الەم • 17 ءساۋىر، 2019

ءوزارا بايلانىستاردى دامىتۋدىڭ جاڭا مۇمكىندىكتەرى. شولۋ

805 رەت كورسەتىلدى

مەملەكەت باسشىسى قاسىم-جومارت توقاەۆ وزبەكستان پرەزيدەنتىنىڭ شاقى­رۋى­مەن العاشقى مەملەكەتتىك ساپارىن وسى ەلگە جاسادى. ەكى كۇندىك ساپار اياسىندا پرەزيدەنتتەر ق.توقاەۆ پەن ش.ميرزيوەۆتىڭ شاعىن جانە كە­ڭەيتىلگەن قۇرامدا كەلىسسوزدەر وتكىزۋى، بىرقاتار قۇجاتقا قول قويۋى، سون­داي-اق وزبەكستانداعى قازاقستان جىلىنىڭ اشىلۋ سالتاناتىنا قاتىسۋى كورشىلەس ەلدەر اراسىنداعى جىلى شىرايلى بايلانىستىڭ، ىستىق ىقىلاستىڭ كورىنىسى بولدى. قازاقستان پرەزيدەنتىنىڭ العاشقى مەملەكەتتىك ساپارى تۋرالى شەتەلدىك بۇقارالىق اقپارات قۇرالدارى كوپتەگەن حابار تاراتىپ، كورشىلەس مەملەكەتتەردىڭ بىرلەسكەن جوسپارلارى تۋرالى پىكىرلەرىن جاريالادى. وزبەكستان اقپاراتتىق اگەنتتىكتەرى قاسىم-جومارت توقاەۆتىڭ ساپارى ەكى ەل ىنتىماقتاستىعىنىڭ دامي تۇسۋىنە سەپ بولاتىنىن جارىسا جازدى.

تارقاتا ايتار بولساق، «وزبەكستان» ۇلتتىق اق­پارات اگەنتتىگى قازاقستان پرەزيدەنتىن ءوز­بەكستان پرە­مەر-ءمينيسترى ابدۋللا اري­پوۆ كۇتىپ العانىن، ال كوك­سارايداعى كەزدەسۋدىڭ رەسمي ءبولىمى شاعىن قۇرامداعى كەلىسسوزگە ۇلاسقانى تۋرالى جازادى.

ال kun.uz ونلاين پورتالى كەزدە­سۋ­­­دىڭ ەكىجاقتى ىنتى­ماق­تاستىقتىڭ نى­عايۋىنا سەپ­تىگىن تيگى­زەتىنىن ايتا كەلە، «ش.ميرزيوەۆ اتالعان ساپاردى بۇ­عان دەيىن قالىپتاسقان ساياسي ديالوگ­تىڭ جالعاسى دەپ ءبى­لەتىنىن ايتتى» دەپ جازدى. سونىمەن قاتار ءوز حا­بارلا­مالارىندا ش.ميرزيوەۆتىڭ «قازاق­­ستان پرەزيدەنتى رەتىندەگى العاشقى مەم­لە­كەتتىك ساپارىڭىزدى وزبەكستاننان باس­تاعا­نىڭىزدى جوعارى باعالايمىز. ءبىز ءۇشىن قازاقستان رەسپۋبليكاسى – شەكارالاس مەملەكەت، ستراتەگيالىق سەرىكتەس. ىنتىماقتاستىعىمىز بەن ءارىپ­تەس­تى­گىمىزدىڭ بارلىق باعىتتا دامىپ جاتقا­نى ءبىزدى قۋان­تادى» دەگەن ءسوزىن كەلتىرگەن.

«سپۋتنيك ءوز­بەكستان» اقپارات اگەنت­تىگىنىڭ حابار­لاۋىنشا، كەڭەيتىلگەن قۇرام­داعى وتىرىستا وزبەكستان مەن قازاقستان اراسىنداعى 2017-2019 جىلدارعا ارنالعان ەكو­نوميكالىق سەرىكتەستىك سترا­تە­گياسىنىڭ ناتيجەسى ءسوز بولعان. بۇدان بولەك، حابارلامادا مينيسترلىك وكىلدەرى مەن ەكى ەلدىڭ ءىرى كومپانيالارىنىڭ باسشىلارى قاتىسقان جينالىستا الداعى جىلدا ەكى ەل اراسىنداعى تاۋار اينالىمىن 5 ملرد اقش دوللارىنا ءوسىرۋ كەلىسىلگەنى تۋرالى جازىلعان.

اقپارات اگەنتتىگىنىڭ جازۋىنشا، كەزدەسۋ بارىسىندا قاسىم-جومارت توقاەۆ «شاۆكات ميرومون ۇلى، ءسىز تۇڭعىش پرەزيدەنت – ەلباسى نۇرسۇلتان نازارباەۆ ەكەۋىڭىز مەملەكەتارالىق قاتىناستى جاڭا بەلەسكە الىپ كەلدىڭىز. وسى جەتىستىكتى ودان ءارى دامىتۋ – پارىزىم دەپ بىلەمىن. باۋىرلاس وزبەكستانمەن سەرىكتەستىك قازاقستان ءۇشىن دە ماڭىزدى» دەگەن.

سونداي-اق مەملەكەتتەر باسشىلارى كەزدەسۋ بارىسىندا ەكىجاقتى قاتىناستى نىعايتۋ، ساۋدا، كولىك، ونەركاسىپ كووپەراتسياسى، تۋريزم جانە باسقا دا سالالارداعى سەرىكتەستىك تۋرالى ءسوز ەتكەن. ودان بولەك اۋعانستانداعى جاعدايدى تۇراقتاندىرۋعا اتسالىسۋ، اۋماقتاعى قاۋىپسىزدىك پەن بەيبىتشىلىكتى نىعايتۋ ماسەلەلەرىن تالقىلاعان.

