وندا بىلاي دەلىنگەن:
– 2019 جىلدىڭ 9 ساۋىرىندە قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆ وسى جىلدىڭ 9 ماۋسىمىندا قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋى وتەتىنىن جاريالادى. بۇعان دەيىن ەلىمىزدە كونستيتۋتسيالىق زاڭعا سايكەس بيلىك ترانزيتى جۇزەگە استى. ەلباسى – تۇڭعىش پرەزيدەنتىمىز ن. نازارباەۆ ەلىمىزدىڭ تاۋەلسىزدىگىن نىعايتىپ, شەكاراسىن بەكىتىپ, الەمدىك ارەناداعى بەدەلىن بيىكتەتتى. قازاقستاننىڭ بولاشاعىن ايقىندايتىن ىرگەلى ستراتەگيالىق باعدارلامالاردىڭ باستاماشىسى بولدى. كەزى كەلگەندە ساليقالى ساياساتكەرگە ءتان شەشىممەن ەل تىزگىنىن بەلگىلى قوعام قايراتكەرى ق.توقاەۆقا ۇستاتتى.
قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆتى شىن مانىندە ەل ىشىندە عانا ەمەس, حالىقارالىق ساياسات ساحناسىندا دا بەدەلى بەكەم, بىلىكتى ازامات, ەل مۇددەسىنە ادال, پاراساتتى دا ادىلەتتى ساياسي قايراتكەر دەپ باعالايمىز. بۇگىن پرەزيدەنتتىڭ كەزەكتەن تىس سايلاۋ تۋرالى شەشىم قابىلداۋىن دا مەملەكەتشىلدىك مۇراتتان تۋىنداعان قادام دەپ قابىلدايمىز. بيلىك ترانزيتىنە بايلانىستى ەل اراسىندا ەكىۇداي پىكىر قالىپتاسپاۋى ءۇشىن تەك كونستيتۋتسيا تالاپتارىنا جۇگىنىپ, حالىقتىق سايلاۋ جاريالاۋ – بۇگىنگى قازاقستان قوعامى ءۇشىن وڭ شەشىم ءارى ەل بيلىگىنىڭ الەمدىك قوعامداستىق الدىنداعى مىندەتتەرى تۇرعىسىنان دا ءمۇلت كەتپەگەنىن كورسەتەتىن ماڭىزدى قادام.
بۇل تاۋەلسىز ەلىمىزدىڭ ەرتەڭى ءۇشىن اسا ماڭىزدى ساياسي شەشىم. قازاقستان رەسپۋبليكاسىنىڭ كونستيتۋتسياسى بويىنشا ەل پرەزيدەنتى دەموكراتيالىق پرينتسيپتەر نەگىزىندە سايلانادى. ەلىمىزدىڭ ءاربىر ازاماتىنىڭ داۋىس بەرۋى ارقىلى ءوزىنىڭ ۇمىتكەرىن تاڭداۋىنا تولىقتاي قۇقى بار. سايلاۋ تۋرالى كونستيتۋتسيالىق زاڭ كۇشىندە. ياعني كەزەكتەن تىس پرەزيدەنتتىك سايلاۋ وتكىزۋ ءۇشىن زاڭ شەڭبەرىندەگى تەتىكتەر تولىقتاي قاراستىرىلعان جانە ەل پرەزيدەنتىنىڭ مۇنداي ماڭىزدى شەشىم قابىلداۋىنا زاڭ تۇرعىسىنان قانداي دا ءبىر قايشىلىق جوق.
ءبىز تاۋەلسىزدىكتىڭ العاشقى جىلدارىنان باستاپ دەموكراتيالىق باعىتتى تاڭداپ, بىرلىك پەن ىنتىماعى جاراسقان, ساياسي ءداستۇرى ورنىققان قوعام ورناتتىق. الەمدىك قوعامداستىقتا قازاقستاندى دامۋدىڭ داڭعىل جولىنا تۇسكەن, ىنتىماقشىل, مامىلەگەر مەملەكەت رەتىندە تانيدى. تاۋەلسىزدىك جىلدارىندا قالىپتاسقان وسى تۇراقتى قوعامدى بۇگىنگىدەي وتپەلى كەزەڭدە قانداي دا ءبىر ساياسي قايشىلىقتار مەن قاتەلىكتەرگە ۇرىندىرماي, حالىقتىڭ سايلاۋ قۇقى ارقىلى تاڭداۋ جاساۋىنا مۇمكىندىك بەرۋ ەڭ ءادىل ءارى دۇرىس شەشىم دەپ قابىلدايمىز.
قازاقستان رەسپۋبليكاسىنىڭ ءاربىر ازاماتىن ەلىمىز ءۇشىن وسىناۋ سىندارلى ساتتە ازاماتتىق بەلسەندىلىكتەرىن تانىتۋعا, بارشا وكىمەتتىك جانە قوعامدىق ينستيتۋتتاردى كەزەكتەن تىس پرەزيدەنتتىك سايلاۋدىڭ مەيلىنشە ءادىل ءارى اشىق وتۋىنە اتسالىسۋعا شاقىرامىز.
