ايماقتار • 10 ءساۋىر، 2019

ءال-فارابي اتىنداعى قازۇۋ-دە جوعارى اۋدارما مەكتەبىن قۇرۋ ۇسىنىلدى

ءال-فارابي اتىنداعى قازاق ۇلتتىق ۋنيۆەرسيتەتىندە ءوتىپ جاتقان VI حالىقارالىق فارابي وقۋلارى اياسىندا «ءال-ءفارابيدىڭ اۋدارما الەمى جانە شەت تىلدەرىن مەڭگەرۋ اسپەكتىسىندەگى مادەنيەتارالىق زەرتتەۋلەردىڭ ترانسفورماتسياسى» اتتى حالىقارالىق عىلىمي-ادىستەمەلىك كونفەرەنتسياسىندا كوپ تىلدە تەڭدەي اۋدارما جاسالىپ، قاتىسۋشىلاردىڭ كوڭىلىنەن شىقتى.

ايناش ەسالى

كونفەرەنتسيا قاتىسۋشىلارى مادەنيەتارالىق جانە اۋدارما زەرتتەۋلەرىن ودان ءارى دامىتۋ ءۇشىن كوپتىلدى ءبىلىم بەرۋدە ستۋدەنتتەر مەن وقىتۋشىلارعا شەتەلدە ۇنەمى تاعىلىمدامادان ءوتۋدى ۇيىمداستىرۋ، اتالمىش كونفەرەنتسيانىڭ جوعارى عىلىمي دەڭگەيىن ەسكەرە وتىرىپ، بولاشاقتا كوپتىلدى سەكتسيالاردىڭ جۇمىسىن جالعاستىرۋ مەن ماتەريالدىق بازانى جاقسارتۋدى ۇسىندى

حالىقارالىق ىنتىماقتاستىقتى قارقىندى دامىتۋ ءۇشىن جەنەۆا ۋنيۆەرسيتەتىنىڭ ەلەكتروندى جۋرنالىنا ەڭ ۇزدىك باياندامالاردى ىرىكتەۋ قاجەتتىگى ايتىلدى.

سانكت-پەتەربۋرگ جوعارى اۋدارماشىلار مەكتەبىنىڭ ۇلگىسىن باسشىلىققا الا وتىرىپ، ءال-فارابي اتىنداعى قازۇۋ-دە ىلەسپە اۋدارماشىلار دايارلايتىن جوعارى اۋدارما مەكتەبىن قۇرۋ ۇسىنىلدى.

كونفەرەنتسيادا جەنەۆا ۋنيۆەرسيتەتىنىڭ پروفەسسورى ا. اككاري: «مەن وزىمە جاڭا الەمدى اشتىم. كوپتىلدى، كوپ مادەنيەتتى ورتادا ەشقانداي كەدەرگىسىز ءومىر ءسۇرىپ جاتقان حالىقتى كوردىم. قازاقستانعا ەكىنشى رەت كەلدىم. قازاقتاردىڭ قوناقجايلىلىعى، جاستاردىڭ بىرنەشە شەت تىلىندە ەركىن سويلەي الۋى مەنى تاڭعالدىردى. بۇل كەرەمەت ەلگە مەن تاعى دا كەلگىم كەلەدى. بۇدان ءارى بايلانىسىمىز نىعايىپ، جاڭا زەرتتەۋلەرگە جول اشاتىنىمىزعا سەنىمدىمىن»، – دەدى.

QS World Universities Rankings بويىنشا 85 ورىنداعى بيرمينگەم ۋنيۆەرسيتەتىنىڭ پروفەسسورى ماركۋس پەرلمان مەن 105 ورىنداعى جەنەۆا ۋنيۆەرسيتەتىنىڭ پروفەسسورى ا. اككاريدىڭ ءال-فارابي اتىنداعى قازۇۋ مەن بۇدان ءارى قارىم-قاتىناستى جاقسارتۋعا دەگەن نيەتى وتاندىق ۋنيۆەرسيتەتىمىز ءۇشىن ۇلكەن مارتەبە.

سونداي-اق شەتەلدىك ەلشىلەر مەن قر سىرتقى ىستەر مينيسترلىگى وكىلدەرىنىڭ قولداۋ كورسەتكەن، مۇنداي كونفەرەنتسيالار ەل مەن ەلدىڭ، مادەنيەتتەردىڭ اراسىندا كوپىر سالۋعا سەپتەسەتىنىنە تاعى دا كوز جەتكىزىلدى.

الماتى