2019 جىلدىڭ 9 ماۋسىمىندا وتكىزىلۋى جوسپارلانعان سايلاۋ – ەگەمەن ەلىمىز ءۇشىن ساياسي-ەكونوميكالىق ءھام رۋحاني دامۋ مەن وركەنيەتتى ەلدەردىڭ كوش باسىنا شىعۋ جولىندا جاسالىپ جاتقان تاريحي ءمانى بار ماڭىزدى شەشىمدەردىڭ ءبىرى. پرەزيدەنت سايلاۋىن وتكىزۋ ۋاقىتىنىڭ بەلگىلەنۋى ۇلتىمىز ءۇشىن ۇلكەن ساياسي قادام ەكەنى داۋسىز. بۇل سايلاۋ ارقىلى ەلىمىزدە دامۋدىڭ جاڭا ساتىسى باستالماق. سوندىقتان دا ايتۋلى تاريحي دا ماڭىزدى وقيعاعا قازاقستاننىڭ ءاربىر ازاماتى ۇلكەن جاۋاپكەرشىلىكپەن قارايدى دەپ ويلايمىن. وسى تۇرعىدان كەلگەندە, پ.ي.چايكوۆسكي اتىنداعى الماتى مۋزىكالىق كوللەدجىنىڭ ۇجىمى پرەزيدەنت قاسىم-جومارت توقاەۆتىڭ ۇندەۋىن كەڭىنەن تالقىلاي وتىرىپ, الداعى سايلاۋدىڭ ءادىل دە اشىق وتەتىندىگىنە زور سەنىم بىلدىرەدى.
تۇڭعىش پرەزيدەنت – ەلباسى نۇرسۇلتان ءابىش ۇلىنىڭ قاجىرلى ەڭبەگىنىڭ ارقاسىندا تاۋەلسىز مەملەكەتىمىز اپىل-تاپىل باسقان قادامىن نىقتاپ, ەلدىكتىڭ بيىك تۇعىرىنا كوتەرىلدى. الەم قازاقستاندى بەيبىتشىلىك ءسۇيگىش, قوناقجاي, دوستىق پەيىلدى زايىرلى مەملەكەت رەتىندە تانىدى. ەندىگى سايلاۋ ەلباسىمىزدىڭ وسى ۋاقىت ارالىعىندا قالىپتاستىرىپ, قازىعىن قاعىپ كەتكەن ماڭگىلىك ەل يدەياسىن ساتىمەن جالعاپ, ساياسي-ەكونوميكالىق, رۋحاني-مادەني تۇرعىدان جاڭا ساتىعا كوتەرەتىندىگىنە سەنەمىز. بۇل – ءبىزدىڭ جولىمىز! ءبىزدىڭ تاڭداۋىمىز!
ءبىرجان حاسانعالي,
پ.ي.چايكوۆسكي اتىنداعى الماتى مۋزىكالىق كوللەدجىنىڭ ديرەكتورى
