگەن بولجام بار.
الماتى قالاسى تۋريزم باسقارماسىنىڭ جەتەكشىسى ماقسات قيقىموۆ وتكەن جىلدىڭ قورىتىندىسى بويىنشا تۋريستەر سانى ءبىر ميلليوننان اسىپ, سالىستىرمالى كەزەڭمەن العاندا 12 پايىزعا ارتقاندىعىن جەتكىزدى. بۇل كورسەتكىشتىڭ ءتورت ءجۇز مىڭعا جۋىعىن شەتەلدىك تۋريستەر قۇرايدى. بۇگىندە تۋريزم كورسەتكىشتەرى مەديتسينالىق, سپورتتىق, وقيعالىق, مادەني-تانىمدىق, ىسكەرلىك, تاۋ ءتۋريزمى, ت.ب. تۇرلەرىنىڭ دامۋىنا تاۋەلدى.
ەلىمىزگە كەلەتىن شەتەلدىك تۋريستەردىڭ باسىم كوپشىلىگىن كوشپەندىلەر تاريحى مەن مىڭ جىلدىق تاريحى بار الماتى قالاسىنىڭ قالىپتاسۋى قىزىقتىرادى. وسى ماقساتتا «رۋحاني جاڭعىرۋ» باعدارلاماسى شەڭبەرىندە «بورالداي ساق قورعاندارى» ساق مادەنيەت ورتالىعىنىڭ, «ساق قورعانى» جانە «رايىمبەك باتىر» مۇراجايلارىنىڭ, «قازاقفيلم» اۋماعىندا «Ethnoland» ەتنو-مادەني كەشەنىنىڭ قۇرىلىسى جوسپارلانىپ وتىر. بولجام بويىنشا, «Ethnoland» جانە بورالداي ساق قورعاندارىن ورتا ەسەپپەن جىلىنا ميلليوننان استام تۋريست قىزىقتايتىن بولادى. سونىمەن قاتار ماڭىزدى سالالاردىڭ ءبىرى بالالار ءتۋريزمىن دامىتۋعا بايلانىستى ازىرلەنگەن وقىتۋ باعدارلاماسىنا وراي قالا مەكتەپتەرىندە ءساۋىر ايىنىڭ ەكىنشى جارتىسىنان باستاپ ءار ءتۇرلى تاقىرىپتاردا مەكتەپ ساعاتتارى وتەدى دەپ جوسپارلانعان.
الماتىنىڭ تۋريزم باسشىسىنىڭ ايتۋىنشا, وتكەن جىلى اۆستريانىڭ «Master Concept» كومپانياسىمەن بىرلەسىپ الماتى اگلومەراتسياسىنىڭ تاۋ كلاستەرىن دامىتۋ جوسپارى ازىرلەنگەن. 2025 جىلعا دەيىن الاتاۋ باۋرايىندا كلاستەرلىك تاۋ شىڭعىسى ءتۋريزمىن دامىتۋ جوسپارلانىپ وتىر. شىعىس –تۇرگەن تاۋلارى, ورتالىق – الماتى قالاسى جانە باتىس – قاسكەلەڭ تاۋلارى سياقتى ءۇش كلاستەر بويىنشا جاسالاتىن شاڭعى جولىنىڭ ۇزىندىعى 456 شاقىرىمدى قۇرايدى ءارى ونىڭ بويىندا ونداعان دەمالىس ورىندارى بوي تۇزەمەك. ال «وي قاراعاي», «الما تاۋ» تاۋ شىڭعىسى كۋرورتتارىنا دەيىن تۇراقتى مارشرۋتتار جۇرگىزىلەدى. سونىمەن قاتار تۋريستەرگە ارنالعان اقپاراتتىق ورتالىقتاردىڭ جۇمىسى دا تۇراقتى جەتىلدىرىلىپ وتىرادى.
