جاڭا الىپبيگە كوشۋ دەگەنىمىز, ۇلكەن جاۋاپكەرشىلىكتى تالاپ ەتەدى. ءسوز ەمەس, ءىس العا وزۋى كەرەك. سوندا عانا مىندەت ءمىنسىز اتقارىلادى. ەڭ باستىسى, ۇرپاقتى ساۋاتتىلىققا باۋلۋ, ەملەنى جەتىك ءبىلىپ, ونى ادىستەمە ۇستىندە شىڭداي بەرۋ. بۇل تياناقتى اتقارىلماسا, جەتىك مامان دايىندالماسا, التى جىلدان كەيىن قولدانىسقا ەنەتىن لاتىن گرافيكاسى قيىندىقتارعا تاپ كەلۋى مۇمكىن. مادەنيەت ءجانە سپورت مينيسترلىگى ءتىل ساياساتى كوميتەتى ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى سوڭعى كەزدەرى «جاڭا ەملەنى وقىتۋ ادىستەمەسى» دەگەن تاقىرىپتا لاتىن نەگىزدى قازاق جازۋىن مەڭگەرەتىن ماماندار ازىرلەۋ بويىنشا رەسپۋبليكالىق شارانى قولعا الدى.
تاياۋدا عانا وتانىمىزدىڭ بارلىق وڭىرىندەگى وقۋ ورىندارىنىڭ وقىتۋشىلارى مەن ادىسكەرلەرىن شاقىرىپ, بۇل سالانىڭ وقىمىستى مامان-عالىمدارىن قاتىستىرىپ, 72 ساعاتتىق كۋرس ۇيىمداستىرۋى سوعان دالەل. وندا جاڭا قازاق ءالىپبيىنىڭ فونولوگيالىق نەگىزدەرى, گرافيكاسى مەن قۇرامى, ءتول جانە كىرمە, بىرگە جانە بولەك, كۇردەلى جانە قىسقارعان سوزدەردىڭ, سىزىقشامەن جازىلاتىن سوزدەردىڭ ەملەسى, شەت تىلىنەن ەنگەن ءسوزدەردىڭ ورفوگرافياسى مەن ورفوەپياسى, جاڭا ءالىپبيدى مەڭگەرۋدەگى جاڭا IT جوبالارىن تالاپكەرلەرگە وقىتقان ەدى. سول جاڭا ەملەنى مەڭگەرۋ بارىسىندا يننوۆاتسيالىق-پەداگوگيكالىق تەحنولوگيالاردى, ءادىس-تاسىلدەردى قاتىسۋشىلاردىڭ شەبەرلىگىن شىڭداۋعا ءتيىمدى پايدالاندى. بۇل لاتىننەگىزدى قازاق ءالىپبيى مەن ەملە ەرەجەلەرىنىڭ قۇرىلىمىن, ەملە نورمالارىنىڭ عىلىمي نەگىزدەرىن بەكىتۋگە جول اشاتىنى انىق. ال كۋرستى اياقتاعاندارعا ارنايى سەرتيفيكاتتار تاپسىرىپ, العان بىلىمدەرىن وڭىرلەردە جالعاستىرۋ كەرەكتىگى جۇكتەلدى. ءبىر سوزبەن ايتقاندا, ءالىپبيىمىزدى تۇزەپ, ەملەمىزدى دۇرىستاپ, ونى قالىڭ جۇرتتىڭ يگىلىگىنە جاراتۋ ءدال قازىر ەلدىك ءىستىڭ ءبىر باستاۋى دەسەك, ەش ارتىقتىعى جوق. مۇنداي قادام جىل بويى جالعاساتىنىن دا نازارعا سالا كەتەلىك.
