رۋحانيات • 15 ءساۋىر، 2019

الماتىدا « ۇلى دالا دارىندارى» اتتى رەسپۋبليكالىق بايگە اياقتالىپ، «ايتىسكەر اقىن» ماماندىعى اشىلدى

919 رەت كورسەتىلدى

ت.جۇرگەنوۆ اتىنداعى قازاق ۇلتتىق ونەر اكادەمياسىندا العاش رەت «ۇلتتىق ونەر» فاكۋلتەتى ەلباسى ن.ءا.نازارباەۆتىڭ « ۇلى دالانىڭ جەتى قىرى» باعدارلامالىق ماقالاسىن جۇزەگە اسىرۋ اياسىندا قۇرىلعان ەدى. فاكۋلتەت قۇرامىنا «ءداستۇرلى مۋزىكالىق ونەر» جانە «ساندىك-قولدانبالى ونەر» كافەدرالارى كىرەدى.

بۇگىندە اتالعان كافەدرالاردىڭ تۇلەكتەرى حالىقارالىق، رەسپۋبليكالىق ونەر دودالارىندا توپ جارىپ ءجۇر. ستۋدەنتتەرگە رەسپۋبليكاعا بەلگىلى ونەرپازدار ر.ستامعازيەۆ، پ.مومىنوۆ، ن.جانپەيىسوۆ، م.ابۋعازى، ت.مۇقىشەۆ، س.باپانوۆا، ر.بازارباەۆا، ە.داۋباەۆ سىندى كاسىبي تاجىريبەلى وقىتۋشىلار ءبىلىم بەرەدى. ۋاقىتپەن بىرگە ولاردىڭ قاتارىن ءداستۇرلى ونەر سالاسى بويىنشا بىلىكتى ماماندار تولىقتىرىپ كەلەدى.

قاشان دا حالىقتىق ونەردى دارىپتەۋدىڭ وزىق ۇلگىسىن كورسەتۋدەن تانباي كەلە جاتقان ت. جۇرگەنوۆ اتىنداعى قازاق ۇلتتىق ونەر اكادەمياسىندا ءداستۇرلى «اشىق ەسىك كۇنى» اياسىندا ەلباسىنىڭ « ۇلى دالانىڭ  جەتى قىرى» اتتى ماقالاسى جانە «جاستار جىلىنا» وراي « ۇلى دالا دارىندارى» اتتى رەسپۋبليكالىق جاس ونەرپازدار بايقاۋىن وتكىزدى.

داستۇرگە اينالعان مەرەكەلىك شاراعا ەلىمىزدىڭ بارلىق ايماعىنان كەلگەن تالاپكەرلەر جانە وزگە دە ىنتا بىلدىرگەندەر اكادەمياعا قابىلداناتىن ماماندىقتارمەن تانىسىپ، وقىتۋشىلارمەن كەزدەستى. سونداي-اق، جەتى فاكۋلتەت جونىندە بىلىكتى پروفەسسورلىق-وقىتۋشىلىق قۇراممەن جۇزدەسىپ، فاكۋلتەت بويىنشا تولىق مالىمەتكە قانىعىپ، دايارلىق باعدارلاماسىمەن تانىسىپ، ماماندىق تاڭداۋ بويىنشا سۇراقتارىنا جاۋاپ الدى.

رەسمي اشىلۋدان كەيىن بەلگىلى ونەر قايراتكەرلەرىمەن جانە شىعارماشىلىقپەن اينالىساتىن جاستارمەن كەزدەسۋ ءوتتى. شاراعا اكادەميانىڭ ونەرپاز ستۋدەنتتەرىمەن قاتار، بۇگىندە قازاق ەستراداسىندا وزىندىك ورنى بار «ەسترادالىق ونەر» فاكۋلتەتىنىڭ ماگيسترانتتارى دينارا سۇلتان، ايقىن تولەپبەرگەن، سونداي-اق وسى فاكۋلتەتتىڭ  ستۋدەنتى ەرنار ايدار كەلگەندەردىڭ الدىندا ونەر كورسەتتى.

