ويتكەنى قاسىم-جومارت كەمەل ۇلى بىرىنشىدەن, ەلىمىزدىڭ كونستيتۋتسياسى مەن «قازاقستان رەسپۋبليكاسىنداعى سايلاۋ تۋرالى» زاڭىن جانە حالىقارالىق دەموكراتيالىق ۇردىستەر ءتاجىريبەلەرىن باسشىلىققا الىپ وتىر. ەكىنشىدەن, ەلىمىزدەگى ىنتىماق پەن بىرلىكتىڭ, بەيبىت كۇننىڭ, ەكونوميكالىق دامۋدىڭ ىرگەسى سوگىلمەي, تۇڭعىش پرەزيدەنتىمىز سالىپ بەرگەن سارا جولدان تايماي العا جىلجۋ ءۇشىن حالىقتىڭ ءوزى سايلاپ, قولىنا مانداتىن ۇستاتاتىن پرەزيدەنت كەرەك. مۇنى بارلىعى دا تۇسىنەدى.
قازىر قازاقستانداعى ساياسي وزگەرىستەردى دۇنيە ءجۇزى قاداعالاپ وتىر. ءبىزدىڭ تاۋەلسىز ەلىمىز دەموكراتيالىق ۇستانىمدارى جونىنەن حالىقارالىق ۇيىمداردان دا, وزىق دامىعان ەلدەر تاراپىنان دا جاقسى پىكىر مەن قولداۋ تاۋىپ كەلەدى. دەگەنمەن, بۇگىن الەمدە تىنىش زامان بولىپ تۇر دەپ ايتا المايمىز, حالىقارالىق ساياسي جاعداي كۇردەلى. سوندىقتان حالىقتىڭ قولداۋىمەن بولاشاق پرەزيدەنتىمىزدى سايلاپ الساق, ارقامىزدى بەرىك قابىرعاعا سۇيەگەندەي بولامىز, قازاقستان ەكونوميكالىق جانە ساياسي دامۋدا, حالىقارالىق ساياسي ارەنادا دا اياعىن نىق باسادى.
مەن ەلىمىز تاۋەلسىزدىك العان جىلداردان باستاپ كاسىپكەرلىكپەن اينالىسىپ كەلەمىن. سوندا تۇيگەنىم – كاسىپكەرلىك, بيزنەس ساياسي تۇراقتى, اۋىزبىرلىگى بار ەلدە داميدى. قازىر مۇنداي ەلدەردى ينۆەستورلار دا قولدايدى, ءتىپتى ىزدەيدى. ويتكەنى ساياسي تۇراقسىز ەلدە بىرلىك جوق, بىرلىك بولماعان جەردە بەرەكە بولمايدى. ەگەر ەلىمىزدە ساياسي تۇراقتىلىق بولماسا, سىرتتان تارتىلعان نەمەسە ىشكى ءمۇمكىندىكتەگى ينۆەستيتسيالىق قارجىنىڭ دا ەكونوميكانى, بيزنەستى دامىتۋعا قاۋقارى بولماي جەلگە شاشىلعان قۇستىڭ جۇنىندەي بەي-بەرەكەت كەتەر ەدى. مۇنىڭ بارلىعى دا الىستى كورە بىلەتىن, حالقىنا, مەملەكەتىنە ادال, سىرتقى ورتامەن دە ءتىل تابىسا بىلەتىن ساياسي بىلىكتى پرەزيدەنتكە بايلانىستى. وسى ۋاقىتقا دەيىن تۇڭعىش پرەزيدەنتىمىز نۇرسۇلتان نازارباەۆتىڭ سارابدال ساياساتىنىڭ ارقاسىندا قازاقستاندا بيزنەس دامىدى.
تاعى ءبىر توقتالا كەتكىم كەلەتىنى, ءبىزدىڭ باستى بايلىعىمىز تاۋەلسىزدىك ەكەنى ەش كۇمان تۋدىرمايتىنى انىق. تاۋەلسىزدىكتى قورعاۋ, ونى باياندى ەتۋ ءاربىر قازاقستان ازاماتىنىڭ بورىشى ەكەنىن ۇمىتپايىق. بارىمىزدى باعامداپ, العان باعىتىمىزدىڭ دۇرىستىعىنا سەنىپ, قول جەتكىزگەن تابىستارىمىزدى باعالاي بىلەيىك.
الداعى كەزەكتەن تىس پرەزيدەنت سايلاۋى ناتيجەلى بولسىن دەپ تىلەيمىن.
المات تۇرسىنوۆ,
قازاقستاننىڭ ەڭبەك ەرى
قوستاناي
