پرەزيدەنت • 16 ءساۋىر، 2019

قازاقستان پرەزيدەنتىنىڭ وزبەكستانعا العاشقى مەملەكەتتىك ساپارى تابىستى ءوتتى

1013 رەت كورسەتىلدى

كەشە قازاقستان پرەزيدەنتى قاسىم-جومارت توقاەۆتىڭ وزبەكستان رەسپۋبليكاسىندا العاش رەت مەملەكەتتىك ساپارى ءوتتى. ساپار بارىسىندا مەملەكەت باسشىسى ءوزىنىڭ وزبەكستاندىق ارىپتەسى شاۆكات ميرزيوەۆپەن حالقىمىزدىڭ يگىلىگى ءۇشىن ءتيىمدى كەلىسسوزدەر جۇرگىزدى ءارى قازاقستاننىڭ وزبەكستانداعى جىلىنىڭ اشىلۋىنا وراي ۇيىمداستىرىلعان سالتاناتتى شاراعا قاتىستى.

مىندەت – قاتىناستاردىڭ ساباقتاستىعى مەن جوعارى قارقىنىن ساقتاۋ

وزبەكستان تاراپى قازاقستان باسشىسىن ىستىق ىقىلاسپەن قارسى الدى. باۋىرلاس ەل پرەزيدەنتىنىڭ رەزيدەنتسياسى – «كوكسارايدىڭ» الدىندا قازاقستاننىڭ ءانۇرانى شىرقالىپ، قۇرمەتتى قاراۋىل ساپ تۇزەدى. كوڭىلگە جىلىلىق سىيلايتىن بۇل كورىنىستەردەن بولەك، پرەزيدەنت ق.توقاەۆتىڭ وزبەكستانعا مەملەكەتتىك ساپارمەن كەلەتىنى ناقتىلانعان كۇننەن باستاپ تاشكەنتتىڭ كوشەلەرىنە، سايا­باقتارعا، مەملەكەتتىك مەكەمەلەر مەن ءزاۋلىم عيماراتتار الدىنا ەكى مەملەكەت تۋلارىن قاتار جەلبىرەتىپ قويعانىن كورگەنىمىزدە، قالا تۇرعىندارىنىڭ قازاقستانعا دەگەن اق نيەتكە نەگىزدەلگەن جىلى لەبىزدەرىن ەستىگەنىمىزدە شىن مانىندە وزبەكستان جاعىنىڭ ءبىزدىڭ ەلىمىزگە دەگەن كوڭىلى ەرەكشە ەكەنىن ۇعىنا تۇستىك...

سونىمەن پرەزيدەنتتەر – قاسىم-جومارت توقاەۆ پەن شاۆكات ميرزيوەۆ ءبىرىنشى كەزەكتە شاعىن قۇرامدا كەلىسسوز جۇرگىزدى. كەزدەسۋدە مەملەكەت باسشىسى ق.توقاەۆ جىلى قارسى الىپ، قوناق­جاي­لىلىق كورسەتكەنى ءۇشىن ش.ميرزيوەۆكە ريزا­شىلىق ءبىلدىردى ءارى بۇل مەملەكەتتىك ساپاردىڭ ماڭىزدىلىعىنا توقتالدى.
– تۇڭعىش پرەزيدەنتىمىز – ەلباسى نۇرسۇلتان ءابىش ۇلى نازارباەۆ بەرىك ءارى ۇيلەسىمدى ەكىجاقتى قاتىناستاردى قالىپ­تاس­تىرۋعا زور ۇلەس قوستى. سىزدەر دە ەكى مەملە­كەتتىڭ كوشباسشىلارى رەتىندە قازاقستان مەن وزبەكستان اراسىنداعى ىنتى­ماق­تاستىقتى بيىك دەڭگەيگە كوتەر­دىڭىزدەر، – دەدى قاسىم-جومارت توقاەۆ.

مەملەكەت باسشىسى ەكىجاقتى ىن­تى­ماقتاستىقتىڭ ساپاسى مەن ىقپال­داس­تىقتىڭ مازمۇنىنا جوعارى باعا بەردى، سونداي-اق كەلىسسوزدەردىڭ كۇن تارتىبىندە تۇرعان بارلىق ماسەلە بويىنشا جەمىستى پىكىر الماساتىنىن جەتكىزدى.