كIFT جەتەكشىسى ۆيكتوريا پاۆلەنكونىڭ ايتۋىنشا, KITF كورمەسىندە ەلىمىزدىڭ 16 ايماعىنىڭ باسىن بىرىكتىرەتىن ۇلتتىق قازاقستاندىق توپ قازاقستان تۋرالى ەرەكشە پورتفوليو ۇسىناتىن بولادى. ء ازىربايجان, تۇركيا, مىسىر, ءۇندىستان, گرەكيا, گرۋزيا, قىتاي, يندونەزيا, ينديا, اقش, يزرايل, ت.ب. ەلدەردەن كەلگەن ماماندار جاڭا تەحنولوگيالار مەن تسيفرلاندىرۋ, مەديتسينالىق جانە ساناتوريالىق-كۋرورتتىق تۋريزم بويىنشا فورۋمداردا سالاعا قاتىستى ۇزدىك تاجىريبەلەرىمەن بولىسەتىن بولادى.
قازاقستاندىقتار ءۇشىن حالىقارالىق كورمەلەر نەسىمەن تارتىمدى؟ وسى سۇراقتىڭ جاۋابىنا قاتىستى مالىمەتتەردەن حاباردار ەتكەن قازاقستان تۋريستىك قاۋىمداستىعىنىڭ ديرەكتورى راشيدا شايكەنوۆا كورمە – ادامداردىڭ قارىم-قاتىناس الاڭى دەپ اتاپ ءوتتى. KITF اياسى جىلدان-جىلعا كەڭەيىپ كەلەدى. راشيدا شايكەنوۆانىڭ ايتۋىنشا, بۇگىندە كورمە اۋقىمىن ارتتىرۋدىڭ زاماناۋي ماركەتينگتىك جانە تەحنولوگيالىق مۇمكىندىكتەرى جەتكىلىكتى. تۋريزم سالاسىنىڭ وكىلدەرى ءۇشىن كورمە الاڭدارىندا وزدەرىنە سەنىمدى ارىپتەستەر تابۋ اسا ماڭىزدى. بيىلعى جىلى KITF كورمەسىنە سوناۋ التاي وڭىرىنەن دە دەلەگاتتار كەلدى. ال مۇنداي ارىپتەستىكتىڭ ىرگەتاسى پەتروپاۆلدا جاسالعان كەلىسىمدەر نەگىزىندە قالانعان-دى.
قازاقستان 2001 جىلدان بەرگى ارالىقتا ءىرى حالىقارالىق كورمەلەردىڭ تۇراقتى قاتىسۋشىسى بولىپ كەلەدى. وسى ۋاقىتتا كوپتەگەن تاجىريبە جيناقتاعان وتاندىق تۋريزم ماماندارى ەندىگى كەزەكتە ءوز ونىمدەرىن قانداي ەلدەردىڭ كورمەسىنە ۇسىنامىز دەگەنگە نازار اۋدارىپ وتىر.
بۇگىندە ەلىمىزدە ىسكەرلىك تۋريزمنەن گورى ەكوتۋريزمگە ۆەنگريا, پولشا, اۆستراليا جانە ت.ب. ەلدەردەن كەلگەن تۋريستەردىڭ قىزىعۋشىلىعى ارتا تۇسكەندىگىنە قاتىستى مالىمەتتەرمەن بولىسكەن راشيدا شايكەنوۆا تۋريستەردى كوپتەپ تارتۋ قىزمەت ساپاسىمەن بايلانىستى دەپ اتاپ ءوتتى. كىمدە-كىم جۇيەلى, تۇراقتى, ساپالى جۇمىس ىستەسە, سول بيزنەستىڭ ومىرشەڭ بولاتىنى انىق. ال ساپا باسەكەلەستىك ورتادا عانا نىعايا تۇسەدى. بۇگىندە ەلىمىزگە الپىستان استام مەملەكەتتىڭ ازاماتتارى ۆيزاسىز ساياحاتتاي الادى. الداعى ۋاقىتتا بۇل كورسەتكىشتىڭ اياسى كەڭەيا بەرەتىنى انىق. تۋريزم سالاسىن دامىتۋدا ستراتەگيالىق ماسەلەلەردى جوسپارلاپ, زاڭنامالىق جۇيەنى رەتتەۋدىڭ ماڭىزى زور. ال وتاندىق ءتۋريزمنىڭ دامۋى ەكونوميكالىق وسىممەن قاتار, شاعىن جانە ورتا بيزنەستىڭ قارقىندى دامۋىنا ىقپال ەتەتىنى انىق.