اگەنتتىك اقپاراتىنا سۇيەنسەك، ەكىجاقتى قا­تى­ناس بويىنشا ۇكىمەتارالىق كوميسسياعا ساۋ­دا بايلانىسىنىڭ نومەنكلاتۋراسىن ءوسىرۋ، ەكونو­ميكالىق كووپەراتسيانىڭ ۇزاق مەرزىمدى فورماسىن دامىتۋ تاپسىرىلعان. وعان قوسا ەكى ەل وكىلدەرى 2018 جىلدىڭ قاراشاسىندا شىمكەنت قالاسىندا وتكەن ايماقارالىق سەرىكتەستىك فورۋمىنىڭ ناتيجەلەرىمەن بولىسكەن.

«پرەزيدەنتتەر ەكى ەل اراسىنداعى دەماكراتسيا پرو­تسەسىنە كوڭىلدەرى تولاتىنىن ءبىلدىرىپ، وتكىزۋ پۋنكتتەرىنىڭ ناتيجەلى جۇمىسى تۋرالى ءسوز قوزعادى.

تاراپتار كولىك، لوگيستيكا، ونەركاسىپتىك كووپەراتسيا سالاسىنداعى بىرلەسكەن جوبالار اتقارۋعا كەلىستى. ولاردىڭ ايتۋىنشا، اتالعان سالالاردى دا­مىتۋ مەملەكەت اراسىنداعى ەكسپورت پەن ترانزيت مۇمكىندىكتەرىن ارتتىرماق» دەلىنگەن اگەنتتىك اقپا­راتىندا.

بۇدان وزگە وزبەكستاندىق اقپارات اگەنتتىكتەرى قازاقستانداعى وزبەكستان جىلى جوعارى باعالانىپ، قازاقستان پرەزيدەنتىنىڭ مەملەكەتتىك ساپارى اياسىندا باستاۋ العان وزبەكستانداعى قازاقستان جىلى اتالعان شارانىڭ جالعاسى بولاتىنى تۋرالى جازادى.

«نوۆوستي ۋزبەكيستانا» گازەتى وزبەكستاندا قازاقستان جىلى سالتاناتتى تۇردە باستالعانىن ايتىپ، ەل پرەزيدەنتتەرى مەملەكەتتەر اراسىندا تۇزىلگەن مادەني-گۋمانيتارلىق بايلانىستى ودان ءارى نىعايتا بەرەتىنىن جازادى. گازەتتىڭ جازۋىنشا، حالىقتار ارا­سىنداعى دوستىقتى دارىپتەۋگە باعىتتالعان شارالاردى جالعاستىرۋ ەكى ەل اراسىنداعى سەنىمنىڭ، قولداۋدىڭ، باۋىرلاستىقتىڭ بەكي تۇسۋىنە سەبەپ بولماق. باسىلىم اتالعان شارا ونەر، عىلىم، ءبىلىم، بيزنەس وكىلدەرىنە جاڭا مۇمكىندىكتەر بەرىپ، ەكى ەلدىڭ مادەنيەتىنىڭ جاقىنداسۋىنا الىپ كەلەدى دەيدى.

ودان بولەك، وزبەكستان گازەتى «ورتالىق ازيا» حا­لىقارالىق ساۋدا-ەكونوميكالىق ىنتىماقتاستىق ور­تالىعىن قۇرۋ ماسەلەلەرى جونىندەگى ءوزارا ءتۇسى­نىستىك تۋرالى مەموراندۋمعا، قازاقستان اقپارات جانە قوعامدىق دامۋ مينيسترلىگى مەن وزبەكستان مي­نيسترلەر كابينەتى جانىنداعى ءدىن ىستەرى جونىندەگى كوميتەت اراسىنداعى ىنتىماقتاستىق تۋرالى مەموراندۋمعا قول قويىلعانىن حابارلادى.

«گازەتا.uz» باسىلىمى وزبەكستانداعى قا­زاقستان جىلىنىڭ سالتاناتتى اشىلۋى تاشكەنتتەگى حالىقارالىق فورۋمدار سارايىندا وتكەنىن حابارلايدى. مەملەكەت باسشىلارى قاتىسقان شارادا قازاقستان پرەزيدەنتى ق.توقاەۆ وزبەك حالقىنا ىستىق ىقىلاسى مەن قوناقجايلىلىعى ءۇشىن العىس ايتقانىن حابارلادى. سونىمەن بىرگە باسىلىم ق.توقاەۆتىڭ «ەكى ەل بايلانىسىندا قيىن ماسەلە جوعىن سەنىممەن ايتا الامىن. كەرىسىنشە، تاراپتار دوستىقتى نىعايتۋعا بار كۇشتەرىن سالىپ جاتىر. وزبەك حالقى ءبىز ءۇشىن قاشاندا جاقىن باۋىرىمىز بولعان. ءبىزدى دە ولاردىڭ جاقسى قابىلدايتىنىنا سەنىمدىمىز. باۋىرلاس ەلدەر ءبىر تاعدىر مەن ورتاق كەلەشەكپەن بايلانىسقان» دەگەن ءسوزىن كەلتىرەدى.


دايىنداعان

سۆەتلانا عالىمجانقىزى،

«Egemen Qazaqstan»


سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار