بۇل رەتتە بىلتىر 9 اي ىشىندە قۇرىلىس-مونتاج جۇمىستارىنىڭ باستالعانى تۋرالى 198 حابارلاما قابىلدانىپتى. ونىڭ ىشىندە 118 نىسان مەملەكەتتىك, ال 80 نىسان جەكەمەنشىك بولىپ وتىر ەكەن. سونىمەن قاتار جىل باسىنان بەرى بارلىعى 2546 حات قارالسا, جەكە جانە زاڭدى تۇلعالاردان 146 ارىز-شاعىم ءتۇسىپ, ونىڭ بارلىعى قولدانىستاعى زاڭنامالار تالاپتارىنا سايكەس قارالىپ, ارقايسىسىنا دالەلدى جاۋاپتار بەرىلىپتى.
ەلباسى ءوزىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا حالىقتىڭ تۇرمىس ساپاسىن ارتتىرۋ ءۇشىن بىرقاتار باسىمدىقتاردى جاريا ەتكەن بولاتىن. سونىڭ ىشىندە پرەزيدەنت قۇرىلىستاردىڭ, عيماراتتار مەن نىسانداردىڭ ساپالى ءارى تۇرعىندارعا قاۋىپسىز بولۋى ءۇشىن باقىلاۋ جۇمىستارىن كۇشەيتۋ, ولاردىڭ ساۋلەت, قالا قۇرىلىسى جانە قۇرىلىس زاڭدارى مەن نورمالارىنا تولىق سايكەستىكتە بولۋى قاجەتتىلىگىن اتاپ ءوتتى. بۇل ارينە ءبىرىنشى كەزەكتە قۇرىلىسقا قاتىسۋشىلار تاراپىنان ياعني, تاپسىرىسشىلار مەن مەردىگەرلەر, تەحنيكالىق جانە اۆتورلىق قاداعالاۋشىلارمەن قۇرىلىستىڭ ساپاسىنا باستى كوڭىل ءبولىپ, ونىڭ بەرىك ءارى سەنىمدى بولۋىن قاداعالاۋدى مىندەتتەيدى. ال ەلباسى جولداۋىنان تۋىندايتىن وسىناۋ مىندەتتەردى جۇزەگە اسىرۋ وڭىردە قانشالىقتى بەلسەندى جۇرگىزىلىپ كەلەدى؟
ماسەلەن, تاراز قالاسىنىڭ وزىندە جابايى ساۋدا نۇكتەلەرى مەن بەيبەرەكەت ورنالاسقان ساۋدا ورىندارى ءالى دە بار. كەزىندە وبلىس جانە قالا باسشىلىعى بىرلەسىپ, بىرقاتار زاڭسىز ساۋدا نۇكتەلەرىنىڭ كوزىن جويعانىمەن, ونى تۇبىرىمەن جوق قىلۋ مۇمكىن بولماي تۇر. «وسى ورايدا ءوڭىر باسشىسى اسقار مىرزاحمەتوۆ وبلىس اۋماعىنداعى بەيبەرەكەت قۇرىلىستاردىڭ الدىن الۋ ماقساتىندا شارالار قابىلداۋ بويىنشا ناقتى تاپسىرمالار بەرگەن بولاتىن. ءوز كەزەگىندە, وبلىس اكىمىنىڭ ورىنباسارى ەركەبۇلان داۋىلباەۆپەن 2018 جىلدىڭ 16 شىلدەسىندە اۋداندار مەن تاراز قالاسىندا زاڭسىز, نەگىزگى قۇجاتتارسىز جانە ساپاسىز ءجۇرگىزىلىپ جاتقان قۇرىلىستاردىڭ الدىن الۋ, بولدىرماۋ ماقساتىندا ءىس-شارالار جوسپارى بەكىتىلدى. ءىس-شارالار جوسپارىن ورىنداۋ ماقساتىندا باسقارمامەن قۇرىلىسقا قاتىسۋشى تۇلعالاردىڭ ءوز مىندەتتەرىن دۇرىس ورىنداۋىن باقىلاۋ, زاڭسىز, ءوز بەتىمەن سالىنعان قۇرىلىستاردى بولدىرماۋ بويىنشا شارالار قابىلدانۋدا», دەيدى باسقارما باسشىسى.
