بايقاۋدىڭ نەگىزگى ماقساتى – مۋزىكالىق جانە شىعارماشىلىق دارىنى بار بالالاردى انىقتاۋ جانە قولداۋ كورسەتۋ, ولاردىڭ شىعارماشىلىق الەۋەتىن جۇزەگە اسىرۋعا جانە بولاشاقتا تالاپ-قابىلەتتەرىن دامىتۋعا كومەكتەسۋ. بايقاۋدىڭ ءبىرىنشى ماۋسىمىنان باستاپ بالاباقشا مەن مەكتەپتەرگە كەڭىنەن تاراپ كەتكەن 56 جاڭا ءان جازىلدى, ىرىكتەۋ كەزەڭدەرىنە 20 156 بالا قاتىسىپ, تەلەۆيزيالىق ەفيرلەردە 12 كونتسەرتتىك شوۋ, 24 كۇندەلىك, 128 بەينەروليك كورسەتىلدى. «بالا داۋىسىنىڭ» كوپتەگەن تۇلەكتەرى قازىرگى تاڭدا «جاندانۋ الەمى» قورىنىڭ قولداۋىمەن مۋزىكالىق مەكتەپتەر مەن كوللەدجدەردە ءتالىم الۋدا. بايقاۋدىڭ ىرىكتەۋ كەزەڭدەرىنىڭ ەلىمىزدىڭ بارلىق وڭىرلەرىندە ءوتۋى «بالا داۋىسىنىڭ» بىرەگەيلىگى بولىپ تابىلادى.
الماتى قالاسىنىڭ ءانشى بالالارى اسىعا كۇتكەن بايقاۋدىڭ بيىلعى ىرىكتەۋ سىنىنا جاستاردىڭ سۇيىكتى ءانشىسى ءالي وقاپوۆ پەن زاماناۋي مۋزىكا ساراپشىسى, ءانشى فاريدا نيازوۆا تالىمگەرلىك جاسادى. تاۋداي تالاپپەن كەلگەن ءار بالا وزىنشە دارىندى دا. «بالا داۋىسى» ۇلتتىق ءان بايقاۋىنىڭ ۇيىمداستىرۋشىسى تولعاناي حاسەنوۆانىڭ ايتۋىنشا, بيىلعى بايقاۋ جاڭا فورماتتا وتەدى. باق سىنايتىن بالاعا دا, بايگەگە باپتاپ قوسقان اتا-اناعا دا قوبالجۋدىڭ قاجەتى جوق – بايقاۋ اشىق ءارى ءادىل جۇرگىزىلەدى. باستى شارت – وسى. ىرىكتەۋ سىنىندا ءار بالا ءوزىنىڭ ۆوكالدىق قابىلەتىن كورسەتەتىن جانە قالاعان تىلدەگى ءۇش ءاندى شىرقايدى. جالپى, شىعارماشىلىق توپ 29 ناۋرىز بەن 22 مامىر ارالىعىندا 8 جانە 12 جاس ارالىعىنداعى ناعىز تالانتتاردى تاڭدايدى.
«بالا داۋىسى» سياقتى رەسپۋبليكالىق دەڭگەيدەگى ءان بايقاۋىنىڭ بولۋى كىشكەنتاي ورەندەر ءۇشىن ماڭىزدى ءارى قاجەتتى. سەبەبى بولاشاقتا مۋزىكا باعىتىن تاڭدايتىندار بالدىرعان كۇنىنەن تاجىريبە جيناقتاپ, ءتۇرلى دايىندىق ساتىلارىنان وتەدى. مۇنداي جوبالاردىڭ ءتۇيىنى – تانىمالدىلىق. كىشكەنتاي انشىلەر دەگەنىمىزبەن, بۇل – شىعارماشىلىق, بۇل – مۋزىكا, بۇل – ونەر. «بالا داۋىسى» جوباسىنا بيىل ءۇشىنشى جىل تالىمگەرلىك جاساپ وتىرمىن. وتكەن جىلدارى ورال جانە قىزىلوردا قالالارىنداعى بايقاۋدا تالىمگەر بولعانمىن. بۇدان بولەك «گولوس – دەتي كازاحستانا» جوباسىندا دا قازىلىق جاساعان بولاتىنمىن. سول سەبەپتى قابىلەتتى بالانىڭ داۋىسىن تانىپ, ونەرىن باعالاۋدا تاجىريبەم بار. ارينە, ءبىز ءۇشىن بالانىڭ داۋىس قۋاتتىلىعى, ورىنداۋ شەبەرلىگى, جالپى ۆوكالدىق قابىلەتى باستى ماسەلە. دەگەنمەن بۇدان بولەك بالانىڭ كورەرمەننىڭ كوزايىمىنا اينالا الاتىنداي سۇيكىمدىلىگى دە بولۋى كەرەك. مىڭنىڭ, ميلليوننىڭ جۇرەگىن جاۋلاپ الۋ وڭاي ەمەس, جاسىنا قاراماستان ءانشىنىڭ ساحناعا دەگەن ىڭكارلىگى, ءان سالۋعا قۇشتارلىعى, جىگەرى, ادەمى قيمىل-قوزعالىسى, ارتيستيزم, وسىنىڭ ءبارى دە بويىنان كورىنىپ تۇرۋى ءتيىس. ءار بالانىڭ تەك وزىنە ءتان قايتالانباس ەرەكشەلىگى بولادى. ءبىزدىڭ مىندەت – سول ەرەكشەلىكتى تانۋ», دەيدى ءتالىمگەر ءالي وقاپوۆ.