– مەنىڭ مىندەتىم – بايلانىس­تارى­مىزدىڭ ساباقتاستىعى مەن جوعارى قار­قىنىن ساقتاۋ. مەن دە ءوز تاراپىمنان قازاق-وزبەك ىنتىماقتاستىعىنىڭ ەش كە­دەرگىسىز وركەندەپ، دامۋىنا بارلىق مۇمكىندىكتى جاسايمىن. كەشە ساياسي، تاريحي، مادەني، گۋمانيتارلىق سياقتى بىرقاتار ماسەلەگە قاتىستى الدىن الا پىكىر الماستىق جانە تاريحي تۇرعىدان حالىقتارىمىزعا ورتاق كوپ دۇنيە بار دەگەن تۇسىنىككە كەلدىك. ءبىزدى ورتاق تاريحي تاعدىرىمىز، تۋىستاس ءتىلىمىز، ءدىنىمىز بەن مادەني قۇندىلىقتارىمىز بىرىكتىرەدى، – دەدى قازاقستان پرەزيدەنتى.

سونىمەن قاتار قاسىم-جومارت توقاەۆ ءوزىنىڭ ارىپتەسى شاۆكات ميرزيوەۆكە قا­زاق­ستاننىڭ وزبەكستانداعى جىلىن وتكىزۋگە مۇمكىندىك تۋعىزعانى ءۇشىن العىس ايتىپ، بۇل شارانىڭ ەكى مەملەكەت حالقىن جا­قىنداستىرۋ تۇرعىسىنان العاندا اسا ماڭىزدى ەكەنىن ءسوز ەتتى.

ءوز كەزەگىندە شاۆكات ميرزيوەۆ قاسىم-جومارت توقاەۆتى قازاقستان پرەزيدەنتى قىزمەتىنە كىرىسۋىمەن قۇتتىقتاپ، وزبەكستان رەسپۋبليكاسىنا مەملەكەتتىك ساپارمەن كەلگەنى ءۇشىن ريزاشىلىق ءبىلدىردى. 

– قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ ءرولىن ەرەكشە اتاپ وتكىم كەلەدى. سول كى­سىنىڭ ارقا­سىندا ءوزارا قارىم-قاتىناس­تارى­مىز­دىڭ جوعارى دەڭگەيگە كوتەرىلۋىنە قول جەتكىزدىك. ءسىز دە مينيستر، پرەمەر-مينيستر، سەنات توراعاسى قىزمەتتەرىن اتقارعان كەزىڭىزدە ەكى ەل بايلانىستارىن جاقسارتۋعا سەپتىگىڭىزدى تيگىزدىڭىز، – دەدى شاۆكات ميرزيوەۆ.

سونداي-اق وزبەكستان باسشىسى قازاق­ستان پرەزيدەنتىنىڭ ساپارى سوڭعى جىلدا­رى قارقىندى دامىپ كەلە جاتقان ساياسي ديالوگتىڭ دايەكتى جالعاسى ەكەنىن ايتا كەلىپ: 

– ءسىزدىڭ قازاقستان پرەزيدەنتى رەتىندە وزبەكستانعا جاساعان العاشقى مەملەكەتتىك ساپارىڭىزدى جوعارى باعالايمىز. بۇل ساپارىڭىزدان ءبىزدىڭ ەلدەرىمىزدىڭ اراسىنداعى ستراتەگيالىق ارىپتەستىكتى ودان ءارى تەرەڭدەتۋگە دەگەن ۇمتىلىسىمىز ايقىن كورىنەدى. ءبىز ءۇشىن قازاقستان – تاتۋ كورشى ءارى ستراتەگيالىق ماڭىزدى ارىپتەس ەل. ءبىز ىنتىماقتاستىعىمىزدىڭ بارلىق سالالار بويىنشا وڭ ديناميكاسىنا قۋانامىز، – دەدى وزبەكستان پرەزيدەنتى.

سونىمەن قاتار ش. ميرزيوەۆ قازاق­ستان­دىق تاراپقا ەكىجاقتى بايلانىس­تار­دىڭ نىعايۋىنا تىڭ سەرپىن بەرگەن وزبەكستاننىڭ قازاقستانداعى جىلىن تابىستى وتكىزگەنى ءۇشىن ريزاشىلىق ءبىلدىردى.

جوعارى دارەجەدە وتكەن شاعىن قۇرامداعى كەلىسسوزدەر بارىسىندا مەملەكەتتەر باسشىلارى وڭىرلىك جانە حالىقارالىق كۇن تارتىبىندەگى ەكىجاقتى ىنتىماقتاستىقتىڭ وزەكتى ماسەلەلەرىن تالقىلادى.