وسى ۋاقىت ارالىعىندا وبلىس اۋماعىنداعى قۇرىلىسى جۇرگىزىلىپ جاتقان نىساندارعا بارلىعى 123 تەكسەرۋ جۇمىستارى ءجۇرگىزىلگەن ەكەن. بۇل رەتتە جۇرگىزىلگەن تەكسەرۋلەردىڭ قورىتىندىلارىنا سايكەس, بۇزۋشىلىقتار انىقتالعان نىساندار بويىنشا 51 نۇسقاما بەرىلىپ, 112 اكىمشىلىك-قۇقىق بۇزۋشىلىق تۋرالى ءىس قارالعان. ناتيجەسىندە 18 ميلليون 998 مىڭ 298 تەڭگە اكىمشىلىك ايىپپۇل سالىنعان. ق.ايتقۇلوۆتىڭ ايتۋىنشا, تاراز قالاسىندا 1 نىسان زاڭسىز سالىنعانى ءۇشىن سوت شەشىمىنىڭ نەگىزىندە بۇزدىرىلعان. نىساندى بۇزدىرۋ ءۇشىن جىل باسىنان 8 اكىمشىلىك قۇقىق بۇزۋشىلىق تۋرالى حاتتاما تولتىرىلىپ, سوتقا جولدانعان. ونىڭ ىشىندە 2 نىساندى بۇزدىرۋ تۋرالى شەشىم شىقسا, 4 ماتەريال بويىنشا سۋديالار تەك ايىپپۇلمەن شەكتەلگەن. قازىرگى ۋاقىتتا 2 ءىس سوتتا قارالۋدا ەكەن. «بۇعان قوسا, تاراز قالاسىندا جاپسارلاس زاڭسىز قۇرىلىستى بۇزدىرۋ ءۇشىن ازاماتتىق تارتىپتە تالاپ-ارىز جولدانعان. قازىرگى ۋاقىتتا تاراز قالالىق سوتىمەن قارالۋدا. سونىمەن قاتار قۇرىلىس نىساندارىن زاڭ بۇزۋشىلىقپەن سالىپ, كەيىن كىناسىن مويىنداپ, سوتتىڭ شەشىمىنسىز ءوز ەركىمەن بۇزدىرىپ جاتقان ازاماتتار دا بار. قالادا قۇرىلىس رەتتەۋ سىزىقتارىن ساقتاماي سالىپ, قۇرىلىس نورمالارىن بۇزعانى ءۇشىن نىسان يەسى اكىمشىلىك جاۋاپكەرشىلىككە تارتىلىپ, بۇزۋشىلىقتارمەن سالىنعان عيماراتتىڭ ءبىر بولىگىن ءوز ەركىمەن بۇزدى. بۇعان قوسا, باسقارما ساۋلەت, قالا قۇرىلىسى جانە قۇرىلىس قىزمەتى سالاسىنداعى جۇمىستاردى ليتسەنزيالاۋ جانە ينجينيرينگتىك قىزمەتتى جۇزەگە اسىراتىن تۇلعالاردى اتتەستاتتاۋ بويىنشا مەملەكەتتىك قىزمەت كورسەتەدى», دەيدى ول.
اتالعان باسقارمانىڭ مالىمەتىنشە, بىلتىر 9 اي ىشىندە ساۋلەت, قالا قۇرىلىسى جانە قۇرىلىس قىزمەتى سالاسىندا جۇمىس ىستەۋگە مەملەكەتتىك ليتسەنزيا الۋ ءۇشىن 178 ءوتىنىش قابىلدانعان. ونىڭ 7-ەۋى قارالۋ ۇستىندە, بەرىلگەن ليتسەنزيا – 57, ال قايتا رەسىمدەلگەنى – 52, بەرۋدەن باس تارتىلعانى – 42 ليتسەنزيا. سونىمەن قاتار قوسىمشا جۇمىس تۇرلەرىنە 10 ليتسەنزيا بەرىلگەن. اتتەستاتسيالاۋ بويىنشا جىل باسىنان بەرى 293 ءوتىنىش قابىلدانسا, 105 ءوتىنىش اتتەستاتسيالاۋدان ءوتىپ, 133 ءوتىنىش وتپەگەن جانە 31 ءوتىنىش قاعاز تاسىمالداعىشتان ەلەكتروندى فورماتقا قايتا رەسىمدەلگەن.
بۇگىندە تاراز قالاسىنىڭ ساۋلەتتىك كەلبەتىن ارتتىرۋ ماقساتىندا كوپتەگەن جوبالار قولعا الىندى. دەگەنمەن, ءتيىستى مەملەكەتتىك مەكەمەلەر تاراپىنان قۇرىلىس قاعيداسىنا قىراعىلىق تانىتۋ قاجەت-اق. جۇيە بولسا عانا ءىستىڭ بەرەكەسى ارتىپ, ناتيجەسى جاقسى بولماق.