تاڭعى 9-دان كەشكى 7-گە دەيىن تاپجىلماي وتىرىپ, تالاپكەرلەر اراسىنان ۇزدىك داۋىستىڭ يەسىن تانۋ ءالي مەن فاريداعا وڭايعا سوققان جوق. كۇنۇزاق جۇرگىزىلگەن كاستينگ ناتيجەسىندە الماتى قالاسىنىڭ ەڭ ۇزدىك ءانشىسى دەپ 10 جاستاعى ميراس ماكسيموۆ تانىلدى. جوبانىڭ اقتىق سىنىنا الماتى قالاسىنىڭ اتىنان جولداما العان ول ەلىمىزدىڭ بارلىق وبلىس ورتالىقتارى جانە نۇر-سۇلتان, الماتى, شىمكەنت قالالارىنان جۇيرىك شىققان 17 ەڭ ۇزدىك بالانىڭ قاتارىندا بايقاۋدىڭ سۋپەر-مارەسىندە ءان شىرقايدى. ميراسقا تاڭداۋ بىلدىرگەن ءا.وقاپوۆ ونىڭ بولاشاقتا وتاندىق ساحنانىڭ لايىقتى ماقتانىشى بولاتىنىنا سەنىم ءبىلدىردى. اقتىق سىندا بالدىرعانداردى قازىلار قۇرامىنا كىرەتىن قازاق ەستراداسىنىڭ ايگىلى جۇلدىزدارى, تانىمال پروديۋسەرلەر مەن حورەوگرافتار كۇتەدى. ىرىكتەۋگە كەلگەن ءاربىر بالا ەستەلىك سىيلىقتار مەن ديپلومدارعا يە بولىپ, بايقاۋدىڭ كۇندەلىكتەرى ءتۇسىرىلىمىنە قاتىسادى. بالالاردىڭ اتا-انالارى مەن تالىمگەرلەرى دە شەتتە قالمايدى, ولاردىڭ قالاۋىمەن بالدىرعانداردىڭ شىعارماشىلىعىن دامىتۋ بويىنشا شەبەرلىك ساعاتتارى جانە بالا پسيحولوگياسى ماسەلەلەرى بويىنشا كەڭەستەر وتكىزىلەدى.
كۇز ايىندا ءوز وڭىرىندە ۇزدىك دەپ تانىلعان ەلىمىزدىڭ ەڭ مىقتى 17 داۋىسى «جۇلدىزدى ارمان ۇيىندە», الاتاۋدىڭ باۋرايىندا ورنالاسقان «بوبەك» ۇلتتىق ورتالىعىندا باس قوسادى. مۇندا جەڭىمپاز بالالاردى كۇندەلىكتى كاسىبي مۋزىكانتتار, حورەوگرافتار, ستيليستەر بايقاۋدىڭ اقتىق سىنىنا, تەلەۆيزيالىق تۇسىرىلىمدەرگە دايىندايدى.
24-26 قازان ارالىعىندا الماتى قالاسىنىڭ رەسپۋبليكا سارايىندا وتەتىن «بالا داۋىسىنىڭ» اقىرعى مارەسىندە بايقاۋ اياسىندا جازىلعان جاڭا اندەر شىرقالىپ, «بالالىق شاقتىڭ مەيىرىمدى عالامشارى» اتتى سپەكتاكل-ميۋزيكلدىڭ تۇساۋكەسەرى وتەدى. كورەرمەندەر اقتىق سىنعا دەيىن جەتكەن ونەرلى بالالاردىڭ قاتىسۋىمەن وتەتىن قايتالانباس شوۋدىڭ كۋاگەرى بولا الادى. بايقاۋدىڭ بارلىق سوڭعى كەزەڭدەرىن كاسىبي قازىلار القاسى جانە ونلاين-داۋىس بەرۋ ارقىلى تەلەكورەرمەندەر باعالايدى.
بارلىق قاتىسۋشىلار ارنايى سىيلىقپەن ماراپاتتالىپ, ەڭ ءۇزدىك دەپ تانىلعان داۋىس يەسى ەلىمىزدىڭ تاڭداۋلى مۋزىكالىق ءبىلىم ورداسىندا وقۋعا مەملەكەتتىك گرانت جانە پاريجدەگى ەرتەگى الەمى ديسنەيلەندكە ساياحات جاساۋعا جولداما الادى.
الماتى
