فارابي فورۋمى بارلىق دەڭگەيدە ءتىل ۇيرەتەتىن شەتەلدىك مامانداردى جينادى

ايماقتار • 10 ءساۋىر، 2019

فارابي فورۋمى بارلىق دەڭگەيدە ءتىل ۇيرەتەتىن شەتەلدىك مامانداردى جينادى

732 رەت كورسەتىلدى

ءال-فارابي اتىنداعى قازاق ۇلتتىق ۋنيۆەرسيتەتىندە ءوتىپ جاتقان VI حالىقارالىق فارابي وقۋلارى اياسىندا «ءال-ءفارابيدىڭ اۋدارما الەمى جانە شەت تىلدەرىن مەڭگەرۋ اسپەكتىسىندەگى مادەنيەتارالىق زەرتتەۋلەردىڭ ترانسفورماتسياسى» اتتى حالىقارالىق عىلىمي-ادىستەمەلىك كونفەرەنتسياسى ءوتتى.

ايناش ەسالى

كونفەرەنتسياعا قر سىرتقى ىستەر مينيسترلىگىنىڭ وكىلدەرى، يتاليا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى، شەتەلدىك فرانتسيا، شۆەيتساريا، يتاليا، كانادا، ۇلىبريتانيا، رەسەي، وڭتۇستىك كورەيا، پولشا جانە قازاقستاندىق سۇلەيمەن دەميرەل ۋنيۆەرسيتەتى، ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى، قازاق ۇلتتىق اگرارلىق ۋنيۆەرسيتەتى، ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ عالىمدارى، سونداي-اق، قازاق ۇلتتىق ۋنيۆەرسيتەتىنىڭ پروفەسسورلارى، دوكتورانتتارى مەن ماگيسترانتتارى قاتىستى.

اۋدارما – مادەنيەتارالىق قارىم-قاتىناستىڭ ءبىر ءتۇرى رەتىندە ءارتۇرلى مادەنيەتتەر مەن مەنتاليتەتتەر اراسىندا كوپىر سالاتىن ەڭ ءتيىمدى جول بولىپ تابىلادى. اۋدارما ونەرى مادەنيەتتەردىڭ ديالوگىندا ۇلكەن ءرول اتقارادى.

ال حالىقارالىق قاتىناستار سالاسىندا بىلىكتىلىگى جوعارى اۋدارماشى مامانداردى دايارلاۋ كەزەك كۇتتىرمەيتىن ماسەلەلەردىڭ ءبىرى.

كونفەرەنتسيا بارلىق دەڭگەيدە ءتىل ۇيرەتەتىن، لينگۆيستيكا مەن اۋدارما ىسىنە قىزىعۋشىلىق تانىتاتىن بۇكىل الەمنىڭ زەرتتەۋشىلەرىن، ءتىل ماماندارى مەن وقىتۋشىلارىن جينادى.

كونفەرەنتسيانىڭ اشىلۋ سالتاناتىندا قازۇۋ رەكتورى ع.م.مۇتانوۆ، قر سىرتقى ىستەر مينيسترلىگىنىڭ الماتى قالاسىنداعى وكىلدىگى باسشىسى ر.ي.بولتىرىكوۆ، يتاليانىڭ توتەنشە جانە وكىلەتتى ەلشىسى پاسكۋال د'اۆينو، فرانتسۋز رەسپۋبليكاسىنىڭ قازاقستانداعى ەلشىلىگىنىڭ ۋنيۆەرسيتەتتىك ىنتىماقتاستىق جونىندەگى اتتاشەسى جيل مامەتتس ءسوز سويلەدى.

پلەنارلىق وتىرىستا جەنەۆا ۋنيۆەرسيتەتىنىڭ پروفەسسورى ابدەلجاليل اككاريدىڭ، «مادەني الۋانتۇرلىلىك جانە حالىقارالىق ءبىلىم بەرۋ»،سانكت-پەتەربۋرگ ۋنيۆەرسيتەتى جوعارى اۋدارما مەكتەبىنىڭ ديرەكتورى، پروفەسسور ي.الەكسەەۆانىڭ «حالىقارالىق ىلەسپە اۋدارماشىلاردى دايارلاۋ جۇيەسى»، قازۇپۋ پروفەسسورى ت.اياپوۆانىڭ «قازاقستانداعى كوپ ءتىلدى ءبىلىم بەرۋ ماسەلەسى»، بيرمينگەم ۋنيۆەرسيتەتىنىڭ پروفەسسورى ماركۋس پەرلماننىڭ باياندامالارى تىڭدالدى. ءار سپيكەر سەمينارلار مەن ماستەر-كلاسستار وتكىزدى. باياندامالار كونفەرەنتسياعا قاتىسۋشىلار ءۇشىن وتە قىزىقتى بولدى. ءوز تاراپتارىنان بايانداماشىلارعا سۇراقتار قويىپ، پىكىرلەرىن ايتتى.

ۇسىنىلعان باياندامالاردا شەت ءتىلىن ۇيرەتۋدەگى انا ءتىلىنىڭ، جاس ەرەكشەلىگىنىڭ ءرولى، اۋدارماشىلاردى دايارلاۋدا كەزدەسەتىن قيىندىقتار مەن ولاردى شەشۋ جولدارى، قاجەتتى مادەنيەتارالىق قارىم-قاتىناس قۇزىرەتتىلىكتەرى جانە شەتەل ءتىلى مەن اۋدارمانى ۇيرەتۋدە قولدانىلاتىن يننوۆاتسيالىق تەحنولوگيالاردىڭ تاجىريبەلىك ماڭىزى كورىنىس تاپتى.

الماتى