ەرلەر مەن ايەلدەر اراسىندا وتەتىن جارىستا سارى قۇرلىقتىڭ ەڭ ۇزدىك 32 سپورتشىسى عانا قاتىسادى. سولاردىڭ اراسىندا كيريلل گەراسيمەنكو دا بار. قازىرگى كەزدە ول الەمدىك رەيتينگتە 49 ورىندا تۇر. سونىڭ ارقاسىندا جەرلەسىمىز ىرىكتەۋ سىنىنا قاتىسپاي-اق ازيا كۋبوگىندا كۇش سىناسۋ قۇرمەتىنە يە بولدى.
جالپى العاندا سپورتتىڭ بۇل تۇرىندە ازيالىقتاردىڭ بەدەلى وتە زور جانە دە قارقىندارى وتە كۇشتى. بۇگىنگى تاڭدا «توپ-50» ۇستەل تەننيسشىلەرىنىڭ تەڭ جارتىسىنان استامى سارى قۇرلىقتىڭ وكىلدەرى ەكەنى جوعارىدا ايتىلعان سوزىمىزگە دالەل. ولاردىڭ اراسىندا جاپونيانىڭ – 7, قىتاي مەن وڭتۇستىك كورەيانىڭ – 6, تايپەيدىڭ – 3, ءۇندىستاننىڭ – 2 جانە گونكونگ پەن قازاقستاننىڭ – 1 ويىنشىسى بار. بۇل از دەسەڭىزدەر, اسپاناستى ەلىنىڭ ءۇش بىردەي ورەنى الەمدىك رەيتينگتە كوش باستاپ تۇرعانىن دا ەسكەرگەن ءجون. ولار – فان چجەندون, سيۋي سين جانە لين گاويۋان. ءتورتىنشى ورىندا – جاپونيالىق توموكادزۋ حاريموتو. سونداي-اق, 7-10 ورىندارعا دا ازيالىقتار جايعاسىپ وتىر. ولار – كورەيالىق لي سان سۋ, گونكونگتىق ۆون چۋن تين جانە جاپونيالىق كوكي نيۆا مەن دجۋن ميزۋتاني. ودان كەيىنگى ءۇش ورىن دا سارى قۇرلىق وكىلدەرىنە تيەسىلى. مىنە, وسى دەرەكتەردىڭ ءوزى-اق ازيادا ۇستەل تەننيسىنىڭ دامۋ قارقىنى كەرەمەت ەكەنىن ايعاقتاپ تۇر.
– ازيا كۋبوگىندا كيريلل گەراسيمەنكونىڭ ءساتتى ونەر كورسەتۋى كوپ جاعدايدا جەرەبەگە بايلانىستى بولماق. ماسەلەن, وتكەن جىلى ول كىل مىقتىلارمەن ءبىر توپقا ءتۇستى. جەرلەسىمىزگە الەمنىڭ ءبىرىنشى راكەتكاسى, قىتايلىق فان چجەندونمەن ايقاسۋعا تۋرا كەلدى. تورتكۇل دۇنيەنىڭ تەڭدەسسىزدەر تىزىمىندە ءتورتىنشى ورىندا تۇرعان جاپونيالىق توموكادزۋ حاريموتومەن دە كۇش سىناسۋ وڭاي بولعان جوق, – دەيدى قازاقستان قۇراماسىنىڭ كەڭەسشى-باپكەرى دميتري لەۆەنكو.