بۇدان كەيىن مەملەكەتتەر باسشىلارى كەڭەيتىلگەن قۇرامدا كەزدەستى. وعان پرەزيدەنتتەرمەن قاتار ەكى ەلدىڭ مينيسترلەرى جانە ءىرى كومپانيالار جەتەكشىلەرى قا­تىستى. القالى جيىندا قاسىم-جومارت تو­قاەۆ شاۆكات ميرزيوەۆكە تۇڭعىش پرە­زي­دەنت – ەلباسى ن.ءا.نازارباەۆتىڭ سالە­مىن جەتكىزىپ، ونىڭ قازاقستان مەن وزبەك­ستان قارىم-قاتىناستارىنىڭ دامۋى­نا سىڭىرگەن ولشەۋسىز ەڭبەگىن ەرەكشە اتاپ ءوتتى.

– ءبىز شاعىن قۇرامداعى كەزدەسۋ كە­زىندە ساباقتاستىقتىڭ ساقتالىپ، مەملەكەت­تەرىمىز اراسىنداعى قارىم-قاتىناستاردى ودان ءارى نىعايتۋ ءۇشىن بارلىق كۇش-جىگە­رى­مىز­دى جۇمساۋعا ۋاعدالاستىق، – دەدى ق.تو­قاەۆ.

قازاقستان پرەزيدەنتى قازىرگى ساياسات ەكى مەملەكەتتىڭ ۇلتتىق مۇددەسىنە تولىقتاي سايكەس كەلەتىنىنە توقتالىپ، كەلىسسوزدەر با­رىسىندا قول جەتكىزىلگەن كەلىسىمدەردى جۇزەگە اسىرۋ ءۇشىن ۇكىمەتارالىق كوميسسيانى ۇكىمەتتەر باسشىلارىنىڭ دەڭگەيىنە كوتەرۋ تۋرالى شەشىم قابىلدانعانىن ايتتى.

– ءبىز وزبەكستاننىڭ دامۋىن زور قىزىعۋشىلىقپەن باقىلاپ وتىرامىز. سىزدەر بىرقاتار باعىت بويىنشا رەفورمالار جۇرگىزىپ، سونىڭ ىشىندە مەملەكەتتىك باسقارۋدى، ەكونوميكانى ليبەراليزاتسيالاۋ­دى جەتىلدىرىپ، حالىقتىڭ ءال-اۋقاتىن ارتتىرۋ ىسىندە تاڭعالارلىق جەتىستىكتەرگە قول جەتكىزدىڭىزدەر، – دەدى قازاقستان پرەزيدەنتى.
كەڭەيتىلگەن قۇرامداعى وتىرىستا شاۆكات ميرزيوەۆ قاسىم-جومارت تو­قاەۆ­تىڭ پرەزيدەنت رەتىندەگى العاشقى مەملە­كەتتىك ساپارىن وزبەكستاننان باستاعانىنا توق­تالىپ، بۇل قادامنىڭ ستراتەگيالىق ءارىپ­­تەستىكتى تەرەڭدەتىپ، قالىپتاسقان قا­رىم-قاتىناستاردى جالعاستىرۋعا باعىت­­تالعانىن جەتكىزدى.

– قازاقستانمەن دوستىق قارىم-قاتى­ناستى، تاتۋ كورشىلىكتى نىعايتۋ – وزبەكستاننىڭ سىرتقى ساياساتىنىڭ باسىم باعىتى. نۇرسۇلتان ءابىش ۇلى نازارباەۆ ەكەۋمىز ەكى ەل اراسىنداعى ءوزارا بايلانىس­تى جاڭا دەڭگەيگە كوتەرە الدىق، – دەدى ول.

