وسى جارىس قارساڭىندا «الماتى» كلۋبىنىڭ ديرەكتورى ولەگ سەۆەرگين: «بۇل – ۇلتتىق ليگانىڭ ەڭ ۇزدىك كوماندالارىنىڭ باسىن قوسىپ وتىرعان رەسمي جارىس. ەل بىرىنشىلىگىنە قاتىساتىن بارلىق كلۋبتار وسى دودادا دا دارا شىعۋدى كوزدەيدى. ياعني, الاڭعا شىققان ويىنشىلاردىڭ ەشقايسى وسالدىق تانىتپايدى. تاعى ءبىر ايتا كەتەرلىك جايت, وسى جارىستا تەك قازاقستاندىق ويىنشىلار عانا ونەر كورسەتۋدە. لەگيونەرلەردىڭ قاتىسۋىنا رۇقسات جوق. سوندىقتان دا قازاقستان كۋبوگىندا بارلىق كوماندالاردىڭ مۇمكىندىگى بىردەي», – دەپ ايتقان ەدى.
العاشقى كۇنى قوس كەزدەسۋدى تاماشالادىق. اسىرەسە, «توبىل» مەن «استانا» اراسىنداعى باسەكە وتە شيەلەنىستى ءوتتى. بىردە نۇر-سۇلتاننىڭ كومانداسى العا شىقسا, ەندى بىردە قوستانايلىقتار قارقىنىن كۇشەيتتى. ال ماتچتىڭ اياقتالۋىنا ەكى مينۋت قالعاندا تارازى باسى تەڭەسكەنىمەن, سوڭعى ساتتە ەلوردالىق باسكەتبولشىلار قارسىلاسىنىڭ ۋىسىنان جەڭىستى ج ۇلىپ اكەتتى. ەسەپ – 83:82.
كەلەسى باسەكەدە «سينەگورە» مەن «الماتى لەگيونى» كلۋبتارى شەبەرلىك بايقاستى. ءبىرىنشى كەزەڭنىڭ باسىندا الماتىلىقتار العا شىققانىمەن, ودان كەيىن كوكشەتاۋلىقتاردىڭ مىسى باسىم بولدى. ناتيجەسىندە وسى ويىن 73:50 ەسەبىمەن قوناقتار پايداسىنا شەشىلدى.
بۇگىن ءبىز «اتىراۋ بارىسى» مەن «استانا» جانە الماتى لەگيونى مەن «توبول» اراسىنداعى باسەكەلەردى تاماشالايمىز.
