• 29 ناۋرىز، 2019

الپىسباي قازىعۇلوۆ. كوڭىل كوكتەمى

استانادا تانىمال سۋرەتشى الپىسباي قازىعۇلوۆتىڭ «كوڭىل كوكتەمى» اتتى جەكە كورمەسى اشىلدى. كوركەمدىك ءبىتىمى بولەك، بولمىسى ءار الۋان كەلەتىن 65 تۋىندىسى كوپتىڭ نازارىنا ۇسىنىلدى.

Egemen Qazaqstan

اۆتوردىڭ بالالىق شاعىنان قالىپتاسقان تانىم-تۇسىنىگى مەن قورشاعان ورتا تۋرالى قيال كوكجيەگى كورىنىس تاپقان «مەنىڭ بالالىق شاعىمنىڭ اۋىلى»، «بەلدەسۋ»، «كەرۋەن»، «ويىن» سىندى تۋىندىلارى كورمە تورىنەن ورىن تەۋىپتى. قۇلپىرعان ءوڭ مەن مازمۇنعا باي كومپوزيتسياسى اۆتوردىڭ وزىندىك قولتاڭباسىن بىردەن دارالايدى. جاراسىمدى جولاقتار كوكتەن تىك قۇيىلعان قالپى مۇنارتقان اتىراپ كورگەن تۇستەي ب ۇلىڭعىرلانا كەلە، كەنەت جارق ەتىپ بارىپ، ىشكى سىرىن قاز-قالپىندا الدىڭا جايىپ سالادى.

تالانت تاستى دا جارىپ شىعادى. بەينەلەۋ ونەرىنە مۇلدەم توسىننان كەلگەن ا.قازىعۇلوۆتىڭ ونەرىن ۇستەم ەتىپ، مەرەيىن اسىرعان تاباندى ەڭبەگى مەن توگىلگەن تەرى. ونىڭ اباي اتىنداعى قازاق پەداگوگيكا ينستيتۋتىنىڭ كوركەمسۋرەت-گرافيكا فاكۋلتەتىنە اياقاستى وقۋعا ءتۇسىپ ءارى ۇزدىك اياقتاۋى تاڭعالارلىق دۇنيە.

– جىلىنا جۇزدەگەن كارتينا جازامىن، بىراق سونىڭ اراسىندا كوڭىلىمنەن شىعاتىنى از. ادامدى الىپ شىعاتىن دا، تانىتاتىن دا ىزدەنىس پەن ەڭبەك، – دەيدى سۋرەتشىنىڭ ءوزى. ايگىلى جازۋشى شىڭعىس ايتماتوۆتى دا وسى ءبىر شىنشىل، تۇڭعيىق +بولمىسىمەن باۋراپ السا كەرەك. «قازاقتىڭ دارقان دالاسىنا، تۋعان ەلىنە، جەر-اناعا دەگەن سۇيىسپەنشىلىك سەزىلەتىن الپىسبايدىڭ سۋرەتتەرى مەنى بىردەن باۋراپ الدى. سۋرەتشىنىڭ قىلقالامىنان تۋعان دۇنيەلەردە جالعاندىق جوق»، دەگەن جازۋشى اۆتوردىڭ ماڭگىلىك تاقىرىپتارعا تايسالماي بويلايتىنىنا تاڭدانىس بىلدىرەدى.

الپىسباي قازىعۇلوۆ قىرىق جىلدىق شىعارماشىلىق عۇمىرىندا 7 مىڭنان استام تۋىندى جازعان دارىندى سۋرەتكەر. شىعارمالارىنىڭ باس كەيىپكەرى – اسپان مەن جەردى استاستىرعان ۇلان-عايىر كەڭىستىك. تۋىندىلارى ءا.قاستەەۆ اتىنداعى مەملەكەتتىك ونەر مۋزەيىندە، ەلىمىزدىڭ باس رەزيدەنتسياسى اقوردادا، وزگە دە كوركەمسۋرەت مۋزەيلەرى مەن شەتەلدەردەگى دەربەس كوللەكتسيالار قورىنان ورىن العان. سونداي-اق چەحيانىڭ ءبىرىنشى پرەزيدەنتى ماساريك اتىنداعى حالىقارالىق سىيلىقتىڭ يەگەرى (2003 ج.، پراگا).

ايا ءومىرتاي،

«Egemen Qazaqstan»