ماقسات – تاياۋ جىلدارى ساۋدا اينالىمىن 5 ملرد دوللارعا جەتكىزۋ


سونىمەن قاتار مەملەكەتتەر باسشىلارى كەڭەيتىلگەن قۇرامداعى كەزدەسۋدە ەكىجاقتى جانە حالىقارالىق بايلا­نىس­تارداعى وزەكتى ماسەلەلەر ءجونىن­دەگى، ناق­تىراق ايتقاندا بۇۇ، يسلام ىن­تى­ماق­تاستىعى ۇيىمى جانە ارالدى قۇتقارۋ حا­لىق­ارالىق قورى اياسىنداعى مۇددەلەرى مەن ۇس­تانىمدارى سايكەس كەلەتىنىن اتاپ كور­سەتتى.
اتالعان كەزدەسۋدە سوڭعى ەكى جىلدا قوس تاراپتىڭ ءوزارا ارىپتەستىگى جاڭا دەڭگەيگە كوتەرىلگەنى، ايماقتار مەن ىسكەرلىك ورتالار اراسىنداعى بايلانىستار جاندانعانى، سونىڭ ناتيجەسىندە ساۋدا-ەكونوميكالىق ىنتىماقتاستىق قارقىندى دامىپ، 2018 جىلى بۇل باعىتتا سەرپىلىس بولعانى، ساۋدا اينالىمى 50 پايىزعا ارتىپ، 3 ميلليارد دوللاردان اسقانى ءسوز بولدى. سونىمەن بىرگە جيىندا تاراپتار تاياۋ جىلدارى ساۋدا اينالىمىن 5 ميلليارد دوللار دەڭگەيىنە جەتكىزۋدى كوزدەيتىنىن، قوس مەملەكەت اراسىنداعى ەكىجاقتى ىنتىماقتاستىق جونىندەگى ۇكىمەتارالىق كوميسسياعا ساۋدا قاتىناستارىن كەڭەيتۋ، ەكونوميكالىق ىنتىماقتاستىقتىڭ جاڭا ۇزاقمەرزىمدى نىساندارىن تابۋ جانە دامىتۋ تاپسىرىلدى. بۇل ءوز كەزەگىندە ءوزارا ءتيىمدى ەكونوميكالىق ىنتىماقتاستىقتى نىعايتۋعا جانە دامىتۋعا، ساۋدانىڭ، ينۆەستيتسيا سالاسىنىڭ، لوگيستيكانىڭ، ينتە­گراتسيالانعان يندۋستريالىق تەحنو­پاركتەردىڭ، عىلىمي-يننوۆاتسيالىق كلاس­تەرلەردىڭ جانە ەركىن ەكونوميكالىق ايماقتاردىڭ ومىرشەڭ جاڭا جوبالارىن ىسكە اسىرۋعا ىقپال ەتەدى.

تاراپتار 2018 جىلدىڭ قاراشاسىندا شىمكەنت قالاسىندا وتكەن قازاقستان مەن وزبەكستان اراسىنداعى ايماقارالىق ىنتىماقتاستىقتىڭ ءبىرىنشى فورۋمىنىڭ، سونداي-اق تاشكەنتتە 2019 جىلدىڭ ناۋ­رىزىندا وتكەن ورتالىق ازيا ەلدەرىنىڭ ءبى­رىنشى ايماقتىق ەكونوميكالىق فو­رۋ­مىنىڭ ناتيجەلەرىنە وڭ باعا بەردى.
كەلىسسوزدەر بارىسىندا كولىك، لوگيس­تيكا جانە ونەركاسىپتىك ىنتىماقتاستىق سالاسىنداعى بىرلەسكەن جوبالاردى جۇزەگە اسىرۋ تۋرالى كەلىسىمدەرگە قول جەتكىزىلدى. كولىك جانە كوممۋنيكاتسيا سالاسىنداعى ىنتىماقتاستىقتى دامىتۋ ءبىزدىڭ ەل­دەرى­مىزدىڭ ەكسپورتتىق الەۋەتىن جانە تران­زيتتىك مۇمكىندىكتەرىن كەڭەيتەتىنى اتاپ ءوتىلدى. سونداي-اق تۋريزم، مادەنيەت، عى­لىم جانە ءبىلىم سالاسىندا ارىپتەستىكتى ارتتىرۋ مۇمكىندىكتەرى قاراستىرىلدى ءارى 2018 جىلى وزبەكستاننىڭ قازاقستانداعى جىلىنىڭ ءساتتى ۇيىمداستىرىلعانى، ونىڭ ءبىزدىڭ حالىقتارىمىز اراسىنداعى دوس­تىق پەن باۋىرلاستىق قارىم-قاتى­ناس­تارىن ودان ءارى نىعايتقانى قوزعالدى. 
قازاقستان تاۋار اينالىمى بويىنشا وزبەكستاننىڭ قىتاي مەن رەسەيدەن كەيىنگى ءۇشىنشى ساۋدا سەرىكتەسى. 

ىنتىماقتاستىق بارلىق سالادا قارقىن العاندا ۇتىمدى

شاعىن جانە كەڭەيتىلگەن قۇرامدا وتكەن وتىرىستاردان كەيىن قازاقستان پرە­زيدەنتى ق.توقاەۆ پەن وزبەكستان پرەزي­دەنتى ش.ميرزيوەۆ كەزدەسۋلەر قورىتىن­دىسى بويىنشا باق وكىلدەرىنە ارناپ ءباسپاسوز ءماسليحاتىن وتكىزدى. 

ءباسپاسوز ءماسليحاتىندا قازاقستان پرە­زيدەنتى تاشكەنتكە مەملەكەتتىك ساپار­مەن كەلۋگە شاقىرعانى ءۇشىن شاۆكات مير­زيوەۆكە ريزاشىلىعىن جەتكىزدى ءارى قو­ناقجايلىق تانىتىپ، جىلى قابىلداعانى ءۇشىن وزبەك حالقىنا العىس ايتتى.

