بۇل تۋرالى حابار «112» قىزمەتىنە ساعات 17:35-تە ءتۇستى. اۋە كولىگى تۇگى قالماي جانىپ كەتكەن. اپاتتىڭ سەبەبى ازىرگە بەلگىسىز. بەلگىلىسى, تىكۇشاق ەلىمىزدىڭ قورعانىس مينيسترلىگىنە تيەسىلى. وسى مينيسترلىكتىڭ حابارلاۋىنشا, اۋە تەحنيكاسىنىڭ بورتىندا 13 ادام بولعان. بۇعان دەيىن توتەنشە جاعدايلار قىزمەتى قۇلاعان مي-8 تىكۇشاعى دەپ حابارلاعان بولاتىن.
تالعات مۇحتاروۆ, قورعانىس ءمينيسترىنىڭ ورىنباسارى, گەنەرال-لەيتەنانت:
- قورعانىس مينيسترلىگى اسكەري اۋە كۇشتەرىنىڭ تىكۇشاعى اپاتقا ۇشىرادى. الدىن الا مالىمەت بويىنشا, وپات بولعاندار بار. قازا تاپقاندار مەن زارداپ شەككەندەردىڭ سانى مەن جاعدايى انىقتالۋ ۇستىندە. 4 تىكۇشاق اقتاۋ قالاسىنان شىمكەنتكە قاراي باعىت العان. ۇشۋ تۇنگى ۋاقىتتا مەتەورولوگيالىق قيىن جاعدايدا كەشەندى تەكسەرىس جانە «التىن جەبە» ارنايى بولىمشەلەرىنىڭ جاتتىعۋى اياسىندا ىسكە اسىرىلعان. قورعانىس ءمينيسترى, گەنەرال-مايور نۇرلان ەرمەكباەۆتىڭ بۇيرىعىمەن قورعانىس مينيسترلىگىنىڭ ارنايى كوميسسياسى وقيعا ورنىنا اتتاندى. قازىرگى ۋاقىتتا ەكى تىكۇشاق قىزىلورداعا قوندى. بىرەۋى اپات ورنىنا ورالدى. قورعانىس مينيسترلىگى مەن ىشكى ىستەر مينيسترلىگى بىرىگىپ اۋە اپاتىنىڭ سەبەبى مەن ءمان-جايىن انىقتاۋ ءۇشىن ءتيىستى تەرگەۋ جۇمىستارىن باستادى.
