ءبارىن كوزىمىزبەن كوردىك, بىزدە اتى بار, زاتى جوق قيراندىعا اينالعان قازكسر دەيتىن رەسپۋبليكانى ول كەزدە ەشكىم ءبىلمەدى, ەشكىم تانىمادى. نە جۇرتتىڭ الاتىن ايلىعى جوق, جالاقىسى قات, جالاڭ اياق, جالاڭ باس قالعان كەزەڭدە وسى ەلدى مەملەكەت ەتەمىن, دەپ تاۋەكەلگە بەل بۋعان ادام ول – نۇرسۇلتان نازارباەۆ. قۇدايعا شۇكىر, قازاقستاندى ىرگەلى ەل ەتىپ, مەملەكەت قاتارىنا قوستى. ەكونوميكاسىن قالىپتاستىرىپ, ۇلتىمىزدىڭ جاقسى اتىن الەمگە ءماشھۇر ەتە ءبىلدى. ءبىر سوزبەن ايتقاندا, قازاقتىڭ ەسىكتەگى باسىن تورگە وزدىردى.
ءسويتىپ تاۋەلسىز مەملەكەت ورناتقان كۇننەن باستاپ, نۇرسۇلتان ءابىش ۇلى ەلدىڭ تۋىنىڭ تۇعىرلى بولۋىنا, ىنتىماعىنىڭ ىدىراماۋىنا ىقپال ەتۋگە بار كۇشىن سالدى. ەگەمەن ەلدە بىرلىك پەن ىنتىماق بولماسا, ءبىز بۇگىنگىدەي مەملەكەت قۇرا المايتىن ەدىك. بۇل ءۇلكەن سارابدال ساياساتتى قاجەت ەتەدى. تاۋبە, قازىر قازاقستان ءىرگەلى مەملەكەت بولدى, الەم ساناساتىن جاعدايعا جەتتىك. ءار ەلدەن ەلوردامىزعا كەلىپ اقىل-كەڭەس سۇرايتىن, دارەجەگە كوتەرىلدىك. وسىنداي ءبىر جاقسى كەڭ جولعا تۇسكەنىمىزدى سەزەمىز. قازاقستاننىڭ بۇل دامۋىنداعى ەلباسىنىڭ ءرولى وراسان زور.
وسى رەتتە ەرەكشە ايتا كەتەتىن تاعى ءبىر تاڭعالارلىق نارسە ول – ەلباسىنىڭ ات اۋىستىرعانى بولدى. بيلىك الماستى, ءوز ەركىمەن كونستيتۋتسيامىزعا سايكەس بيلىكتى سەنات توراعاسىنا بەردى. جانە ول دانا شەشىم وتە دۇرىس باعىت الدى.
ءبىز قاسىم-جومارت توقاەۆتى كوپتەن بىلەمىز. ەلباسىنىڭ ءبىراز ۋاقىتتان بەرى جانىندا كەلە جاتقان, ىشكى, سىرتقى ساياساتتى ورنىقتىرۋعا ۇلكەن ەڭبەك ەتكەن, كەيىنگى ۋاقىتتا سەناتتىڭ توراعاسى رەتىندە دە قازاقستاننىڭ ماڭىزدى قادامدارىنا ىڭعايلى ىقپال ەتىپ, ەڭبەگى ءسىڭىپ كەلە جاتقان ازامات.
بۇل قازاقتىڭ كوشەلى, ورەسى بيىك پاراسات پايىمى تەرەڭ تۇلعاسى. بىرنەشە شەت ءتىلدى ءبىلۋىمەن قاتار, ادامگەرشىلىگى, كىسىلىگى جوعارى جان. مەن ول كىسىنىڭ بارلىق شەشىمىن جان-ءتانىممەن قولدايمىن.
تەكتىنىڭ ۇرپاعى, اكەسى جاقسى جازۋشى, ۇلكەن ازامات بولدى. ال, ەندى بۇگىندە سول تەكتىدەن قالعان تۇياق ورەسى بيىك ونەگەلى جان ەكەنىن كورسەتىپ وتىر.
پرەزيدەنتتى حالىق سايلامايىنشا, ونىڭ وكىلەتتىگى دە تولىق جۇرە قويادى دەپ ويلامايمىن. سوندىقتان, ەندى نە دە بولسا تاۋەكەلگە بەل بۋىپ, ۋاقىتى كەلگەن تۇستا پرەزيدەنت ق.توقاەۆ سايلاۋدى مەرزىمىنەن بۇرىن تاعايىندادى. جانە بۇكىل الەمگە اتالعان سايلاۋدىڭ اشىق, زاڭعا سايكەس دۇرىس وتەتىنىنە كەپىلدىك بەرەتىنىن جەتكىزدى.
بۇل سايلاۋ ءبىزدىڭ ىشكى ەكونوميكامىزعا دا, سىرتقى ساياساتىمىزعا دا ىقپال ەتەدى. سايلاۋ ناتيجەسىندە لايىقتى ازامات ەل تىزگىنىن الادى دەپ سەنەمىن.
قۇداي قالاسا, ەلىمىزدىڭ پرەزيدەنتىن سايلاپ الساق, بۇدان دا بيىك بەلەستەردى باعىندىراتىنىمىز ءسوزسىز.
مىرزاتاي جولداسبەكوۆ,
مەملەكەت جانە قوعام قايراتكەرى