– قازاقستان پرەزيدەنتى رەتىندەگى شەتەلگە العاشقى ساپارلارىمنىڭ ءبىرىن باۋىرلاس وزبەكستان ەلىنە جاساۋىم­نىڭ سيمۆولدىق جانە تاعى باسقا ءمانى زور. سونىمەن قاتار بۇل ساپاردىڭ ءوز­بەكستانداعى قازاق­ستان جىلىنىڭ اشىلۋى­مەن تۇسپا-تۇس كەل­گەنىنە قۋانىشتىمىن. وسى شارا حا­لىقتارىمىزدى ودان ءارى جاقىنداستىرا تۇسەدى. بۇل – قازاقستان مەن وزبەكستان اراسىن­داعى سەرىكتەستىكتى نىعايتۋعا جانە قارىم-قا­تىناستاردى دامىتۋعا زور ءمان بەرەتى­نىمىزدىڭ دالەلى، – دەدى مەملەكەت باسشىسى. 

قاسىم-جومارت توقاەۆ مەملەكەتتەر اراسىنداعى قارىم-قاتىناستاردىڭ نىعايۋى مەن دامۋى جولىنداعى تۇڭعىش پرەزيدەنت – ەلباسى نۇرسۇلتان ءابىش ۇلى نازارباەۆ پەن وزبەكستان پرەزيدەنتى شاۆ­كات ميرزيوەۆتىڭ رولىنە ەرەكشە توقتالدى. 

– ولار قازاقستان مەن وزبەكستاننىڭ ىنتىماقتاستىق تاريحىنىڭ جاڭا پاراعىن اشىپ، ءبىزدىڭ بايلانىستارى­مىزدى جاڭا ءارى ساپالى دەڭگەيگە شىعاردى. قازاقستان باسشىسى رەتىندە مەن ەلباسى ساياساتىنىڭ ساباقتاستىعىن قامتاماسىز ەتىپ، قا­زاق­ستان-وزبەكستان قاتىناستارىنىڭ جان-جاقتى دامۋىن جالعاستىرا بەرەمىن. بۇعان دالەل رەتىندە بۇگىن ءبىز قول قويعان نەگىزگى جەتىستىكتەرىمىز بەن ىنتىماقتاستىق كوك­جيەگىنىڭ كەلەشەگى قامتىلعان پرەزي­دەنتتەردىڭ بىرلەسكەن مالىمدەمەسىن ايتۋعا بولادى، – دەدى مەملەكەت باسشىسى. 

سونداي-اق ق.توقاەۆ: «قازاق پەن وزبەك حالقى تاريحي تاع­دى­رىمەن تىعىز بايلانىستى. بىزدەردى مىڭ­جىل­دىقتاردى قامتيتىن تۇركىلىك تامىر، ءتىل، ءدىن جانە مادەنيەت بىرىكتىرەدى. ءبۇ­گىندە ءبىز وسى نەگىزدە كەڭ اۋقىمدى كەڭىس­تىكتە قار­قىندى دامىپ كەلە جاتقان بە­رىك جانە ءۇي­لەسىمدى قاتىناستاردى ورنىق­تىردىق»، دەدى.

ەكى ەلدىڭ ساۋدا-ەكونوميكالىق ىنتى­ماق­تاستىعىنداعى جوعارى دەڭگەيدى ايتا كەلىپ، قازاقستان پرەزيدەنتى وسى جوعارى كورسەتكىشتەردى ودان ءارى قولداۋ ءۇشىن بىرقاتار شارا قابىلداناتىنىن جەتكىزدى.

– جاڭا مۇمكىندىكتەر ىزدەپ، تاۋار نو­مەنكلاتۋراسىن كەڭەيتۋ قاجەتتىگى تۋرالى ايتىلدى. 2020 جىلدىڭ سوڭىنا قا­راي ءوزارا تاۋار اينالىمىن 5 ميلليارد دوللار­عا دەيىن جەتكىزۋ – ءبىزدىڭ نەگىز­گى ماق­ساتىمىز، – دەدى قاسىم-جومارت توقاەۆ.

وندىرىستىك كووپەراتسيالاردىڭ دامۋى بويىنشا، مەملەكەت باسشىسى بيزنەسكە جاسالعان جاعدايدىڭ ناتيجەسىندە ەكى ەلدىڭ بىرلەسكەن كاسىپورىندارىنىڭ سانى ارتقانىن اتاپ ءوتتى. پرەزيدەنتتىڭ ايتۋىنشا، 2017 جىلدىڭ باسىندا قازاقستاندا وزبەك كاپيتالىنىڭ قاتىسۋىمەن جۇمىس ىستەيتىن 900 كومپانيا تىركەلسە، بيىلعى جىلى بۇل كورسەتكىش 1400-گە ۇلعايعان.

