KBS Everywhere اتتى KBS ارناسىنىڭ رەيتينگتى تەلەباعدارلاماسى تۋريستەردىڭ كوزقاراسى ارقىلى ءوز كورەرمەندەرىن الەمنىڭ ءتۇرلى بولىكتەرىندە ورنالاسقان ەڭ قىزىقتى قالالارمەن جانە تابيعي مەكەندەرمەن تانىستىرادى, سونداي-اق دەرەكتى فيلم فورماتىندا سول جەردىڭ تاريحى, مادەنيەتى مەن داستۇرلەرى تۋرالى باياندايدى.
قازاقستانداعى ءتۇسىرىلىمنىڭ باستى تاقىرىبى ناۋرىز مەيرامى بولدى. 21 ناۋرىزدا ءتۇسىرىلىم توبى استاناعا كەلىپ, 22 ناۋرىزدا ەكسپو اۋماعىنداعى جانە قازاق ەلى مونۋمەنتىنىڭ الدىنداعى الاڭدا ورنالاسقان ەتنواۋىلدارداعى توي-دۋمانعا قاتىستى.
ودان كەيىن قوناقتار نۇر-سۇلتان قالاسى ماڭىندا ورنالاسقان BEIBARYS دەمالىس ورنىنا بارىپ, ونداعى ناۋرىز دۋمانىن تاماشالادى. ول جەردە «كوكپار» مەن «قىز قۋ» سياقتى ۇلتتىق ويىندارعا كورەرمەن بولىپ, ناۋرىز كوجەنىڭ ءدامىن تاتتى.
كەلەسى كۇنى ءتۇسىرىلىم توبى Visit Aqmola مەن «بۋراباي دامۋ» جشس قولداۋىمەن بۋراباي كۋرورتىنا بارىپ, Burabayland تەماتيكالىق ساياباعىندا ءوتىپ جاتقان مەرەكەلىك باعدارلاماعا قاتىستى. بۋرابايدا ولار اتقا ءمىنىپ, «اۋدارىسپاق» پەن «قوي كوتەرۋ» سياقتى ۇلتتىق جارىس تۇرلەرىن دە تاسپاعا ءتۇسىردى.
قوناقتار بۋرابايدىڭ تابيعاتىنا تامساندى. ولار ءۇش كولدىڭ ادەمى كورىنىسى اشىلاتىن بولەكتاۋدىڭ باسىنا كوتەرىلىپ, ءالى دە مۇز قاتىپ جاتقان بۋراباي كولىنىڭ ۇستىمەن جۇمباقتاس پەن وكجەتپەس تاۋىنا دەيىن بارىپ قايتتى.
ودان كەيىن كورەيادان كەلگەن توپ الماتىعا جەتتى. بۇل جەردە Visit Almaty تۋريستىك اقپارات ورتالىعى قالا مەن وبلىستىڭ باستى كورىكتى جەرلەرىنە بارۋ ءۇشىن 6 كۇندىك باعدارلاما ۇيىمداستىرعان. بارا سالىپ ولار ەسىك كولى مەن قورعاندارىن تاسپاعا جازىپ, ءارى قاراي شارىن شاتقالىنا اتتاندى.
كەشە قوناقتار كولساي مەن قايىڭدى كولدەرىن تۇسىرۋگە بارىپ, ۇلتتىق ساياباقتىڭ جانىنداعى ساتى اۋىلىندا جەرگىلىكتى تۇرعىنداردىڭ ۇيىنە قوندى.
بۇگىن ۇلكەن الماتى كولى, كوكتوبە, اربات, مەدەۋ, شىمبۇلاق جانە كورەيا تەاترى سەكىلدى كورىكتى جەرلەردى ءتۇسىرۋ جوسپارلانعان. ال ساپاردىڭ ەڭ سوڭعى كۇنى جۋرناليستەر ۇشقوڭىرعا اتتانباق.
جالپى وسى ساپار بارىسىندا جۋرناليستەر, ەڭ الدىمەن, جەرگىلىكتى حالىقتىڭ ءومىرى مەن داستۇرلەرىنە قاتتى قىزىعۋشىلىق تانىتىپ, كوشەلەردەگى كەزدەيسوق ادامدارمەن سۇحبات جۇرگىزىپ, شەتەلدىك تۋريستەرمەن سويلەسكەنىن ايتا كەتۋ كەرەك.
ناتيجەسىندە KBS تەلەارناسىندا 50 مينۋتتىق باعدارلامانىڭ كورسەتىلىمى اعىمداعى جىلدىڭ 4 مامىرىنا ساعات 09.40-قا جوسپارلانعان. بۇعان قوسا, تەلەراديوكورپوراتسيانىڭ مالىمەتى بويىنشا, باعدارلاما باسقا دا كورەي تەلەارنالارىندا كورسەتىلەتىن بولادى.
تاعى دا ءبىر اتاپ وتەتىن جايت, KBS ءتۇسىرىلىم توبىن ەلىمىزگە ناۋرىز مەيرامىن ءتۇسىرۋ ءۇشىن شاقىرۋ – قر كورەيا رەسپۋبليكاسىنداعى ەلشىلىگىنىڭ باستاماسى.