جۇرگەنوۆ اتىنداعى قازاق ۇلتتىق ونەر اكادەمياسىندا ءداستۇرلى «اشىق ەسىك كۇنى» اياسىنداعى شاراعا قازاقستاننىڭ ەڭبەك سىڭىرگەن قايراتكەرى، «ازيانىڭ ۇزدىك اكتريساسى» سامال ەسلياموۆا قۇرمەتتى قوناق رەتىندە قاتىسىپ، قۇتتىقتاپ ءسوز سويلەدى. «اشىق ەسىك كۇنى» جاريالانعان ەڭ جاعىمدى جاڭالىق – الداعى جاڭا وقۋ جىلىندا «ۇلتتىق ونەر» فاكۋلتەتىنىڭ ىشىنەن «ايتىسكەر اقىن» ماماندىعى اشىلادى. «ايتىسكەر اقىن» ماماندىعى بويىنشا كۋرس قابىلداۋعا اقىن، جۋرناليست، قازىرگى ايتىس ونەرىنىڭ اقتاڭگەرى، قازاقستاننىڭ ەڭبەك سىڭىرگەن قايراتكەرى ءجۇرسىن ەرمان ارنايى شاقىرىلدى. اكادەميا رەكتورى اسحات ماەميروۆ قازاقستان رەسپۋبليكاسى مادەنيەت جانە سپورت مينيسترلىگى، ت.جۇرگەنوۆ اتىنداعى قازاق ۇلتتىق ونەر اكادەمياسى اكادەميالىق عىلىمي كەڭەسىنىڭ شەشىمىمەن ەرمان ءجۇرسىن مولداش ۇلىنا «قۇرمەتتى پروفەسسور» اتاعى بەرىلگەندىگىن حابارلاپ، كۋالىگىن تابىستادى. ءجۇرسىن ەرمان ءوز سوزىندە: «ءبىر كەزدەرى ءوزىمىز ءتالىم العان قازاق ۇلتتىق ونەر اكادەمياسى عيماراتىنا كەلىپ، وسىنداي قۇتتى كۇنى توسىن سىيعا يە بولىپ تۇرمىن. بۇل مەنىڭ ۇزاق جىلعى ەڭبەگىمە جاسالعان قوشەمەت دەپ ويلايمىن. قازىر عانا جاڭادان اشىلىپ جاتقان «ايتىسكەر اقىن» ماماندىعىنا وقۋعا كەلگىسى كەلەتىن تالاپكەرلەردى تىڭداپ جاتىرمىز. ەل ءىشى – قازىنا. ارينە، تالانتتى بالالار بار. قازىلار القاسى اتىنان وسى جاستاردىڭ اراسىنان قازاق ونەرىنىڭ تۋىن كوككە كوتەرەر تالانتتار شىعارىنا كامىل سەنەمىز. ەلدەن كەلگەن بالالار ونەرىن تانىتىپ جاتىر. اشىق ەسىك كۇنىندە اكادەميا تابالدىرىعىن اتتاعىسى كەلەتىن تالاپكەرلەردىڭ بارلىعىنا تابىس تىلەيمىن. تاۋەلسىز قازاقستانىمىزدىڭ كوشىن العا سۇيرەيتىن ناعىز ماماندارى بولىڭدار. جاڭا بۋىن، جاس قاۋىم، باقتارىڭ اشىلسىن. ءبىزدىڭ بولاشاعىمىز سىزدەردىڭ قولدارىڭىزدا، جەڭىسكە جەتە بەرىڭىزدەر!»،– دەپ ىستىق ىقىلاسىن ءبىلدىردى.     

  « ۇلى دالا دارىندارى» اتتى رەسپۋبليكالىق جاس ونەرپازدار بايقاۋىنا قايتا ورالساق، مۋزىكالىق جانە كوركەمسۋرەت  ورتا وقۋ ورىندارىنىڭ 4-كۋرس ستۋدەنتتەرى مەن ارنايى مامانداندىرىلعان مۋزىكا جانە كوركەمسۋرەت مەكتەپتەرىنىڭ 12-سىنىپ وقۋشىلارى قاتىسىپ، 12 نوميناتسيا ء(ان، جىر، دومبىرا، قوبىز، سىبىزعى-سازسىرناي، جەتىگەن، شەرتەر، ايتىس، كوركەم قىش، كوركەم توقىما، زەرگەرلىك ءىس، اعاشتى كوركەمدەپ وڭدەۋ) بويىنشا باق سىناعان ەدى. قازاقستان رەسپۋبليكاسىنىڭ كورنەكتى ونەر قايراتكەرلەرى مەن ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ بىلىكتى ۇستازدارىنان قۇرالعان قازىلار القاسىنىڭ شەشىمىمەن رەسپۋبليكالىق بايقاۋدىڭ جەڭىمپازدارى ماراپاتتالدى.

سوڭعى جاڭالىقتار

اۋىلدا بالا كوپ، ۇيىرمە از

قازاقستان • بۇگىن، 07:59

جارىس پەن تابىس

ەكونوميكا • بۇگىن، 00:00

اقىلدىڭ ازابى

تاريح • كەشە

مەيرامحانالار جانە پاندەميا

كوروناۆيرۋس • كەشە

جۇرت جاعاجاي ىزدەپ ءجۇر

ايماقتار • كەشە

ۇقساس جاڭالىقتار