– مۇنداي ىنتىماقتاستىقتىڭ مىسالى رەتىندە قازاقستانداعى بىرلەسكەن جەڭىل اۆتوموبيل، جۇك كولىگى جانە باسقا تەحنيكالاردى قۇراۋ جوبالارىن ايتۋعا بولادى. اتالعان سالالاردىڭ ءبىزدىڭ ەكونوميكالارىمىز ءۇشىن ماڭىزى زور بولعاندىقتان، وسى باعىتتاعى جۇمىستاردى قارقىندى ءتۇر­دە جالعاستىرا بەرەمىز، – دەدى مەملەكەت باسشىسى.

سونداي-اق قاسىم-جومارت توقاەۆ بىل­تىر جىل سوڭىندا وڭىرارالىق ىن­تى­ماقتاستىق فورۋمىنىڭ ءساتتى وتكەنىنە توقتالىپ، مۇنداي كەزدەسۋلەردىڭ ەكى ەل ءۇشىن جاڭا مۇمكىندىكتەر اشاتىنىن ايتتى.

– قازاقستان مەن وزبەكستان شەكاراسىندا حالىقارالىق ساۋدا-ەكونوميكالىق ىنتىماقتاستىق ورتالىعىن قۇرۋ ماسەلەسى ەرەكشە قارالدى. بۇل جوبانى جۇزەگە اسىرۋ شەكارالىق ايماقتاعى ساۋدانى رەتتەپ، باقىلاۋ-وتكىزۋ ينفراقۇرىلىمىن جاقسارتۋعا، سونداي-اق ورتالىق ازيادا ءىرى ساۋدا-لوگيستيكالىق حاب قۇرۋعا مۇمكىندىك بەرەدى، – دەدى مەملەكەت باسشىسى.

بۇدان باسقا قازاقستان پرەزيدەنتى وتىن جانە سۋ-ەنەرگەتيكا سالاسىنداعى ءوزارا ءىس-قيمىل، ەكسپورت-يمپورتتىق، تران­زيتتىك تاسىمال سالاسىنداعى ىنتىماق­تاستىق، مادەني-گۋمانيتارلىق جانە جاس­تار بايلانىسىن كەڭەيتۋ ماسەلەلەرىنە توقتالدى.

سوڭىندا قاسىم-جومارت توقاەۆ كە­لىس­سوزدەردىڭ ناتيجەلەرىنە قاناعاتتا­نات­ىنىن ءبىلدىرىپ، قول جەتكىزىلگەن كەلى­سىمدەردى جۇزەگە اسىرىپ، قازاقستان مەن وزبەكستان ىنتىماقتاستىعىن دامىتاتىنىن ايتتى. سونداي-اق قازاقستان پرەزيدەنتى ەلىمىز بەن وزبەكستاننىڭ ساۋدا-ەكونوميكالىق سالادا ورتالىق ازيا بويىنشا جەتەكشى ورىن الاتىنىن اتاپ ءوتتى. بۇعان قوسا، مەملەكەت باسشىسى ەكىجاقتى قاتىناستىڭ جوعارى دەڭگەيىن ۇستاپ تۇرۋ ءۇشىن ءتۇرلى شارالار قابىلداناتىنىن، قازاقستان-وزبەكستان بيزنەس-فورۋمدارى، ساۋدا ميسسيالارى مەن ونىمدەر كورمەسى تۇراقتى وتكىزىلەتىنىن جەتكىزدى.

پرەزيدەنت ق.توقاەۆ قازاقستان-ءوز­بەك­ستان قاتىناستارى مەن وڭىرلىك ىقپال­داس­تىقتى كەڭەيتۋگە جانە نىعايتۋعا باعىتتالعان قازاقستاننىڭ قازىرگى سىرت­قى ساياسي باعىتىنىڭ ساقتالاتىنىن ءمالىم­دەدى.

ءسوزىنىڭ سوڭىندا قاسىم-جومارت توقاەۆ وزبەكستان رەسپۋبليكاسىنىڭ پرە­زيدەنتى شاۆكات ميرزيوەۆكە، بۇكىل وزبەك حالقىنا جىلى قابىلداعانى مەن قوناقجايلىق كورسەتكەنى ءۇشىن العىسىن ءبىلدىردى جانە وزبەكستان باسشىسىن قازاقستانعا ساپارمەن كەلۋگە شاقىردى. 

