شىعارماشىلىق باعىتتاعى جوعارى وقۋ ورىندارى جانە باسقا دا ۋنيۆەرسيتەتتەردىڭ مۋزىكالىق فاكۋلتەتتەرىنىڭ ستۋدەنتتەرى جەتى باعىتتاعى ماماندىق بويىنشا, اتاپ ايتقاندا: «ءداستۇرلى مۋزىكا ونەرى», «اسپاپتىق ورىنداۋشىلىق», «ارت-مەنەدجمەنت», «مۋزىكالىق ءبىلىم بەرۋ», «ديريجەرلەۋ», «كومپوزيتسيا», «ۆوكالدىق ونەر» سايىسقا تۇسەدى.
كونسەرۆاتوريانىڭ ۇلكەن كونتسەرتتىك زالىندا وليمپيادانىڭ سالتاناتتى تۇردە اشىلۋى ءوتتى. سالتاناتتى جيىندى كونسەرۆاتوريانىڭ رەكتورى, قازاقستاننىڭ ەڭبەك سىڭىرگەن قايراتكەرى ارمان جۇدەباەۆ اشىپ بەردى. رەكتور سوزىندە: «بۇلاق كورسەڭ – كوزىن اش» دەگەن ءسوز بار حالقىمىزدا. مۋزىكالىق جوعارى وقۋ ورىندارىنىڭ تالاپكەرلەرى جىل سايىن بۇل باسەكەنى تاعاتسىزدانا كۇتەدى جانە وزدەرى دە كاسىبي دايىندىقپەن كەلەدى. تاۋەلسىز ەلىمىزدىڭ بولاشاعى – جاستاردى قولداۋ ماقساتىندا ۇيىمداستىرىلىپ وتىرعان شارا بولاشاق مامانداردىڭ كاسىبي مۇمكىندىكتەرىن دامىتۋ, ءبىلىم الۋشىنىڭ وقۋ-تانىمدىق بەلسەندىلىگىن ىنتالاندىرۋ, دارىندى ءبىلىم الۋشىلاردى ىرىكتەۋ جانە ولارعا شىعارماشىلىق سەرپىن بەرۋدى كوزدەيدى. وسىنداي ءمانى جوعارى شارانى ۇيىمداستىرۋعا زور قولداۋ كورسەتىپ وتىرعان, كونسەرۆاتوريامەن تىعىز ىنتىماقتاستىقتا بىرنەشە بىرلەسكەن ءىس-شارالاردى اتقارىپ جۇرگەن قازاقستان رەسپۋبليكاسى تۇڭعىش پرەزيدەنتى – ەلباسى قورىنا العىس بىلدىرەمىن!» – دەپ اتاپ ءوتتى. شارانى ۇيىمداستىرۋشىلاردىڭ ءبىرى قازاقستان رەسپۋبليكاسى تۇڭعىش پرەزيدەنتى – ەلباسى قورىنىڭ الماتىداعى وكىلدىگىنىڭ ديرەكتورى سەرگەي توحتاروۆ تا ءسوز الىپ, شىعارماشىل جاستاردى قولداۋ ەلباسى قورى جۇمىسىنىڭ جۇيەلى تۇردە جۇرگىزىلىپ وتىرعان باستى باعىتتارىنىڭ ءبىرى ەكەنىن اتاپ ءوتتى. «بيىلعى وليمپيادانىڭ تۇڭعىش پرەزيدەنتىمىز ن.ءا.نازارباەۆتىڭ باستاماسىمەن جاريالانعان «جاستار جىلى» اياسىندا ءوتۋى بەكەر ەمەس. حالقىمىز «اقىل جاستان, اسىل تاستان» - دەمەۋشى مە ەدى. جاستاردىڭ ءبىلىمى مەن تاپقىرلىعى جانە جىگەرى كەز-كەلگەن ۇلتتىڭ نەگىزگى العا قوزعاۋشى كۇشى ەكەنى اقيقات. بۇل دودا – ءبىلىمىڭدى جەتىلدىرىپ, تاجىريبەڭدى ارتتىرۋدىڭ تاعى ءبىر مۇمكىندىگى بولىپ تۇر. دارىندى تۇلعالاردىڭ لەگىن وسىنداي سايىستار تولىقتىرىپ وتىراتىنىنا كۇمانىم جوق», – دەپ ءسوز تۇيىندەدى ول.
اشىلۋ سالتاناتى قۇرمانعازى اتىنداعى قازاق ۇلتتىق كونسەرۆاتورياسىنىڭ دارىندى ستۋدەنتتەرىنىڭ كونتسەرتتىك باعدارلاماسىمەن جالعاستى. ولاردىڭ ىشىندە كونسەرۆاتوريانىڭ ارالاس حورى, ۇرمەلى اسپاپتار وركەسترى, 1 كۋرس ستۋدەنتتەرىنەن قۇرالعان «Grand Classic» تريوسى, حالىقارالىق بايقاۋلاردىڭ لاۋرەاتى ايدوس بايبوسىنوۆ جانە تاعى باسقا ونەرپازدار ونەر كورسەتىپ اشىلۋ سالتاناتىنىڭ ءسانىن كەلتىردى.
جوعارى وقۋ ورىندارىنىڭ ستۋدەنتتەرى ۇلكەن دودادا 12 ماماندىققا قاراستى 16 نوميناتسيا بويىنشا سايىسقا تۇسسە, مۋزىكالىق كوللەدجدەر مەن مامانداندىرىلعان مەكتەپتەردىڭ تالىمگەرلەرى كىشى وليمپيادادا 9 ماماندىق ىشىندەگى 13 نوميناتسيا بويىنشا بىلىمدەرىن ساراپقا سالماق. رەسپۋبليكامىزدىڭ اقتاۋ, اتىراۋ, اقتوبە, كوكشەتاۋ, قىزىلوردا, نۇر-سۇلتان, شىمكەنت, سەمەي, وسكەمەن جانە باسقا دا قالالارىنان كەلگەن ءوتىنىش حاتتاردىڭ جالپى سانى 350-دەن اسىپ وتىر.
ايتا كەتەيىك, XI رەسپۋبليكالىق ستۋدەنتتىك پاندىك وليمپيادا ءساۋىر ايىنىڭ 18-نە دەيىن جالعاسادى.
الماتى
