بۇل شەشىم بۇگىنگى تاڭدا ماڭىزدى ءارى قاجەتتى ەكەنى انىق. ءبىز وزگەرىسى قىم-قۋىت ءارى تىم جىلدام الەمدە ءومىر ءسۇرىپ جاتىرمىز. بۇل رەتتە كەز كەلگەن مەملەكەتتىڭ ساياسي جۇيەسىنىڭ ەۆوليۋتسياسى – زاڭدى پروتسەسس. ترانزيتتىك كەزەڭ تۇراقتىلىق پەن قوعامدىق كەلىسىم كەزەڭىنە جالعاسادى دەپ ۇمىتتەنەمىن. سايكەسىنشە, ساياسي پارتيالاردىڭ جاقىن ارادا ءوز كانديداتتارىن ايقىندايتىنىنا سەنىمدىمىز.
ەڭ باستىسى, پرەزيدەنت ءوزى مالىمدەگەندەي, بۇل ماڭىزدى قادامعا بىردەن كەلە سالعان جوق. پرەزيدەنت قاسىم-جومارت توقاەۆ تۇڭعىش پرەزيدەنت – ەلباسى نۇرسۇلتان نازارباەۆپەن كەڭەسە وتىرىپ, پارلامەنت پالاتالارىنىڭ باسشىلارىمەن, كونستيتۋتسيالىق كەڭەسپەن, ساياسي پارتيالاردىڭ جەتەكشىلەرىمەن اقىلداسا كەلە, ءبىر شەشىمگە كەلدى. حالىقتىڭ كۇپتى كوڭىلىن كۇتكەن ۋاقىتىندا ءدوپ باسىپ وتىر. ساياسي تۇراقتىلىق پەن ايقىن باعىت پرەزيدەنت وكىلەتتىلىگى تولىق بولعاندا عانا ءوز ناتيجەسىن بەرەدى.
سونداي-اق بۇل تاريحي ماڭىزدى كەزەڭدە حالىقتىڭ بەلسەندىلىگىن جاقسى جاعىنان كورىپ وتىرمىز دەۋگە بولادى. ونىڭ ۇستىنە, بيلىكتى تاپسىرۋدا ترانزيتتىك ءرولدى اتقارعان قاسىم-جومارت توقاەۆ حالىققا ەتەنە جاقىن ەكەنىن كورسەتتى.
الدا ينتەگراتسيا عاسىرى. قازاقستان ءتارىزدى دامۋ جولىنا تۇسكەن ەلدىڭ تىزگىنى حالىقارالىق دەڭگەيدە دە, ەل الدىندا دا, ۇلت الدىندا دا ابىرويى بار تۇلعادا بولعانى دۇرىس.
ءبىزدىڭ باستى بايلىعىمىز – تاۋەلسىزدىك پەن بەيبىتشىلىك. ىشكى تۇراقتىلىق تولىق ورناماعان جەردە ەشتەڭە دە ەسەلەنبەيدى. ەلىمىزدىڭ اتا زاڭىنا, ياعني كونستيتۋتسياسىنا سايكەس قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن 2019 جىلدىڭ 9 ماۋسىمىندا ءوتكىزۋ تۋرالى شەشىمدى مەن وسى قۇبىلىستاردى باياندى ەتۋ ماقساتىندا جاسالعان شەشىم دەپ بىلەمىن.
دەموكراتيا ارقاشان دامۋ پروتسەسىندە بولۋى قاجەت. سوندىقتان دا تاريحي ءسات ادىلەتتىلىكتىڭ سالتانات قۇرۋى سايلاۋدىڭ سالماعىن ارتتىراتىنى ءسوزسىز. سايلاۋداعى باسىم شەشىمدەردىڭ كوبى – حالىقتىكى. ءبىرىنشى – ءبىز بەلسەندى تۇردە اتسالىسۋىمىز قاجەت. ءار ازامات سايلاۋدا داۋىس بەرۋ ارقىلى مەملەكەتتىك بيلىكتى قالىپتاستىرادى. سونداي-اق ءوزىنىڭ جانە وزىنەن كەيىنگى وسكەلەڭ ۇرپاعىنىنىڭ مۇددەسىنە سايكەس شەشىم قابىلدايتىنىن ەستەن شىعارماعانى ءجون.
وتپەلى كەزەڭنىڭ وكپەگى قاتتى بولادى. ءبىز سول قىسقا مەرزىمدە ۇپايىمىز تۇگەل, ۇلتىمىز تۇتاس, ۇرپاعىمىز امان بولعانىن قالايمىز.
دۋلات يسابەكوۆ,
جازۋشى, مەملەكەتتىك سىيلىقتىڭ لاۋرەاتى