شاۆكات ميرزيوەۆ ءوز سوزىندە قاسىم-جومارت توقاەۆپەن اشىق ءارى تولىق ءوزارا تۇسىنىستىك رۋحىندا وتكەن كەلىسسوزدەرگە جوعارى باعا بەردى. كەزدەسۋ بارىسىندا تاراپتار قارىم-قاتىناستى دامىتۋدىڭ ۇزاق-مەرزىمدى ماقساتتارىنىڭ ورتاق ەكەنىن راستاپ، كۇن تارتىبىندەگى ەكىجاقتى، وڭىرلىك جانە حالىقارالىق ىنتىماقتاستىق ماسەلەلەرىن جان-جاقتى تالقىلادى، سونداي-اق جاڭا سىناقتار مەن قاۋىپسىزدىككە تونەتىن قاتەرلەرگە قارسى تۇرۋ جونىندەگى بىرلەسكەن شارالاردى كۇشەيتۋدىڭ ماڭىزدىلىعىن اتاپ ءوتتى.

– قازاقستان مەن وزبەكستان قارىم-قاتىناستارىن نىعايتۋعا جانە جان-جاقتى ىنتىماقتاستىقتى كەڭەيتۋگە باعا جەتپەس ۇلەس قوسقانى ءۇشىن قازاق حالقىنىڭ ءبىرتۋار پەرزەنتى، قازاقستان رەسپۋبليكاسىنىڭ تۇڭعىش پرەزيدەنتى – ەلباسى، مەنىڭ اعام، قۇرمەتتى نۇرسۇلتان ءابىش ۇلى نازارباەۆقا العىس ايتقىم كەلەدى. قازاقستاننىڭ مەم­لەكەتتىگىن نىعايتۋداعى، بەرىك ازامات­تىق قوعام قالىپتاستىرۋداعى، زاماناۋي جانە باسەكەگە قابىلەتتى ەكونوميكا قۇرۋ­داعى، حالىقارالىق ارەناداعى ەل بەدە­لىن ارتتىرۋداعى زور جەتىستىكتەر ونىڭ ەسىمىمەن تىكەلەي بايلانىستى، – دەدى ءوز­بەكستان پرەزيدەنتى.

سونىمەن قاتار شاۆكات ميرزيوەۆ ساپار بارىسىندا قول جەتكىزىلگەن ۋاع­دا­لاستىقتاردى ىسكە اسىرۋ ءۇشىن جول كارتاسى بەكىتىلەتىنىن ايتتى.

جالپى، ءباسپاسوز ءماسليحاتىندا مەملەكەتتەر باسشىلارى تەرەڭ تاريحي جانە رۋحاني بايلانىستارعا، تاتۋ كورشىلىك پەن ءوزارا قولداۋعا نەگىزدەلگەن قازاقستان رەسپۋبليكاسى مەن وزبەكستان رەسپۋبليكاسى اراسىنداعى جاقىن ءارى مىعىم دوستىق قاتىناستاردىڭ وسپەلى سيپاتىن ريزاشىلىقپەن اتاپ ءوتىپ، ەكىجاقتى قاتىناستاردى جاڭا ساپالىق دەڭگەيگە كوتەرۋ ەكى باۋىرلاس ەلدىڭ مۇددەلەرىنە جاۋاپ بەرەتىنىنە سەنىم ءبىلدىردى.

پرەزيدەنتتەر، قازاقستان رەسپۋب­ليكاسى مەن وزبەكستان رەسپۋبليكاسى ارا­سىنداعى 1998 جىلعى 31 قازانداعى ءماڭ­گىلىك دوستىق تۋرالى شارت پەن 2013 جىلعى 14 ماۋسىمداعى قازاقستان رەسپۋبليكاسى مەن وزبەكستان رەسپۋبليكاسى ارا­سىن­داعى ستراتەگيالىق سەرىكتەستىك تۋرالى شارتتا بەكىتىلگەن پرينتسيپتەر مەن ءمىن­دەتتەمەلەرگە بۇلجىماس بەرىكتىگىن راستاي وتىرىپ، مالىمدەمە جاسادى (مالىمدەمە ءماتىنى بولەك بەرىلىپ وتىر).  

بىرقاتار ەكى­جاقتى قۇجاتتار بەكىتىلدى

بۇدان بولەك، قازاق­ستان ۇكىمەتى مەن وزبەكستان ۇكىمەتى اراسىن­داعى ەڭبەك قىزمەتى جانە ەڭبەكشى كوشىپ-قو­نۋشىلاردىڭ قۇقىقتارىن قورعاۋ تۋرالى كەلىسىم; قازاقستان ۇكىمەتى مەن وزبەكستان ۇكىمەتى اراسىنداعى زاڭسىز كوشى-قونمەن كۇرەس بويىنشا ىنتىماقتاستىق تۋرالى كەلىسىم; تابىس پەن مۇلiككە قوسارلانعان سالىق سالۋدى بولدىرماۋ تۋرالى كەلىسىم اياسىندا قازاقستان مەن وزبەكستان ۋاكىلەتتى ورگاندارى بەرگەن رەزيدەنتتىكتى راستايتىن رەسمي قۇجاتتاردى تانۋ ءتارتىبى تۋرالى نوتالارمەن الماسۋ تۇرىندەگى كەلىسىم; قازاقستان سىرتقى ىستەر مينيسترلىگى مەن وزبەكستان سىرتقى ىستەر مينيسترلىگى اراسىنداعى 2019-2020 جىلدارعا ارنالعان ىنتىماقتاستىق باعدارلاماسى; قازاقستان قورعانىس مينيسترلىگى مەن وزبەكستان قورعانىس مينيسترلىگى اراسىنداعى اۋە شابۋىلىنا قارسى قورعانىس سالاسىنداعى ىنتىماقتاستىق تۋرالى كەلىسىم; قازاقستان قورعانىس مينيسترلىگى مەن وزبەكستان قورعانىس مينيسترلىگى اراسىنداعى اسكەري ۇشاقتاردى قابىلداۋ، اەرودروم-تەحنيكالىق قامتاماسىز ەتۋ جانە اسكەري اەرودرومداردا اسكەري اۋە كەمەلەرىن كۇزەتۋ تۋرالى كەلىسىم; قا­زاق­ستان رەسپۋبليكاسىنىڭ ۇلتتىق ەكونو­ميكا مينيسترلىگى مەن وزبەكستان رەسپۋب­ليكاسىنىڭ ينۆەستيتسيالار جانە سىرتقى ساۋدا مينيسترلىگى اراسىنداعى «ورتالىق ازيا» حالىقارالىق ساۋدا-ەكونوميكالىق ىنتىماقتاستىق ورتالىعىن قۇرۋ ماسە­لەلەرى جونىندەگى ءوزارا تۇسىنىستىك تۋرالى مەموراندۋم; قازاقستان اقپارات جانە قوعامدىق دامۋ مينيسترلىگى مەن وزبەكستان مينيسترلەر كابينەتى جانىن­داعى ءدىن ىستەرى جونىندەگى كوميتەت اراسىنداعى ىنتىماقتاستىق تۋرالى مەموراندۋم. 

قازاقستان پرەزيدەنتى قاسىم-جومارت توقاەۆ تاۋەلسىزدىك جانە گۋمانيزم مونۋ­مەنتىنە گۇل شوعىن قويىپ، وزبەك حالقىنىڭ ازاتتىعى ءۇشىن كۇرەسكەن بابالار رۋحىنا تاعزىم ەتتى. تاشكەنتتىڭ مۋس­تاكيلليك الاڭىندا ورنالاسقان بۇل مونۋمەنت وزبەك ۇلتىنىڭ بەيبىتشىلىك پەن بوستاندىققا، مەيىرىمدىلىك پەن تاتۋ كورشىلىككە، دوستىق پەن باۋىرلاستىققا ۇمتىلىسىن ايشىقتايدى. مونۋمەنت ويۋ-ورنەكپەن بەزەندىرىلگەن مەتالدى سفەرا بەينەسىندە سالىنعان جانە وندا وزبەكستاننىڭ كارتاسى بەينەلەنگەن. قولىندا بالاسى بار باقىتتى انا ءمۇسىنى ەسكەرتكىشكە كورىك بەرىپ تۇر.

سوڭعى جاڭالىقتار

شەرحان مۇرتازانىڭ ءۇيى

ادەبيەت • كەشە

«جاسىل» ايماقتا ەكى ءوڭىر

كوروناۆيرۋس • كەشە

بۇگىن - انالار كۇنى

قازاقستان • كەشە

الماتىدا تەگىن ءدارى-دارمەك قاتارى ارتتى

مەديتسينا • 18 قىركۇيەك، 2021

الەمدە ەپيداحۋال قانداي؟

الەم • 18 قىركۇيەك، 2021

توكيو مارافونى 2022 جىلعا شەگەرىلدى

سپورت • 18 قىركۇيەك، 2021

الماتىدا تاۋ بوكتەرى ورتەنىپ جاتىر

ايماقتار • 18 قىركۇيەك، 2021

ۇقساس جاڭالىقتار